امنیتي چارواکي وایي د بلوچستان د کیچ ضلعې د ناکراره سیمې هوشاب څخه د ټیلي کام کمپنۍ د ستنې یا ټاور لګولو پینځه مزدوران نامعلومه وسله والو تښتولي دي.
د پاکستان بیلابیلو رسنیو د لیویز چارواکو له خولې ویلي چې دا پېښه د هوشاب په ډنډار نومې کلي کې تېره ورځ هغه مهال مخې ته راغلې ده چې دغه مزدوران د سرکاري ټيلي کام کمپنۍ د یوې نوې ستنې یا ټاور په لګولو بوخت وؤ.
چارواکي وایي د تښتول شوؤ ټولو مزدورانو تعلق د پنجاب صوبې سره دی اؤ هغوي پرته له کوم امنیت نیونې دغه سیمې ته د کار کولو لپاره ورغلي وؤ.
په سمدستي توګه چا د دغو مزدورانو د تښتولو ذمه واري پغاړه نه ده اخستې خو رسنۍ وایي چې د کیچ د مرستیال کمشنر په وینا سیمې ته د لیویز ځواک یوه ډله ډله استول شوې ده اؤ هغوي د تښتول شوؤ مزدورانو د راخلاصولو په موخه عملیات پېل کړي دي.
د بلوچستان بیلابیلو سیمو نه وخت په وخت له پنجاب سره د تړاؤ لرونکو مزدورانو د وژنو اؤ تښتونو رپورټونه مخې ته راځي اؤ د دغو پېښو زیاتره ذمه واري هغه بلوڅ بېلتون خوښې وسله والې ډلې پغاړه اخلي چې د پاکستان تر ټولو ستره صوبه پنجاب د بلوچستان په قدرتي وسیلو تروړلو تورنوي .
تېرکال د ستمبر مياشتې په ٩مه نېټه د ډيره بګټي له سویي سيمې څخه ١٥ کلوميټره لرې کوچي کانال ته څېرمه د لوندو ناله په نوم سیمې څخه د فوټبال شپږ لوبغاړي هم د وسله والو لخوا تښتول شوي وؤ چې ذمه واري یې د بلوڅ لیبریشن ټایګرز (BLT) په نوم یوې نوې وسله والې ډلې پغاړه اخستې وه.
خو دغه تښتول شوي لوبغاړي بیا د اکتوبر تر میاشتې پړاؤ په پړاؤ پرېښودل شوي وؤ.
Forum