د خېبرپښتونخوا صوبې وزيراعلی علي امين ګنډاپور ويلي، "د مرکزي حکومت نه به د خپلې صوبې حساب اخلو او که حق را نه کړل شو بيا به د صوبې خلک د مرکزي حکومت خلاف غږ پورته کوي، بيا به مونږ تحریک چلوو".
په خېبرپښتونخوا کې د پاکستان تحریک انصاف او مرکز کې د پاکستان مسلم ليګ او اتحاديانو ګډ حکومت دی.
ګنډا پور د جمعې په ورځ په خبري غونډه کې مرکزي حکومت ته په مخاطب کولو سره ویلي، "زمونږ د صوبې بقايات دې واپس کړي ځکه خپلو خلکو ته حق ورکول غواړو".
نوموړي زياته کړې، ټولو ته معلومه ده چې پښتونخوا ارزانه بجلي جوړوي پاکستان او مرکز ته ورکوي خو بيرته یې په ګرانه بيعه ورکوي او دغه شان کار د ګېس هم دی.
هغه ويلي، که مرکزي حکومت دغه سلسله جاري ساتي نو دا ناانصافي ده. د وزيراعلا په خبره، د خپلو حقونو دپاره مرکز ته وارننګ يا خبرداری ورکوي "په دهمکۍ او وارننګ کې فرق وي".
ښاغلي ګنډاپور ويلي، "دا وخت د بجلۍ د محکمې د 450 اربه روپو نه زياته خساره ده، په دې کې د بجلۍ د غلا په مد کې 110 اربه روپۍ زمونږ د صوبې ده. د نورې خسارې زمه وار نظام دی، نظام ولې نه سمول کيږي؟ چې د کال خساره 120اربه روپو ته رسي".
ګنډاپور ویلي، په مرکز مو 1510 اربه روپۍ پاتې دي هغه مرکز ته ورکول وي، "يو خو زه دا واضحه کوم چې زما ولس ته دې غله ونه ويل شي، زما ولس مجبوره دی، په صوبه کې د قبايلي سيمو ورګډېدو، حالاتو، امنيت، روزګار او روانو حالاتو له امله مجبوره دی، د بجلۍ غلا واپډا کوي".
هغه ويلي،"که صوبې ته یې حق ور نه کړل شو، نو بيا په داسې قدم اوچتولو مجبوره وي چې بيا ورته غدار ونه ویل شي، زما 1510 واجب الادا به راکوئ 110 روپۍ ترې کټ کړئ ".
علي امين ګنډاپور ویلي، د صوبې ولس یې لوډشيډنګ او ظلم نه شي برداشت کولی.
هغه زياته کړې، د خپلې صوبې حق غواړي خېرات نه غواړي که مرکز یې حکومت وانه ورېده، بيا به د صوبې ولس د بجلۍ او ګېس دپاره، تحریک چلوي.
مرکزي حکومت د علي امين ګنډاپور څرګندونو ته په سمدستي ډول غبرګون نه دی ويلی.
Forum