لاس رسیدونکی لینک

Breaking News

د افغانستان دپاره جمهوري نظام، امارتي نظام، او که جمهوري امارتي نظام؟


آغا جان معتصم، ملا عمر ته نږدې کس گڼل کېده خو په دې وروستیو کلونو کې یې له طالبانو خپله لاره جلا کړې ده

په افغانستان کې له یو خصوصي ټلویژن سره د یو پخواني طالب چارواکي خبرې چې پکې یې د یو نوي ډول نظام وړاندیز کړی و، یو لړ غبرگونونه راپارولي دي.

د طالبانو د پخواني حکومت د خزانې وزیر، آغا جان معتصم د افغانستان له یو خصوصي ټلویژن طلوع نیوز سره د اتوار/یکشنبې په ماښام خبرې کولې، دا وړاندیز وکړ چې افغانستان ته دې په آینده کې داسې یو سیاسي نظام جوړ شي چې هغه کې هم د جمهوریت ارزښتونه او هم د امارت ارزښتونه خوندي وي.

آغا جان معتصم د داسې یو نظام دپاره د نوم وړاندیز هم وکړ: "د افغانستان د اسلامي جمهوریت امارت"

هغه ټینگار وکړ چې په افغانستان کې ځیني امارت نه مني او ځیني جمهوریت، نو ښه به دا وي چې د دواړو نه جوړ شوی یو گډ نظام دې په پام کې ونیول شي.

آغا جان معتصم د طالبانو د پخواني مشر ملا عمر ډېر نږدې کس گڼل کېده او د طالبانو د کابینې او د سیاسي کمیټې غړی هم پاته شوی دی.

هغه په داسې وخت کې د نظام د بڼې د بدلېدو خبره مخ ته کوي چې افغانان د امریکا او طالبانو ترمنځ د دوحې خبرو ته سترگې په تمه دي او ځینو سره دا وېره شته چې هسې نه د طالب سره جوړجاړی، په ملک کې د تېرو لاسته راوړنو د قربانۍ سبب شي.

افغان صدر محمد اشرف غني چې نن د خپل انتخاباتي کمپاین یوې غونډې ته غږېده، وویل: "انتخاب ساده دی، جمهوریت او که امارت؟ جمهوریت! جمهوریت!"

جمهوریت په افغانستان کې ریاستي نظام ته وایي.

صدر غني درې ورځې وړاندې هم پرخپل فیسبوک لیکلي و چې:

"د مذاکراتو د پيل لپاره زموږ دریځ بې قید او شرط دی، خو د سولې تړون بې قید او شرط نه دی. موږ جمهوریت غواړو نه امارت."

پر خواله رسنیو (سوشل میډیا) هم گڼ شمیر کسانو د آغا جان معتصم پر وړاندیز بحثونه کړي دي. یو افغان قانون پوه او وکیل، محب پردېس بیا وایي چې د ښاغلي معتصم هدف، ښایي د ایران سیاسي نظام ته ورته یو نظام وي چي په سر کي یې مذهبي رهبر وي او دا رهبر به یوه خاصه شورا (شورای خبره‌گان) ټاکي.

د سلطان احمدزي په نوم یو تن پر فیسبوک د نظام د څرنگوالي په اړه لیکلي: "له ولس څخه باید د رایې حق وانه خیستل شي، ملي اراده باید تمثیل شي."

طالبانو چې په ١٩٩٠ لسیزې کې کابل ونیو، د افغانستان اسلامي نظام یې امارت اعلان کړ او تر اوسه هم خپل راپرځول شوی نظام، امارت بولي.

امارت داسې یو سیاسي نظام ته ویل کیږي چې په هغه کې د ټولو عامو خلکو رایه ارزښت نلري، بلکې د یوې ډلې اسلامي علماوو لخوا یو کس د هیواد مشر وټاکل شي. په جمهوریت کې بیا عام خلک (ښځه او نر) د انتخاب او رایې ورکولو حق لري.

XS
SM
MD
LG