امریکې پاکستان کې په میډیا اؤ د رایې په اظهار په لګول شوؤ بندیزونو اندېښنه ښکاره کړې ده اؤ ویلي یې دي چې د رایې د اظهار مخې ته بندونه وهل د پاکستان د خپلې پالیسۍ په ضد دي.
د امریکې د خارجه وزارت مرستیال ویاند ویدانت پټيل رسینو ته د اوونیز احوال ورکولو په مهال پاکستان کې د جمهوري نظام په وده اؤ د میډیا د ازادۍ په ارزښت ټینګار کړی دی.
هغه وویل امریکا به پاکستان کې د ټولټاکنو اؤ د جمهوري نظام ملاتړ ته دوام ورکوي.
ویدانت پټيل وویل د پاکستان د راتلونکي قیادت یا مشرتابه پرېکړه به پخپله د پاکستان ولس کوي اؤ د امریکا خوښي د پاکستان دننه جمهوري عمل کې ده.
د ویاند په خبره ، مونږ دا ګڼو چې ازاده اؤ خپلواکه میډیا د جمهوریت لپاره ډيره زیاته ضروري ده، د ابلاغ ذریعې د رایې ورکوونکو باخبره ساتلو اؤ د حکومت په جوابده ساتلو کې کومک کوي.
د پاکستان اؤ ایران ترمنځ په دې وروستیو کې د پیدا شوي تاوتریخوالي په اړه د بهرنیو چارو د محکمې مرستیال ویاند وویل ایران سیمه کې جارحانه یا د تیري ګامونه اخلي اؤ موږ د ایران په معامله پاکستان چارواکو سره په تماس کې یو.
د پاکستان او ایران تعلقات وروسته له هغې د تاوتریخوالي ښکار شوي وؤ چې ایران تېره هفته وویل ځواکونو يې د پاکستان په پنجګور سیمه کې د جېش العدل نومې وسله والې ډلې دوه مرکزونه په ډرون او مزایلو وويشتل.
پاکستان د ایران د حملې غندنه وکړه او ویې وېل په حمله کې دوه ماشومان وژل شوي او ګڼ شمېر نور ملکي کسان زخمیان شوي دي.
د ایراني حملې نه یوه ورځ وروسته، پاکستان اعلان وکړو چې ایران نه خپل سفیر ستنوي او په اسلام اباد کې ایراني سفیر ته یې ملک نه د وتلو امر کړی ؤ.
د زیارت، پنجشنبې، په ورځ پاکستان وویل په "مرګ برسرمچار" عملیاتو کې یې د ایران په خاوره د ترهګرو پټن ځایونه وېشتلي دي. ایران وویل د پاکستان په حملو کې نهه غېر ملکیان وژل شوي چې زیاتره ښځې او ماشومان دي.
د ایران او پاکستان ترمنځ په شخړې راپورته کېدو په نړیواله کچه د تشویش اظهار شوی و او د دواړو ملکونو نه غوښتنه شوې وه چې د زغم نه کار واخلي.
Forum