واشنګټن – اوکراین د ګل یا دوشنبې په ورځ وویل، د هوايي دفاع سیستمونو یې هغه اته ډرونونه ویشتي او غورځولي دي چې روسانو د شپنیو بریدونو لپاره استولي وو.
د اوکراین هوايي ځواک ویلي، چې دغه ډرونونه په بېلابېلو سیمو کې له منځه وړل شوي.
دوی وايي، د ډرونونو ترڅنګ روسانو په خپلو بریدونو کې له دریو S-300 توغندیو څخه کار اخېستی.
د اوکراین ولسمشر ویلادیمیر زېلینسکي د اتوار یا یکشنبې په ورځ ویلي و چې دا ډېره مهمه ده چې "د خپل دفاعي ایتلاف څخه د زیاتو وسلو، ګولیو او ګاډو لېږد ووینو."
د زېلینسکي دغه خبره د ناټو د سرمنشي ینز سټالټنبرګ د هغه خبري وروسته شوې چې که اوکراین هغه مرستې ترلاسه نه کړی چې له روس سره جګړې لپاره ورته اړتیا لري نو امریکا، اروپا او د نړۍ نورې برخې له زیاتو ستونزو سره مخ شي.
هغه دا هم وویل، چې داسې اقدام به د نړۍ په نورو برخو کې هم جابر نظام د ځمکې نیولو ته غښتلي کړي.
د ناټو مشر له فاکس نیوز سره په یوې تازه مرکه کې ویلي، چې پېکنګ په اوکراین باندې د پوتین یرغل ته د ناټو غبرګرون له نېږدې ګوري او زیاته یې کړه، "نن چې اوکراین دی نو سبا به ښايي تایوان وي."
سټالټنبرګ د دې پوښتنې په ځواب کې چې ایا د ناټو د ۲۰۲۴ کال پوځي تمرینونه به چې د دوهمې نړیوالې جګړې راهیسې تر ټولو ستر بلل کېږي د پېکنګ او ماسکو د رهبرانو لخوا د کوم غبرګون ښودلو سبب نشي وویل، ناټو د جګړې لپاره ده نه د جګړې د پارولو لپاره.
ټآکل شوې ده چې د ناټو په دغو نویو پوځي تمرینونو کې به ۹۰۰۰۰ سرتېري په راتلونکو میاشتو کې په د اروپا په بېلابېلو برخو کې تمرینونه کوي.
دغه ډول په دغو تمرینونو کې به ۵۰ سمندري بیړۍ، ۸۰ الوتکې او ۱۱۰۰ جګړیز ګاډي برخه واخلي.
Forum