د خېبرپښتونخوا د 15 کسيزه کابينې نه پرون د شورو/ چارشنبې په ورځ د صوبې ګورنر غلام علي سوګند اخستی دی او د پاکستان د پنجاب صوبې 18 کسيزه کابينې هم سوګند پورته کړی دی.
د خېبرپښتونخوا کابينې جوړېدو وروسته په ټولنیزو رسنيو ويل شوي، د تحریک انصاف ګوند مشرانو خپل خپلوان په کابينه کې شامل کړي دي.
د خېبرپښتونخوا په کابينه کې ارشد ايوب، شکيل احمد، فضل حکيم خان، محمد عدنان، عاقب الله، محمد سجاد، مينا خان، فضل شکور او نذير احمد، پختون يار خان، افتاب عالم، خليق الرحمان، سيد قاسم علي شاه، فېصل ترکی او ظاهرشاه سوګند پورته کړی دی.
د ځايي مطبوعاتو ترمخه، سيد فخر جهان، مزمل اسمل، محمدعلي سېف، مشال اعظم او زاهد چاند زېب به د وزیراعلا سلاکاران وي.
د رپوټونو ترمخه، ویل شوي په لومړي پړاو کې به د کابينې غړي 20 وي او نوو سوګند پورته کوونکو ته به په ورځ دوه کې وزارتونه وسپارل شي.
په ټولنيزو رسنيو ويل شوي، د خېبرپښتونخوا په کابينه کې د تحریک انصاف ګوند سره تعلق لرونکو د قامي اسمبلۍ غړو وروڼه او خپلوان شامل کړل شوي دي.
جرنلسټ محمد فهيم په اېکس (پخواني ټویټر) ويلي،
"د خېبرپښتونخوا په کابينه کې د اسدقېصر ورور عاقب الله ته وزارت، د شهرام ترکی ورور فېصل ترکي ته وزارت، د عمر ايوب د تره زوی ارشد ايوب ته وزارت، د نورالحق قادري وراره عدنان قادري ته وزارت ورکړل شوی او د شېر افضل مروت ورور خالد لطيف مرستيال يا معاون مقرر کړل شوی دی".
د خېبرپښتونخوا کابينه وروسته له هغې جوړه شوې چې له دغې يوه ورځ وړاندې د صوبې وزيراعلا علي امين ګنډاپور په راولپنډۍ کې په اډياله زندان کې د تحريک انصاف ګوند د مشر او پخواني وزيراعظم عمران خان سره ليدلي وو.
په خېبرپښتونخوا کې د پاکستان تحريک انصاف ګوند حمایت يافته ازادو غړو د اتمې فرورۍ په عامو انتخاباتو کې زياتې څوکۍ ګټلې او بيا په سني اتحاد کونسل کې شامل شوي وو.
تېره اوونۍ د سني اتحاد کونسل د سيوري لاندې علي امين ګنډاپور د خېبرپښتونخوا صوبې وزيراعلا ټاکل شوی وو.
په پنجاب صوبه کې هم ګورنر بليغ الرحمان د 18 کسيزه کابينې نه سوګند اخستی دی.
د پنجاب صوبې وزيراعلا مريم نواز د کابينې غړو ته مبارکي ويلې او زياته کړې یې ده، په کابينه کې ځوانان او پوهه خلک شامل کړي دي.
Forum