وزیراعظم عمران خان ويلي افغان او پاکستاني دې په همکارۍ په ټرانزېټ تجارت کې موجود مشکلات لرې کړي چې دا رنگ د دواړو هېوادونو دوه اړخیزو اقتصادي گټو دپاره حالات برابر شي.
د عمران خان دفتر په یو بیان کې وویل پاکستاني وزیراعظم د شورو، چهارشنبې، په ورځ په اسلام اباد کې په ټرانزټ ټرېډ یا تجارت کې د مسلو په اړه د چارواکو سره غونډه وکړه او ویې وېل چې په دې لړ کې موجودې ستونزې دې لرې کړی شي چی دا رنگ د ټرانزټ انتظام نه دواړه هیوادونه گټه پورته کړی شي.
عمران خان په ټرانزټ ټرېډ کې د مسلو لمنځه وړلو په اړه خبرې په داسې حال کې کړي چې د افغانستان سره کاروبار کونکي تاجران وايي پاکستان چې په خپله پوله د افغانستان ته د تجارتي سامان او د خلکو تگ راتگ دپاره د کمپیوټر کوم نظام پرځای کړی دی له امله یې سوداگر د مشکلاتو سره مخامخ شوې دي.
تېره هفته د افغانستان او پاکستان د تجارت مشترکه خونې یا چېمر مشر خان جان الکوزي وي او ای ډیوه ته وویل پاکستان د افغانستان سره په تجارت کې د انټرنېټ استعمال له امله مشکلات ولاړ شوې دياو که چېرې پاکستاني حکومت نور گامونه اخلي نو په تجارت به منفي اثر غورځېږي.
ښاغلي الکوزي وویل که پاکستان د افغانستان سره تجارت کې موجود مشکلات لرې نکړل نو افغانان به "بل طرف ته تجارت ته مخه کي یا د ایران سره یا د منځنۍ اسیا سره. د هغوی نه به خپل ضروریات راوړي."
د افغانستان او پاکستان په تعلقاتو کې وخت په وخت پیدا کېدونکو کړکېچونو له امله د دواړو ملکونو ترمنځ تجارت کم شوی دی او تېره هفته د وي او ای ډیوه خبریال ریاض حسین په خپل رپورټ کې وویل د دواړ گاونډیانو ترمنځ د تجارت کچه د کال په سر یو نیم ارب ډالرو ته ټیټه شوې ده.
د پاکستان سره په تجارت کې د مشکلاتو له امله افغانستان څو کاله وړاندې د ایران د چابهار بندر دلارې هند سره د تجارت زیاتولو په غرض درې اړخیزه معاهده وکړه.
عمران خان د ټرانزټ ترېډ په اړه غونډې ته وویل پاکستان به افغانستان ته د ترانزټ په انتظام کې سهولت برابروي او د دې نظام نه به دواړه ملکونه گټې ترلاسه کوي.
د عمران خان حکومت افغانستان سره د طورخم لاره د تجارت او خلکو د تگ راتگ دپاره ٢۴ گټنې د خلاصه ساتلو فیصله هم کړې ده.
افغان مامورین وايي پاکستان دې د ترهگرۍ د مخنیوي په لړ کې د افغانستان سره کړې خپلې ژمنې عملي کړي.
