شانګله: غره نه د جیپ غورځېدو پېښه کې د یوې کورنۍ اته کسان مړه شوي

مرستندویه سرچینې وایي د خېبر پښتونخوا په شانګله سیمه کې یو جیپ ژور ګړنګ ته لوییدلي چې په کې لږ تر لږه اته کسان وژل شوي اؤ دوه نور ژوبل شوي دي.

د سیمې نه مرستندویه سرچینو وي او ای ډیوه ته ویلي دا پېښه د ګل یا دوشنبې په ورځ د شانګلې په الپورۍ سیمه کې رامنځته شوې ده.

د سرچینو په وینا دغلته د بېلې بابا نه پاګوړۍ سیمې ته روان یو جیپ په پیچومي کې له ډرایور بې قابو شو اؤ یوې ژورې کندې ته وغورځېدو.

سرچینې وایي د پېښې نه وروسته ځایي خلکو اؤ د دولتي مرستندویه ادارې فعالینو په پېښه کې د مړو شوؤ اتوؤ کسانو مړي اؤ دوه زخمیان راویستي اؤ ضلعي روغتون ته یې رسولي دي.

سرچیني وایي دې پېښه کې مړه شوي اته واړه کسان د یوې کورنۍ دي اؤ ښځې اؤ ماشومان هم پکې شامل دي.

سیمه ییزو پولیسو ویلي دي چې د سید الوهاب په نوم د یو تن د کورنۍ غړي په دې پېښه کې مړه شوي دي .

تېره اوونۍ هم د خېبر پښتونخوا په غرییزه سیمه ایبټ اباد کې یو جیپ ژور ګړنګ ته لوییدلي ؤ چې په دغه پېښه کې د یوې کورنۍ 6 کسان مړه شوي اؤ 4 نور ژوبل شوي وؤ.

همدا راز د مئ په 17مه نېټه د ایبټ اباد سره پیوست د خېبر پښتونخوا په مانسهره سیمه کې د ګاډي په یوه حادثه کې یوه مېرمن مړه شوې اؤ 7 تنه نور ژوبل شوي وؤ.

د دغه پېښې په سبا یعنې 18مئ د خېبر پښتونخوا د بنو نه پنجاب ته د روانې یوې کورنۍ ګاډی په خوشاب سیمه کې ژورې کندې ته لوېدلی ؤ چې پکې لږه تر لږه 13 کسان مړه شوي اؤ9 نور ژوبل شوي وؤ.

په پاکستان اؤ په ځانګړي ډول د پښتونخوا په غرییزو سیمو کې اکثره دغسې پېښې مخې ته راځي چې څېړونکي یې علتونه د سړکونو خراب حالت، د ګاډو زوړوالی، د ډرایورانو د نشې اؤ بې خوبۍ حالت اؤ یا هم د تجربې نه لرل بولي.