الجزیره عربی تلویزیون وایی یوې اسلامی ډلي چی ځان د مسلمانانو پوځ بولی ویلی دی چی نن یې په کابل کی د انتخاباتو درې خارجی کارکونکي تښتولي دي . الجزیره وایی چی ددې ډلی مشر اکبر آغا په کابل کی ددغه تلویزیون خبریال ته وویل چی دده جنگیالیو د ملگرو ملتو دغه درې کارکونکي برمته کړی دي . هغه ددوی د خلاصیدو د پاره کومه غوښتنه نه ده کړې . د افغانستان حکومتی منابع او د انتخاباتو مامورین وایی چی دغه درې کسه چی یویې د برتانیې یا آیرلینډ دی بل فیلیپینئ او بل یې د کاسووو دئ د لږ تر لږه پنځو سړیو له خوا چی عسکری جامې یې اغوستی وې د خپل موټر نه را ښکته کړای شول . په دغو درو تنو کی دوې ښځي دي . دوی درې واړه د ملگرو ملتو او افغانستان د هغه گډ هیات یوه برخه وه چی د اکتوبر په نهمه یې په افغانستان کی د جمهوری ریاست انتخابات تنظیم کړی وو
