امریکا د منځني ختیځ له خبرو سره په غزه کې اوربند ته کار کوي، امنیت شورا کې یې مسوده ووټ ته وړاندې کړې

واشنګټن – امریکا د ملګروملتونو امنیت شورا ته په خپلې هغې وړاندې کړې مسودې باندې د رایه ورکولو غږ کړی په کومه کې چې له حماس څخه غوښتل شوي چې وړاندې شوی اوربند ومني.

په ورته وخت کې د امریکا د بهرنیو چارو وزیر انټني بلېنکن د مصر له ولسمشر عبدالفتاح السیسي سره په قاهره کې خبرې کوي او وروسته بیا اسرایلو ته ځي چې د اسرایلو له وزیر اعظم بین یمین نتن یاهو او د دفاع له وزیر یاو ګېلانټ سره وویني.

دغه لوړ پوړی امریکايي ډپلوماټ به همدارنګه قطر او اردن ته ولاړ شي چېرې چې به هغه غزې لپاره د بشري مرستو په کانفرانس کې ګډون وکړي.

امریکايي چارواکو ویلي، اسرایل به د اوربند هغه وړاندیز ومني، په کوم کې چې په جګړه کې لومړنۍ وقفه او د دواړو خواو نه د بندیانو خوشې کېدل او غزې ته د بشري مرستو زیاتېدل شامل دي.

دغه ډول اسرایلي ځواکونه به د غزې له ګڼ مېشتو سیمو څخه وځي او د فلسطین ملکيان به بېرته خپلو کورونو او ځایونو ته ستنېږي.

غزې ته د هوا له لیارې د مرستو رسول بیا پيل شوي

د امریکا پوځ د اتوار یا یکشنبې په ورځ د هوا له لیارې د غزې پټۍ شمالي برخو ته مرستې رسولي.

د امریکا پوځ تر دې مخکې په مې میاشت کې د مرستو دغه ډول رسول بند کړي وو او دلیل یې ستوزمن موسمي حالات بلل شوي وو.

د هوا له لیارې د مرستو رسول وروسته له هاغې پیل شوي چې د امریکا پوځ خبر وکړ چې د غزې په ساحلي برخه کې یې د موقتي بندري لارې بیا جوړېدل بشپړ کړي.

دغه لاره دوه اونۍ مخکې پرې شوې وه.

د اسرایلو او حماس جګړه وروسته له هاغې پيل شوه کله چې حماس د اکټوبر په اوومه نېټه په اسرایلو باندې برید وکړ، ۱۲۰۰ کسان یې ووژل او ۲۵۰ یې له ځانه سر وتښتول.

د دې په غبرګون کې اسرایلو په غزه باندې هوايي او ځمکني عملیات پیل کړل چې د غزې د روغتیا وزارت د معلوماتو له مخې تر اوسه پورې پکې ۳۷۰۰۰ فلسطینیان وژل شوي‌ دي چې اکثره یې ښځې او ماشومان دي.

د دې راپور ځینې برخې له اسوسیټېډ پریس،‌ فرانس پریس او رویټرز خبري ادارو څخه اخیستل شوي دي.