بلېنکن د برازیل او ارجنټین په سفر روان دی، د برازیل صدر به د جي-۲۰ اجلاس مشري کوي

د امریکا خارجه وزیر انټني بلېنکن [د امریکا په وخت] د نهې/سې شنبې په سهار د برازیل او ارجنټین په سفر روانیږي چې په ریو ډې جنیرو کې د جي-۲۰ ډلې د خارجه وزیرانو په اجلاس کې د ګډون ترڅنګ، د برازیل او ارجنټین له مشرانو سره خبرې وکړي او د هغو سره د امریکا تعلقاتو ته فروغ ورکړي.

ټاکل شوې ده چې د جي-۲۰ په غونډه کې د روس خارجه وزیر سرګي لاوروف هم برخه ولري او ممکن په نایابه توګه د امریکا او روس خارجه وزیران سره په دې غونډه کې مخامخ شي.

دا اول ځل دی چې بلېنکن د امریکا د خارجه وزیر په حیث د ارجنټین او برازیل دوره کوي.

په سرښار برازیلیا کې به انټني بلېنکن د برازیل د صدر لوئیز اېناسیو لولا دا سېلوا سره وګوري، او بیا به په سرښار بوینس اېرېس کې د ارجنټین د نوي ټاکل شوي صدر خاویر میلي سره ملاقات ولري او د هغو سره به په دوه اړخیزو تعلقاتو او نړېوالو مسایلو خبرې وکړي.

د امریکا خارجه وزارت وویل چې بلېنکن به د جي-۲۰ ډلې د مشرۍ دپاره د برازیل د عهده دارۍ پر ملاتړ، د کاریګرو د حقونو په برخه کې د امریکا-برازیل په شراکتدارۍ، د صافې انرجۍ په برخه کې همکارۍ او د دوو ملکونو ترمنځ د دوه پېړیو تعلقاتو په لمانځلو بحثونه ولري.

بلېنکن دا خیال هم لري چې د جي-۲۰ ډلې د غونډې ترڅنګ، د دې ډلې له شریکانو سره په هېټې هېواد کې د څو قامي امنیتي مرستې په مېشن هم بحث وکړي. د هېټي خلک غواړي چې د هغوی د ملک په امن او استحکام کې دې نړېوال ورسره مرسته وکړي.

په جنوبي امریکا کې د یهودیانو تر ټولو لویه آبادي په ارجنټین کې ده. اسرایل ته د ارجنټین د نوي صدر خاویر میلي د وروستي سفر نه پس، د امریکا یو جګپوړي چارواکي وویل چې بلېنکن به د صدر میلي سره په دې باندې بحثونه شروع کړي چې د "غزه او اسرایل ترمنځ حالات څنګه مخ ته ولاړ شي."

د دې ترڅنګ به په مهمو منرالونو او پایداره اقتصادي ودې باندې هم خبرې وکړي.

د جي-۲۰ غونډه او د غزې او اوکراین مسئلې

داسې توقع نشته چې د جي-۲۰ غونډه کې د غزې د جنګ او یا د اوکراین د جنګ په اړه څه شریک بیان جاري کړي.

په جي-۲۰ ډله کې نولس (۱۹) ملکونه (په شمول د جي-۷)، یورپي اتحاد، او د افریقې اتحاد شامل دي چې د ټولې دنیا د خام پیداوار یا جي ډي پي قریب پنځه اتیا فیصده ٪۸۵ جوړوي، د نړۍ ٪۷۵ تجارت دوی پورې اړه لري او د ټولې نړۍ دوه په درېمه آبادي د دوی ده. جي-۷، چې دوی هم په جي-۲۰ کې شامل دي، تېره هفته یې خارجه وزیرانو د روس د حزب اختلاف د مشر الېکسي نووالني په مرګ غوصه څرګنده کړه او وعده یې وکړه چې د اوکراین سره به یې مرسته کلکه پرځای وي.

د جي-۷ ډلې خارجه وزیرانو په دې هم ټینګار کړی چې په غزه کې دې جنګونو کې دمې راوستلی شي چې یوې پایداره ډزبندۍ ته لاره هواره شي.