د چین د دفاع وزارت ویلي چې هیله مند دی هند د خطې د امن او استحکام دپاره لا زیات کوششونه وکړي، نه دا چې برعکس ګامونه اوچت کړي. د چین د دفاع وزارت دا بیان چې د تېر زیارت/پنجشنبې په ورځ یې کړی، د هند د هغو منصوبو په جواب کې و چې غواړي د چین سره پخپل سرحد باندې پرمختللي کروز میزائیلونه ځای پرځای کړي.
د هند پوځي چارواکي وایي د دې پلان هدف، د هغو پوځي رېجمنټونو قوي کول دي چې د چین سره په سرحد کې پراته دي. په دې میزائیلونو کې یو هم براهموس میزائیل دی چې هند او روس په مشترک ډول جوړ کړی او هند کې د پوځي او سېویلین بنیادي ډهانچو د پراخولو منصوبو یوه برخه ده.
چین او هند چې دواړه یې اېټمي طاقتونه دي، د ډېر وخته خپل منځو کې کشیدګۍ لري خو کرار کرار غواړي خپل ترمنځ دا کشیدګۍ هوارې کړي.
د چین او هند مشرانو تېر کال وعده وکړه چې د دغو دوو سترو ایشیایي طاقتونو ترمنځ یوه توده شوې سرحدي لانجه به بېرته سړه کوي. د دې لانجې ریښې د ۱۹۶۲ کال جنګ ته رسیږي چې د هند او چین ترمنځ شوی و او بیا دا لانجه همداسې ناحل شوې پاته شوه.
کله چې د چین د دفاع وزارت له ترجمان وو چیان نه د میزائیلونو د منصوبو په اړه په یو میاشتېني پرېس کنفرانس کې وپوښتل شول، نو هغه وویل چې په سرحدي سیمه کې د امن او استحکام ساتلو باندې دواړو ملکونو اهم اتفاق کړی دی. هغه زیاته کړه: "مونږ هیله مند یو چې هندي اړخ د سرحد په اوږدو او په سیمه کې د امن او استحکام په ګټه لا زیات کار کولی شي، نه دا چې برعکس یې وکړي."
د هیمالیا غرونو په ختیځه برخه کې په څه باندې نیوي زره (۹۰۰۰۰) کلومټره مربع ځمکه باندې چې د هند په اختیار کې ده، چین دعوېداره دی. بل اړخ ته هند وایي چې چین په لویدیځه برخه کې د اکسای چن غرو لمنو کې د هند اته دېرش زره (۳۸۰۰۰) کلومټره مربع ځمکه لاندې کړې ده. هند همدا راز دې ته د شک په سترګه ګوري چې چین څنګه د پاکستان ملاتړ کوي.
د هند وزیراعظم نرېندرا موډي به آینده میاشتې کې چې د جي-۲۰ مشرانو غونډې ته ځي، نو د چین له صدر شي جن پنګ سره هم ملاقات وکړي. رائټرز خبري اداره وایي، داسې یو حکومتي دستاوېز یې لیدلی چې هغه کې د مودي حکومت، د براهموس ائیروسپېس کمپنۍ ته امر کړی چې یو شمېر ملکونو باندې د میزاییلو د خرڅلاو بهیر تېز کړي. د دې ملکونو په لست کې ویټنام اول دی.
مخکې تر دې چې آینده میاشت نریندرا مودي بجینګ ته ولاړ شي، خیال لري چې اول د ویټنام دوره وکړي. ویټنام یو له هغه ملکونو ځیني دی چې د چین سره، د چین د جنوبي بحیرې په سر شخړه کې ګیر دي.
