لاس رسیدونکی لینک

تازه خبر

د امریکې مرستیالې صدرې کاملا هېرس په غزه کې د سمدستي جنګ بندۍ غوښتنه کړې ‏


د امریکې مرستیالې صدرې کاملا هېرس د اتوار/يکشنبې په ورځ په غزه کې د "سمدستي جنګ بندۍ" غږ کړی دی، د اغلې د جنګ بندۍ غږ د صدر ‏جوبايډن د انتظاميې لخوا قوي غږ دی.‏

هېرس په الاباما کې د مدني حقونو د يوې کليزې په غونډه کې په څرګند ډول ويلي، په غزه کې په پراخه کچه تکليفونو ته په کتو هلته په سمدستي ډول ‏جنګ بندي پکار ده.‏

انتظاميه د مصر او قطر سره په ګډه د شپږو اوونيو دپاره په جګړه کې د وقفې دپاره درېمګړیتوب کوي چې د حماس لخوا يرغمل کسان خوشي شي او غزې ‏ته امداد ورسي، چرته چې ملګرو ملتونو د قحط خبرداری ورکړی دی.‏

هېرس ويلي، "په غزه کې خلک د لوږې سره مخ دي، اغلې زياته کړې، حالات غېر انساني دي، او زمونږ ګډ بشريت مونږ په اقدام مجبوروي، بايد د اسرايل ‏حکومت د امداد رسولو سېوا کولو دپاره نور کار وکړي معذرت دې نه کوي".‏

د خالي/ شنبې په ورځ د امریکې او اردن پوځ په ګډو عملياتو کې ‏‎38,000‎‏ خوراکي توکي په غزه کې غورځولي دي. د امريکې يو لوړ پوړي چارواکي ویلي، ‏دغه اقدام د نړیوالو همکارو سره په ګډه غزه کې د بشري مرستو سېوا کولو هڅه ده.‏

اغلې هېرس د جنګ بندۍ غږ په داسې وخت کې کړی چې د ګل/دوشنبې په ورځ یې د اسرايل د جنګي کابينې د يو غړي بيني ګېنټز سره په سپينه ماڼۍ کې ‏ليدنه ټاکل شوې ده.‏

هغې دا هم ويلي، "د حماس لخوا اسرايل ته ورپېښه خطره هم ختمېدل پکار دي".‏

د سپينې ماڼۍ يو چارواکي ويلي، هيله ده په خبرو کې د ملکي فلسطينيانو په وژنه، د موقتي جنګ بندۍ، يرغماليانو د خوشي کولو او امداد په سېوا ‏کولو خبرې وکړي.‏

چارواکي ويلي، هېرس به په رفح کې د ‏‎1.5‎‏ میلينه خلکو په اړه هم اندېښنه څرګنده کړي، او زياته کړې یې ده چې د حماس د ترهګر ګواښ لخوا د دفاع حق هم ‏حاصل دی.‏

ګېنټز په يو بيان کې تاييد کړې، هغه به د هېرس او سپینې ماڼۍ د ملي امنیت د سلاکار جېک سېلوين، د کانګرس د ريپبلکن او ډېموکرېټک غړو سره هم ‏وويني.‏

د اتوار په ورځ د حماس پلاوی په قاهره کې وو چې د اسرایل د پينځه مياشتو په جګړه کې په ممکنه توګه د اوونيو په جنګ بندۍ خبرې وکړي. خو د ‏اسرايل مطبوعاتو ویلي، د اسرايل مينځګړو وروسته له هغې د خبرو نه بايکاټ کړی چې حماس د يرغماليانو د پوره فهرست ورکولو نه انکار کړی چې ‏هغوی تراوسه ژوندي دي.‏

د بايډن انتظاميه د روژې په پيل کېدو سره د جنګ بندۍ هيلي لري. له دې وړاندې د نومبر په میاشت کې عارضي جنګ بندی شوې وه خو اوس هم د ‏‎100‎‏ ‏يرغماليانو په ولکه کې دي.‏

اسرايل د حماس د بلې خطرې د ګواښ ختمولو عزم څرګند کړی، څنګه چې په اووم اکتوبر حماس په اسرايل حمله کړې ‏‎1200‎‏ کسان یې وژلي، او بيا د ‏اسرايل په ځوابي عملياتو کې، د غزې د صحت د وزارت ترمخه په غزه کې د ‏‎30,000‎‏ نه زيات کسان وژل شوي چې ‏‎70‎‏ فيصده یې ښځې او ماشومان دي.‏

‏(د دې خبر معلومات د اې پي، اې اېف پي او رویټرز څخه اخستل شوي).‏

Forum

هېلو وي او اې په ټي وي

هېلو وي او اې په ټي وي
please wait

No media source currently available

0:00 0:59:56 0:00

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:59 0:00

Recommended

XS
SM
MD
LG