پولیس وایي د خېبر پښتونخوا په مردان ضلعه کې د سکول یوه استاده خپل ورور د غیرت په نوم وژلې ده.
د مردان د خرکۍ تاڼې د پولیس یو چارواکي (محرر) وي او ای ډیوه ته د خالي- شنبې په ورځ ویلي، دا پېښه نن د شنبې- خالي په ورځ د قاسمي سیمې په تازه ګرام چوک کې شوې ده.
پولیس وایي دغلته د اسامه په نوم یو تن خپله 30 کلنه خور شمایله هغه مهال له ګاډي راکوزه کړې اؤ ډزې یې پرې کړي کله چې هغه د سیمې د جینکو یو سکول ته د ډیوټۍ لپاره روانه وه.
د پولیس د وینا له مخې وژل شوې شمایله د قاسمي د جینکو د منځنیو زده کړو په سرکاري سکول کې استاده وه.
د پولیس وینا ده چې وژل شوې استاذې نهه میاشتې مخکې د یو تن سره په عدالت کې پخپله خوښه واده کړی ؤ اؤ د هغې ورور اسامه په دې واده خفه ؤ.
د پولیس وینا ده چې د وژل شوې استاذې د خاوند په مدعیت کې یې د هغې د ورور اسامه خلاف د قتل مقدمه درج کړې اؤ د وژونکي تن د نیولو لپاره هڅې روانې دي.
په دې وروستیو کې د پاکستان په بیلابیلو سیمو په ځانګړي ډول خېبر پښتونخوا صوبه کې د غېرت په نوم د وژنو کچه لوړه شوې ده اؤ مطبوعات پرله پسې د غېرت په نوم د وژنو رپورټونه خپروي.
د بشري حقونو د څار نړیوال سازمان هیومن رایټس واچ وایي پاکستان کې د اندازې له مخې هر کال د غیرت په نوم نزدې 1000 ښځې وژل کیږي اؤ د ښځو اؤ نجونو پرضد د تشدد پېښې ټول پاکستان کې یوه سنګینه مسله ده.
Forum