امریکې د زيارت/ پنجشنبې په ورځ د اسرايل نه غوښتي، په غزه کې د ملګرو ملتونو په سکول د حملې په اړه روڼتيا وکړي چې ايا په دغه حمله کې ماشومان وژل شوي دي.
د امریکې د بهرنيو چارو وزارت وياند مېتهيو ميلر د زيارت په ورځ خبري غونډه کې ويلي، د اسرايل حکومت ويلي د دغه حملې په اړه به نور معلومات خپروي چې پکې به په حمله کې د وژل شوو نومونه هم شامل وي.
نوموړي د اسرايل په حواله ويلي، "مونږ تمه لرو چې دغه معلومات به راڼه وي".
د اسرايل پوځ ويلي، جنګي الوتکو یې په سکول بريد کړی او په سمدستي ډول یې د کومو ثبوتونو ورکولو بغېر دعوه کړې چې حماس او اسلامي جهاد ډلو دغه سکول د خپلو کارروايانو دپاره د پناه په توګه کارولو.
مېتهيو ميلر ویلي، امریکا د اسرايل په هغه جاج يقين لري چې حماس په ځينو وختونو کې د عامو خلکو په ودانيو کې پټ شوي، خو زياته کړې یې ده، د تازه حملې په اړه د نورو معلوماتو انتظار کوي.
هغه ويلي، "مونږ دغه دعوې ګورو چې په ياده حمله کې 14 ماشومان وژل شوي دي، که دا خبره سمه وي چې 14 ماشومان وژل شوي نو يقيني دوی به ترهګر نه وو".
ويل شوي د اسرايل د حملې وروسته په ديرالبلاح کې الاقصا روغتون ته د 30 فلسطينيانو مړي راوړل شوي وو.
اسرایل د زيارت په ورځ منځنۍ غزه کې د فلسطيني پناه غوښتونکو دپاره کارېدونکي يو سکول باندې حمله کړې وه.
ځايي چارواکو په حمله کې د پينځو ماشومانو په ګډون لږ تر لږه د 30 کسانو د وژلو خبر ورکړی وو، خو وروسته دغه شمېره د 37 پورې ياده کړل شوې وه.
د ملګرو ملتونو ترمخه، په غزه کې د جګړې د پيل راهسې یې د انتظام لاندې سکولونه د پناه غوښتونکو دپاره کاريږي.
ویل شوي، اسرايل چې کوم سکول په نخښه کړی، د ملګرو ملتونو د فلسطيني کډوالو ادارې (يو اېن ار ډبليو) د انتظام لاندې وو او دغلته د غزې د جګړې څخه اغېزمنو پناه اخستې وه.
د پناه غوښتونکو په سکول دغه حمله په داسې وخت کې شوې چې د امریکې لوړ پوړي چارواکي په منځني ختيځ کې موجود دي او په درېو پړاوونو کې د جنګ بندۍ د پلان په پرمختګ کار کوي.
( د دې خبر معلومات د اې اېف پي څخه اخستل شوي)
Forum