چین په اسرایلو باندې د نړیوالې محکمې د فیصلې په اړه په احتیاط چلند کړی

واشنګټن – چین دا اونۍ په احتیاط سره د عدالت لپاره د ملګروملتونو د نړیوالې محکمې د پرېکړې په اړه نظر څرګند کړی.

د دغې پرېکړې له مخې، له اسرایلو غوښتل شوي چې په غزه کې د فلسطینیانو له وژنې څخه ډډه وکړي.

څېړونکو امریکا غږ ته ویلي، چې چین په شخصي توګه د داسې محکمو په اړه چې د قتل عام د تورونو په اړه کار کوي ملاحظات لري.

د چین د بهرنیو چارو د وزارت له ویاند وانګ وین بېن څخه چې کله د ګل یا دوشنبې په ورځ په دې اړه د یوې خبري غونډې پر مهال پوښتنه وشوه نو هغه وویل، "مونږ هیله لرو چې د آی سي جې لخوا موقتي ګامونه به په اغېزناکه توګه عملي شي."

خو اروپايي ټولنې او امریکا په هېګ کې د جمعې د ورځې د پرېکړې په اړه په سمدستي ډول غبرګون څرګند کړ.

د چین د بهرنیو چارو د وزارت ویاند د دولتي ټي وي سي سي ټي وي د خبریال د پوښتنې په ځواب کې وویل،

"مونږ د ملکیانو پرضد هر ډول کړنې غندو او د ټولو هغو اقداماتو مخالف یو چې له نړیوال قانون څخه تېری وي. چین د شخړې له ښکېلو غاړو څخه غواړي چې په یو ځل معنی لرونکی اوربند وکړي او د بشري حقونو د نړیوالو قوانینو ساتنه وکړي."

د جنوبي افریقا کېس:

دا د جنوبي افریقا حکومت وو چې د اوږدې مودې راهیسې د فلسطینیانو ملاتړی پاتې شوی چې له آی سي جې یې وغوښتل چې په دې اړه پلتنې وکړي چې ایا اسرایل خو د غزې په جګړه کې قتل نه کوي.

په داسې حال کې چې ایا د کلونو په اوږدو کې قتل عام شوی او که نه محکمې تېره اونۍ موقتي تدابیر وغوښتل.

د چینايي قاضي په ګډون اکثرو قاضیانو پرېکړه وکړه چې جنوبي افریقا د منلو وړ کېس لري او اسرایل باید اوس ټول هغه ګامونه واخلي چې په غزه کې له وژنو څخه مخنیوی وشي.

د امریکا په څیړنیز سټیمسن مرکز کې د چین د پروګرام مشرې یون سن امریکا غږ ته وویل، "زه فکر کوم چې چین د آی سي جې له پرېکړې د جګړې د کمېدو لپاره کار اخلي. خو د قتل عام یادونه یې نه کړې او دغه پرېکړې ته یې د موقتي ګام نوم ورکړی."

هغې وویل، "قتل عام د چین لپاره یوه حساسه کلیمه ده او زه شک لرم چې چین دې داسې یو څه ووايي چې په یو خپلواک هېواد باندې بیا عملي شي."