لاس رسیدونکی لینک

تازه خبر

پاکستان

طالبان د ډبلیو اېچ او دا شمېرې ردوي چې په افغانستان کې د پولیو نهه کېسونه رپورټ شوي دي

د جي پی اي ای (GPEI) معلوماتو له مخه د نهې/  سه شنبې تر ورځې پورې په ټوله نړۍ کې د پولیو کېسونو شمېر 17 دی چې نهه په افغانستان او اته په پاکستان کې دي.
د جي پی اي ای (GPEI) معلوماتو له مخه د نهې/  سه شنبې تر ورځې پورې په ټوله نړۍ کې د پولیو کېسونو شمېر 17 دی چې نهه په افغانستان او اته په پاکستان کې دي.

د طالبانو حکومت د روغتیا وزارت ویاند ویلي په افغانستان کې تر اوسه په 2024 کال کې د پولیو یا ګوزڼ کومه پېښه یا کېس نه ده ثبت شوې خو د صحت نړیوالې ادارې «‌ډبلیو اېچ او» لخوا د نهو پېښو د ثبت کېدو رپوټونه دغه دعوې غلطې ثابتوي.

د طالبانو د حکومت د عامه روغتیا وزارت ویاند شرافت زمان د ګل/دوشنبې په ورځ د پولیو د وېکسین د څلور ورځني کيمپېن څخه مخکې په یوه ویډیو پېغام کې وویل چې سږ کال موږ په ټول هېواد کې د پولیو یوه مثبته پېښه نه ده ثبت شوې.

خو د ‌ډبلیو اېچ او په مشرۍ د پولیو د ختمون جي پی اي ای پروګرام ویلي چې دوی په 2024 کال کې تر اوسه په افغانستان کې د پولیو نهه پیښې ثبت کړي چې درې پیښې روانه اونۍ په جنوبي قندهار ولایت څخه رپورټ شوي دي.

د ډبلیو اېچ او د ختیځ بحیره روم سیمه چې افغانستان او پاکستان پکې شامل دي د پولیو پروګرام ‌ډایریکټر حامد جعفري وي او اې ته وویل: د افغانستان د عامې روغتیا وزارت د اې اېچ ار (نړیوال روغتیا مقرراتو) پروټوکولونو سره سم د پولیو وایرس ټول کېسونو معلومات ډبلیو اېچ او ته ورکړي دي. په 2023 کال کې یې شپږ کیسونه ثبت کړي وو.

شرافت زمان د نهې/سه شنبې په ورځ وي او اې ته په لیکلي پېغام کې دا خبره تکرار کړه چې : "تر اوسه" سږکال په افغانستان کې د پولیو هېڅ پیښه نه ده ثبت شوې سره له دې چې ډبلیو اېچ او لخوا نهه پیښو رپورټ ورکړل شوی دی .

افغانستان او پاکستان په نړۍ کې یواځیني هېوادونه دي چې پولیو وایرس لا هم پکې شتون لري.

دا ناروغي چې په تیزی سره د یو تن نه بل تن لږي او په ورکوټي ماشومانو اغیز کوي او په سختو حالتونو کې دوی شل/مفلوج کولی شي یا په ځېني حالاتو کې وژونکي هم کېدی شي.

د طالبانو د عامې روغتیا وزارت ویاند په خپل ویډیو بیان کې ویلي چې د پولیو وېکسین په روان کيمپېن به د افغانستان له 34 ولایتونو څخه په 23 ولایتونو کې شاوخوا اته میلینه له پنځو کلونو کم عمره ماشومانو ته د پوليو ضد قطرې یا وېکسین ورکول کېږي.

د ډبلیو اېچ او جعفري وویل چې افغانستان د اې اېچ ار (نړیوال روغتیا مقرراتو) سپارښتنو باندې عمل کولو کې مثبت ریکارډ لري.

د روغتیا نړیوال سازمان خبرداری ورکړی چې له پاکستانه د افغان کډوالو وروستیو ستنېدو د پولې دواړو غاړو ته د پولیو د خپرېدو خطر زیات کړی دی.

په پاکستان کې په 2023م کال کې د پولیو یا ګوزڼ ناروغۍ شپږ کېسونه ریکارډ شوي وو او سږ کال تر اوسه اته کېسونه ثبت شوې دي. د جي پی اي ای (GPEI) معلوماتو له مخه د نهې/ سه شنبې تر ورځې پورې په ټوله نړۍ کې د پولیو کېسونو شمېر 17 دی چې نهه په افغانستان او اته په پاکستان کې دي.

See all News Updates of the Day

د پښتو ستر محسن او په ګرځنده اکېډمۍ مشهور ليکوال همیش خلیل په حق ورسید

Hamesh Khalil
Hamesh Khalil

د پښتو ستر محسن او د ادب پیژندلی نوم محترم همیش خلیل د 94 کالو په عمر کې په پېښور کې په حق رسېدلی او نن د شپې یوولس بجې به د پېښور د بر تاکال په غریب اباد سيمه کې د جنازې وروسته خاورو ته سپارل کیږي.

هميش خليل په کال 1930 کښې د اپريل په يوولسمه نيټه د پېښور په برتاکال سيمه کښې د انځر ګل په کور کښې سترګې پرانستې وې. په خټه د پښتنو د مشهورې قبيلې مومندو مرزاخيل وو. د پېښور اسلامیه کالجيټ سکول نه یې لسم او د اسلامیه کالج نه یې دولسم کړی وو. او نورې زده کړې یې په شخصي / پراېوېټ توګه ترسره کړې وې.

د هميش خليل ادبي خدماتو ته په کتلو سره گڼ خلک هغۀ ته د يوې گرځنده اکيډمۍ نوم هم ورکوي.
د هميش خليل چاپى مواد د هغه مضامينو مقدمو او اخبارى کالمونو شمير د سلګونو نه هم اوړى کوم چې په مختلفو ورځپاڼو او مجلو کښې چاپ شويدى خو په باقاعده توګه د چاپ شوو کتابونو لنډ تفصیل یې څه په دې ډول دی.

تحقيق وترتيب ديوان بيدل 1957 ، ديوان معزالله خان مومند 1958، ديوان اشرف خان هجرى 1958 ، ديوان سعيد 1958، ديوان حسين 1958 ، ديوان مرزا خان انصارى 1959 ، ديوان قنبر على خان 1960 ، ديوان کاظم خان شيدا 1965 ، ديوان عبدالقادر خان خټک1967 ، ديوان رحمت دا وى 1980 ، قصه شاه وګدا1957 ، ديوان فدا 1957 ، دغرۀ ګلونه 1957 ، کاکاجى صنوبر حسين ، 1991 خمخانه يثرب1986، دفکرونو ډيوې 1993 ، بازنامه (افضل خان خټکِ)1994 ، ديوان اشرف خان هجرى (فارسى) 1994 ، خوشحاليات اخلاقنامه1981 ، فراق نامه1983 ، طب نامه 1984 ، بازنامه 1985 ، سوات نامه1986 ، نام حق1994 ، تاليفات داباسين چپې 1957 ،‌ پښتانۀ ليکوال1958 ، ورکه خزانه (اول ټوک)1960، ورکه خزانه (دويم ټوک)1960،‌ نصرالله خان نصر1966 ، محمد ګل خان مومند1995 ،‌ تصنيفات نغمه زار1948 ، زما سندرې1973 ،‌خاپونه او خيالونه1993 ، چارګل1973 ، پنجابىژبه او ادب1982 ، قامىترانې1965 ، بازګشت تنقيد او تحقيق ، تول پارسنګ 1993 ،‌ حقيقت دا دی 1998 ،‌ ماشومانو دپاره دوه شپانۀ 1959 ،‌ ګوارچى1959 ، دنيکۍ بدله1959 ، خدائې روزى رسان دی1959 ، مومن خان شيرنۍ1959 ، ادم خان درخانۍ 1959 ، لوبې1982 ، حضرت عثمان ذوالنورين(رض)1995 ، دقلم خاوندان 9199.

د دې ترڅنگ د هميش خليل په ادبي خدماتو هم گڼ شمير کتابونه ليکل شوي.


په سوشل ميډيا بيلابيلو پښتنو ليکوالان او مدني فعالانو د هميش خليل مړينه يو ستر زيان بللی او د پښتو او پښتنو د پاره يې د هغه خدمات په زرينو ټکو کې ستايلي دي.

وي او ای ډیوه د همیش خلیل په ژوند او ادبي خدماتو څو کاله وړاندې یوه ځانګړې خپرونه کړې وه چې د نورو میلمنو تر څنګ پکې خداې بخښلي همیش خلیل پخپله هم مېلمه وه. دغه خپرونه په لاندیني لنک اوریدلی شئ.

د همیش خلیل د ژوند قيصه د همیش خلیل په ژبه

د چمن پرلت کمېټۍ ویلي حکومت یې غوښتنې منلي او د پرلت ختمولو اعلان یې کړی

د پاکستان بلوچستان ایالت سرحدي ښارګوټي چمن کې د تیرو لسو میاشتو راهسې روان پرلت کمېټۍ غړو ویلي، د منځګړو په مرسته د حکومت سره روانې خبرې اترې یې کامیبې شوي د حکومت لخوا نیول شوي ټول مشران یې خوشي شوي او حکومت یې د غوښتنو منلو ژمنه کړې.

د پاکستان مرکزي حکومت او د بلوچستان ایالتي حکومت تر اوسه د پرلت د مشرانو د دغه دعوو په اړه څه نه دي ویلي.

د یاد پرلت د کمېټۍ غړو دعوه کړې د نورو غوښتنو تر څنګ یې حکومت د پخوا په شان په شناختي کارډ او افغان تذکره د سرحدي سیمو خلکو ته د تګ راتګ د اجازې تر څنګ نور غوښتنې هم منلي.

د پرلت کميټۍ ځايي مشر فيض محمد دعوه کړې د یوې اونې راهسې د حکومتي چارواکو سره روانۍ خبرې اترې تېره شپه کامیابۍ شوي او د پرلت په غوښتنه یې پینځه نیول شوي مشران د بند نه خلاص کړل شوي.‌

نوموړي ‌ویلي، ٫٫ زمونږ ټولې غوښتنې منل شوي، زمونږ بندي وروڼه/ ملګري هغه راخوشي شوي او زمونږ مظلوم اولس چې شاه خوا لس مياشتې کوم ﺯياﺭ ايستلې د هغه ثمر وﺭته ميلاو شو. زمونږ خلک به پر شناخت کاﺭډ او تذکيره باندي پر چمن دﺭواﺯه تګ او ﺭاتګ کوي او حکومت ﺯمونږ غوښتنې منلي.٬٬

تر اوسه د بلوچستان ایالتي حکومت په دې اړه څه نه دي ویلي او وي او اې ډېوه د بلوچستان داخله وﺯير مير ضيا لانګو سره په دې اړه تماس نیولی او د حکومت دریځ معلومولو هڅې یې کړي. خو داخله وزیر تر اوسه کوم ځواب نه دی ویلی.

د بلوچستان د حکومت وياند شاهد ﺭند هم په دې اړه د وي او ای ډیوه پوښتنو ته تر اوسه کوم ځواب نه دی ویلی.

په افغانستان کې د افغان طالبانو حکومت د سپين بولدک د پولیسو د ادارې څخه جاﺭي شوي یو خبر کې بیا ویل شوي چې د پرلت د مشرانو په دغه بیانونو او په ټولنیزو رسنیو خپرو شوو ادعاوو په اساس دې څوک د چمن دروازې په لوري تګ راتګ کولو نه ډډه وکړي تر څو چې حکومت په دغې اړه کوم رسمي بیان نه وي ورکړی.

پرلت ته د وینا په وخت د پرلت کمېټۍ او د حکومت تر منځه د خبرو اترو یو منځګړي او پخواني ایالتي وزیر ملک عنایت کاسي بیا ویلي چې د پرلت مشران راخوشي کول او د حکومت لخوا یې غوښتنې منل لویه بریا ده.

ملک عنایت کاسي ویلي، ٫٫ لومړی چانس به د لغړیانو وي د دغې وروسته به د چمن او باډر په اړه ستاسو تګ راتګ په شناختي کارډ او تذګره وي.٬٬

د ملک عنایت وروسته د جون په میاشت کې په چمن کې نیول شوي د پرلت پېنځو مشرانو کې غوث الله او عبدالصادق اڅکزي هم پرلت ته ویناوې وکړې او د حکومت او پرلت د کمېټۍ تر منځه د ګټه ورو خبرو اترو پخلی یې کړی. دغو دواړه ویلي چې د نهه میاشتو پرلت او احتجاج رنګ راوړی او دوي په خپل مقصد کې کامیاب شوي. د یادو وینا ګانو وروسته د پرلت خېمې او کنټېنرې پورته کړې شوي او د پرلت کمېټۍ لخوا په رسمي توګه د پرلت ختمولو اعلان شوی.

پاکستان فرینکفرټ کې پخپله کونسلګرۍ شوی برید غندلی، جرمني نه یې د پلټنو اؤ د ککړو کسانو د نیولو غوښتنه کړې

پاکستان د جرمني فرینکفرټ ښار کې پخپله کونسلګرۍ شوی برید په سختو ټکو غندلی اؤ د جرمني حکومت نه یې غوښتنه کړې ده چې باید د ویانا کنونشنونو په اساس خپلې ذمه وارۍ سرته ورسوي.

د اتوار په ورځ په سوشل میډیا داسې ویډیوګانې وایرل شوي چې پکې لیدل کیږي ګڼ شمیر کسان چې د افغانستان بېرغونه یې په لاسونو کې نیولي په فرنکفرټ کې د پاکستان د کونسلګرۍ ودانۍ ته ورننوځي اؤ ددغه هیواد ملي بیرغ د کونسلګرۍ څخه راکوزوي اؤ د پښو لاندې یې راکاږي.

پاکستاني رسنیو دعوه کړې ده چې د پاکستان په کونسلګرۍ دا برید جرمني کې میشت افغانانو کړی دی خو د جرمني چارواکو لا په دې اړه څه نه دي ویلي.

د ډان نیوز له مخې د جرمني چارواکو ددې ویډیوګانو له وایرل کیدو سمدستي وروسته کارروایي کړې اؤ ګڼ کسان یې نیولي چې پلټنې ترې روانې دي.

د پاکستان د خارجه دفتر ویاندې ممتاز زهره بلوڅ پخپل یو بیان کې ددې پېښې په سختو ټکو غندنه کړې اؤ ویلي یې دي چې فرینکفرټ کې د پاکستان د کونسلکرۍ امنیت په خطره کې اچول شوی د قونسلګرۍ د مامورینو ژوند ته ګواښونه راولاړ شوي دي.

ویاندې ویلي چې د ډپلوماټانو امنیت باوري جوړول د کوربه هیواد ذمه واري ده اؤ باید د جرمني حکومت د ویانان کنونشنونو په اساس خپلې ذمه وارۍ پوره کړي اؤ په پېښه کې ککړ کسان دې په سمدستي توګه ونیسي.

د پاکستان سفارتي چارواکو په دې پېښه د جرمني د بهرنیو چارو وزارت ته احتجاج کړی اؤ د پېښې د پلټنو غوښتنه یې کړې ده.

د ډان نیوز د رپورټ له مخې د جرمني چارواکو د پاکستان سفارتي چارواکو ته باور ورکړی چې د پېښې بشپړه پلټنې به کوي.

په جرمني کې د پاکستان د سفارتخانې له لوري خپور شوي یو بیان کې هم دغه پېښه په سختو ټکو کې غندل شوې اؤ ویل شوي چې د پاکستان سفارتخانه د پېښې په اړوند د جرمني چارواکو سره په تماس کې ده.

د سفارت خانې بیان کې ویل شوي دا خبره به باوري کولی شي چې داسې وضعیت باید بیا رامخې ته نه شي.

بیان کې ویل شوي چې شرخوښي به د قانوني نتیجو سره مخ کیږي اؤ جرمني کې په میشت پاکستانیانو غږ شوی چې د صبر اؤ زغم نه کار واخلي.

پېښور: په پولیس څوکۍ د وسله والو برید کې یو پولیس وژل شوی

File Photo
File Photo

پېښور کې نامعلومه وسله والو د پولیسو په یوه څوکۍ برید کړی چې پکې یو پولیس عسکر وژل شوی دی.

پولیس وایي دا پېښه د خالي اؤ اتوار په منځ شپه کې د پېښور په کلیواله سیمه ارمړ کې رامنځته شوې ده.

د پېښور پولیسو د بیان له مخې دغلته د شپې په مهال وسله والو په شیشناک ټوپک په څوکۍ ډزې کړي چې د سعید خان په نوم پولیس عسکر پکې وژل شوی دی.

د وژل شوي پولیس جنازه د اتوار په ورځ د پېښور په پولیس لاین کې ادا شوې ده چې پکې لوړ پوړو پولیس چارواکو برخه اخستې.

د خېبر پښتونخوا ګورنر ښاغلي فیصل کریم کنډي پخپل یو بیان کې په دې پېښه د غم اؤ خفګان څرګندونه کړې اؤ ویلي یې دي چې د ترهګرۍ په ضد جګړه کې د امنیتي ځواکونو لخوا ورکړل کیدونکو قربانیو باندې ټول قام ویاړ کوي.

ګورنر د وژل شوي پولیس عسکر د کورنۍ سره خواخوږي ښودلې اؤ د هغې د بخښې دعا يې کړې ده.

په دې وروستیو کې په خېبر پښتونخوا اؤ بلوچستان صوبو کې د ترهګریزو بریدونو لړۍ یو وارې بیا چټک شوې اؤ د پاکستان انسټي ټیوټ فار پیس سټډیز نومې تهنک ټینک د رپورټ له مخې یوازې د جون په میاشت کې په پاکستان کې ۲۷ ترهګریز بریدونه شوي دي.

په دې بریدونو کې ۲۱ په خېبر پښتونخوا اؤ شپږ په بلوچستان کې ریکارډ کړل شوي دي.تر دې وړاندې په مې میاشت کې د شوؤ ترهګریزو بریدونو شمیره ۳۶ ښودل شوې وه.

د خېبر پښتونخوا د ترهګرۍ ضد محکمې(سي ټي ډي) شمېرې ښیي د روان کال په اوږدو کې په پښتونخوا صوبه کې تر اوسه په امنیتي ځواکونو 284 ترهګریز بریدونه شوي اؤ په دې حملو کې 118 پولیس عسکر اؤ افسران وژل شوي دي.

د بنو پېښه:حکومت ویلي ډزې لاریون کې شاملو وسله والو کړي خو عمران بیا وایي ډزې نیغ په نیغه پوځ کړي

د پاکستان حکومت په وړومبي ځل د بنو په پېښه خپل نظر ښکاره کړی اؤ وایي د امن لاریون په موقعه ډزې په لاریون کې شاملو وسله والو کړي چې یو تن پکې وژل شوی اؤ ۲۲ نور ژوبل شوي دي.

خو د پاکستان پخواني وزیراعظم اؤ د تحریک انصاف ګوند باني عمران خان بنو کې د امن مارچ په برخه والو د شوؤ ډزو تور په پوځ لګولی اؤ ویلي یې دي پوځيانو نیغ په نیغه په پرامنه مظاهره چیانو ډزې کړي.

عمران خان د خېبر پښتونخوا په وزیراعلا غږ کړی دی چې د بنو په پېښه سخت دریځ خپل کړي.

اوړمه ورځ بنو کې د امن د ټینګښت لپاره اؤ د پوځي عملیاتو په ضد راجوړ شوي ولسي لاریون باندې ډزې شوې وې چې ګڼ شمیر کسانو ته پکې مرګ ژوبله اوښتې وه.

د پښتون ژغورنې غورځنګ اؤ مدني ټولنې فعالانو ددغو ډزو تور په پوځ لګولی ؤ خو پوځ لا تر دې مهاله په دې پېښه غلی پاتې دی.

پاکستان کې میډيا په وړومبۍ ورځ په دغه پېښه زیات څه نه وؤ ویلي خو د پېښې په سبا د خالي په ماسخوتن د اطلاعاتو مرکزي وزیر عطا تارړ د پاکستان جیو ټي وي سره خبرو کې ددې پېښې تور په سیاسي ګوندونو پورې کړو اؤ وي ویل د بنو امن لاریون ځينو قونونو د سیاست ښکار کړو.

هغه وویل په ۱۵م جولایي بنو چاوڼۍ کې د ترهګرۍ پېښه شوه چې یو پوځي پکې خپل ژوند د لاسه ورکړو اؤ په زرګونو خلک یې وژغورل .

د اطلاعاتو وزیر وویل تاجرانو غوښتل بنو کې د ترهګرۍ په ضد احتجاج کولو لپاره اجازه واخلي خو سیاسي قوتونو د امن مارچ خرابولو هڅه وکړه اؤ سیاسي عناصر د بنو د چاودنې ځای ته ورغلل اؤ هلته یې د احتجاج کولو کوشش وکړو.

د اطلاعاتو وزیر وویل په امن مارچ کې ګڼ شمیر وسله وال شامل وؤ چې هغوي د پوځي چاوڼۍ سره ډزې کړي اؤ په دغو ډزو کې یو تن وژل شوی اؤ ۲۲ نور ژوبل شوي دي.

د پښتون ژغورنې غورځنګ مشر منظور پښتین ، پخواني سینیټر مشتاق احمد خان اؤ ګڼو نورو سیاسي اؤ مدني فعالانو د لاریون په برخه والو د ډزو پړه نیغ په نیغه په پوځ اچولې خو پښتنو قام پاله ګوندونو بیا په اشاره کې د دې پېښې پړه په پوځ ور اړولې ده .

پخواني وزیراعظم اؤ د تحریک انصاف ګوند باني هم د خالي په ورځ په اډیاله زندان کې خبریالانو سره خبرو کې د بنو د پېښې پړه په پوځ ور واړوله اؤ وي ویل پوځ نیغ په نیغه په پرامنه لاریون کوونکو ډزې کړې دي.

هغه وویل د بنو د پېښې سخته غندنه اؤ ددې د قضایي پلټنو غوښتنه کوي.

عمران خان وویل هغه د پښتونخوا وزیراعلا ته هم ویل غواړي چې د بنو په پېښه باید سخت دریځ خپل کړي.

د پښتونخوا وزیراعلا علي امین ګنډا پور تر دې یوه وړاندې د بنو د پېښې د پلټنو لپاره د کمیشن جوړولو اعلان کړی ؤ اؤ ویلي یې وؤ چې د تحقیقاتو نه وروسته د پېښې د ذمه وارانو خلاف به سخته قانوني کارروایي کولی شي.

د اطلاعاتو مرکزي وزیر وویل د تحریک انصاف باني ته پکار وه چې د ترهګرۍ غندنه یې کړې وه خو هغه وایي چې نیغ په نیغه ګولۍ چلول شوي .

هغه وویل د بنو په پېښه د دروغو د پروپېګنډې د لارې د قامي ادارو د بدنامولو سازش روان دی.

د نوموړي وینا وه چې دپښتونخوا حکومت د دې پېښې د پلټنو حق نه لري خکه چې ددغه ګوند خلک خو پخپله په لاریون کې شامل وؤ نو څنګه به هغوي دخپلو خلکو په ضد پلټنې وکړل شي.

نور کتل

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:59 0:00
XS
SM
MD
LG