د پاکستان صدر چين ته په سفر روان شوی، څيړونکي دا سفر څومره مهم بولي؟

د پاکستان د بهرنیو چارو وزارت ترمخه صدر آصف علي زرداري به د خپل سفر دوران په بيجنګ کې د چين صدر شي جن پنګ، وزير اعظم لي چيانګ او د نورو چينايي مشرانو سره ويني.

کارپوهان دا دوره د امریکا او چين ترمنځ د تجارتي جنګ او په پاکستان کې د چين پاکستان اقتصادي راهدارۍ منصوبې ته د ورپېښ امنیتي چېلنج په تناظر کې خورا مهمه بولي.

د پاکستان د بهرنیو چارو وزارت ویاند ترمخه صدر آصف علي زرداري به د اعلا چينايي مشرانو سره په ليدنو کې د اقتصادي او تجارتي اړيکو ترڅنګ د ترهګرۍ د مخنیوي او امنيتي همکارۍ، چين پاکستان اقتصادي راهدارۍ او په مستقبل کې د رابطو په حقله اړونده ګامونو او د پاکستان او چين د تعلقاتو مکمل جاج اخستل کیږي.

د پاکستان صدر آصف علي زرداري په داسې وخت کې د چين دوره کوي چې بيجينګ په دې وروستيو کې د پاکستان دننه د سي پېک په پروژو باندې د کار کونکو چينايانو د امنيت په اړه سختې اندېښنې ښودلي دي.

د پاکستان او چين د اړيکو ارزونکي وايي امنيت د سي پېک منصوبې پروړاندې لوی چېلنج دی او پاکستان به چين ته دا پېغام ضرور ورکوي چې د چينايانو امنیت یې لومړۍ ترجيح ده.

د پاکستان او چين د تعلقاتو ماهر اسدالله خان وايي، "د سي پېک دا دوېم پړاو په اصل کې د هغې د عملي کولو پړاو دی، له دې مخکې پړاو یې د تيارۍ پړاو وو، اصل مرحله اوس راغلې ده چې عملي نفاذ به یې کېږي او دې وخت کې ترهګر څه ورانی کوي، نو هغه قابو کول د پاکستان د رياست ذمه وارى ده، ځکه د دې نه علاوه پاکستان سره بله لار نشته".

د برتانيې ورځپاڼې دي ګارډین په دې وروستو کې په يو رپورټ کې ويلي وو، په اسلام اباد کې د چين د سياسي چارو سکرټري وانګ شينګجي د چين پاکستان اقتصادي راهدارۍ، سي پېک پروړاندې د پرتو خطرونو په اړه غېر معمولي سختې نیوکې کړي او د سي پېک د راتلونکي په اړه يې اندېښنې څرګندې کړې وې خو پاکستان او چين دواړو دغه خبر ناسم بللی وو.

تېر کال ستمبر کې په پاکستان کې د ترهګرۍ د مخنیوي ادارې نېکټا ويلي وو، پاکستان کې د کال 2021 راهیسې د ترهګرۍ په 14 حملو کې 20 چينايي وګړي وژل شوي وو.

چين په کال 2014 کې د سي پېک لاندې په پاکستان کې د 60 اربه ډالرو په لګښت د توانايۍ او اډانې په منصوبو کې د چينايي کمپنیو د پانګونو اعلان کړی وو او تېرد دې منصوبې 11 کاله مکمل شوي وو.

د چينايي مطبوعاتو ترمخه د سي پېک منصوبې په لومړي پړاو کې دواړو هېوادونو په ګډه د 25 اربو ډالرو په لګښت 38 منصوبو باندې کار مکمل کړی دی.

د اقتصادي او تجارتي چارو ماهرين چين ته د پاکستان د صدر آصف علي زرداري د سفر وخت مهم بولي او وايي دا دوره په داسې حال کې کېږي چې د چين او امريکا ترمنځ تجارتي جنګ پېل شوې او د سي پېک منصوبه دوېم پړاو ته اوړي.

د اقتصادي او تجارتي چارو کارپوه ډاکټر خالد وليد وايي، "په دې پوهېدل مهم دي چې ايا دا دواړه څيزونه يو بل سره تړلي دي، واقعي دا د يو بل سره تړلي دي، د امريکې لخوا چې په چين کومه ماليه لګېدلې ده نو کتل به وي چې چين څنګه جنوب مشرقي او د سويلي اېشيا په مارکيټ کې ځاې جوړوي، زموږ سره د تېرو وختونو مثالونه ښيي چې کله هم په چينايي صادراتو ټېکسونه لګېدلي نه چين همېشه جنوب مشرقي او سوېلي اېشيا د مارکيټونو مخه کړې ده او اوس به کتل وي چې پاکستان دا موقع څنګه د يو عمل انګيز په توګه اخلي".

د پاکستان د بهرنیو چارو وزارت له لوري ويل شوي چې دواړو خواوې به د نړيوال او سيمه ييز جغرافيايي منظر نامې او په ګڼ اړخيزه فورمونو باندې په دوه اړخیزه همکارۍ هم خبرې کوي.