له کراچۍ څخه کوټې ته روان د مسافرو یو بس د وایارو اوتهل سره نزدې د تیل وړونکي موټر سایکل سره ټکر شوی چې له امله یې په دغه بس اور لګیدلی اؤ درې کسان پکې مړه شوي اؤ اووه نور ژوبل شوي دي.
د پېښې سره سم پولیس اؤ مرستندویه فعالین د پېښې ځای ته رسیدلي اؤ په پېښه کې د مړو شوؤ کسانو جسدونه اؤ ژوبل کسان یې د لسبیلې ضلعي روغتون ته رسولي دي.
د نصرت بس شرکت یا کمپنۍ یو مامور وي او ای ډیوه ته ویلي چې دغه بس تېر ماسخوتن اته بجې له کراچۍ کوټې ته روان شوی ؤ اؤ ٢٨ مسافر پکې سواره وؤ.
چارواکي اؤ مرستندویه فعالینو ډیوه ته ویلي چې په بس د اور لګیدو وروسته ګڼ شمیر مسافر په دغه بس کې بند پاتې شوي وؤ خو هغوي په شیشو له بسه دانګلي اؤ خپل ځان یې ژغورلی دی.
د عیني شاهدانو په وینا په کوم سړک چې بس د حادثې سره مخ شوی په دغه سړک اکثره قاچاقبران ایراني تیل په موټر سایکلو قاچاق کوي اؤ دغه بس هم د یو داسې موټر سایکل سره ټکر شوی چې تیل پرې بار وؤ اؤ له هغې وروسته په بس اور لګیدلی دی.
د لسبیلې ډپټي کمشنرې حمیرا بلوچ رسنیو ته ویلي چې د پېښې د خبر رسیدو سره سم مرستندویه ډلې سیمې ته لیږل شوي اؤ د ضلعي روغتون عمله چمتو کړل شوې ده.
هغې ویلي چې پېښه کې ورته د مرګ ژوبلې اطلاع ترلاسه شوې ده خو لا کره شمیره یې نه ده معلومه اؤ چې کله امدادي فعالیتونه سرته ورسي نو د اوښتې مرګ ژوبلې په اړه کره شمیرې به له خلکو سره شریکې کړي.
Forum