د اسرایل وزیراعظم بنیامین نېتنیاهو د زیارت/پنجشنبې به ورځ وویل، هغه امریکې ته ویلي دي چې د حماس ډلې سره د اسرایل د جنګ وروستو، د ممکنه حل لارې په ترڅ کې د یو فلسطیني ریاست د جوړېدو نه د واشنګټن د اوږدمهال ملاتړ سره اختلاف لري.
د اسرایل د ښي اړخي حکومت چارواکو اکثره وختونه د اسرایل ترڅنګ د یو آزاد فلسطیني ریاست د جوړېدو سره مخالفتونه ښودلي دي. مګر د نېتنیاهو دا تازه بیان چې په یو خبري کنفرانس کې یې ورکړ او ټول ملک کې به راه راست خورېدو، د یادې مسئلې په تعلق سره تر ټولو اهمه څرګندونه وه او د امریکا سره، چې په جنګ کې د امریکا تر ټولو نږدې اتحادي دی، یو ستر اختلاف عوامو ته راښکاره کړ.
د وایټ هاوس د قامي سلامتیا د کونسل ترجمان، جان کربي د اسرایل د وزیراعظم د وینا تردید وکړ.
کربي وویل: "دا د وزیراعظم نېتنیاهو کوم نوی بیان ندی. مونږ په واضحه توګه دې ته په جدا نظر ګورو."
د امریکا خارجه وزیر انټني بلېنکن په همدې تېره هفته کې د سویټزرلېنډ په ډېوېس کې د ورلډ اکنامیک فورم په غونډه کې د نړۍ لیډرانو او کاروباري مشرانو ته وویل چې په منځني ختیځ کې د امن دپاره "یو فلسطیني ریاست ته لاره خلاصول" ډېره ضروري ده.
د امریکا د خارجه وزارت ترجمان مېټیو مېلر د زیارت/پنجشنبې په ورځ وویل: "[د اسرایل] د اوږمهاله چلېنجونو دپاره، د پایداره امن د قایمولو دپاره، هېڅ بله لاره نشته، او د غزې د بیا تعمیرولو د لنډمهاله چلېنجونو دپاره او غزه کې د حکومتدارۍ د قایمولو دپاره او هلته کې د امن راوستلو دپاره هېڅ بله لاره نشته بغیر د دې چې یو فلسطیني ریاست جوړ کړی شي."
نيتناهو پخپل خبري کنفرانس کې وویل: "د هر ډول آینده انتظاماتو په صورت کې... اسرایل ضرورت لري چې د اردن سېند لویدېځې غاړې ټولې علاقې امنیتي اختیار په لاس کې ولري. دا د خودمختارۍ د نظریې سره ټکر لري. نو څه کولی شو؟"
هغه د اسرایل او امریکا ترمنځ تعلقاتو ته په اېما سره وویل: "وزیراعظم ته په کار ده دا صلاحیت ولري چې خپلو ملګرو ته انکار وکړي."
اسرایل ویلي دي چې حماس سره د روانې جګړې وروستو د غزې د بیا قبضې کولو خیال نلري، مګر د دې نه یې انکار کړی چې د جنګ نه پس د غزې دپاره څه پلان په خیال کې لري.
بنیامین نېتنیاهو وویل اسرایل په غزه پټۍ کې د څه باندې درې میاشتې جګړې په ترڅ کې د حماس د جنګي قوت دوه په درېیمه برخه تباه کړې ده، او هغه ژمنه یاده کړه چې د "مکمله کامیابي" پورې به اسرایل خپل جنګ جاري ساتي.
د نېتنیاهو وینا وه چې: "د جنګ دوه پړاوه دي. اول یې د حماس د جنګي دستو تباه کول دي، کوم چې د هغو منظم جنګي قوتونه دي."
امریکا دا څو هفتې کیږي چې د اسرایل په یهودي ریاست ټینګار کوي چې غزه کې دې عظیم پوځي عملیات راکم کړي او په هغې وړوکې پټۍ کې دې د اولسي خلکو د وژلو شمېر ډېر محدوده وګرځوي.
اسرایل د زیارت/پنجشنبې په ورځ هم وویل چې د غزې په شمالي او جنوبي علاقو کې یې حملې کړي او د تندلارو اهداف یې په نښه کړي دي. د غزې د صحت چارواکي چې حماس ټاکلي، وایي په رفح کې د اسرایل په یو فضایي بمبارۍ کې شپاړلس (۱۶) تنان ووژل شول چې نیمایي یې ماشومان و.
Forum