لاس رسیدونکی لینک

تازه خبر

استخباراتي ادارو ته له خبرداري وروسته یو لادرکه تن د اسلام اباد هایکورټ ته وړاندې کړل شوی


 لادرکه حسیب له بازیابۍ وروسته داسلام اباد دپولیس دیو لوړپوړي چارواکي سره دهغه په دفتر کې لیدل شي
لادرکه حسیب له بازیابۍ وروسته داسلام اباد دپولیس دیو لوړپوړي چارواکي سره دهغه په دفتر کې لیدل شي

داسلام اباد هایکورټ لخوا د هېواد خفيه ادارو ايم اي (پوځي اسخبارات) او ايي ایس ايي ته د خبرداري وروسته د تېر اګست په 22مه نېټه د اسلام اباد څخه په جبري توګه لا درکه شوی تن د شورو په ورځ د پايه تخت پولیسو عدالت ته وړاندی کړی دی.

اسلام اباد هایکورټ د لادرکه تن حسيب حمزه د راخلاصولو په خواست د اسلام اباد د پولیسو انسپکټر جنرل ته په لسو ورځو کې دننه د پلټنو سرته د رسوولو امر کړی او ویلي یې دي چې د ستمبر دمياشتې په 22مه نېټه دې خپل رپورټ جمع کړي.

په جبر د لادرکه تنانو په مقدمه کې دا پرمختګ د وزير اعظم شهباز شريف لخوا د تېرې جمعې په ورځ عدالت ته د ورکړې شوي هغه باور وروسته مخې ته راغلی چې په کې هغه د خلکو د لا درکۍ د ستونزې د هواري لوظ کړی ؤ.

د لادرکه تنانو د حقونو فعالين او قانون پوهان د ورک شوي تن حسيب حمزه موندنه د نورو لادرکه کسانو لپاره هم د اميد يو زېری ګرځوي او وايي باید د نورو ورکو تنانو په قضيو کې هم عدالت دا لاره خپله کړي.

د تېرې جمعې په ورځ د اسلام اباد هایکورټ چيف جسٹس اطهر من الله د حسيب حمزه نومي تن په جبري توګه د لادرکۍ په ضد دخواست اوریدنې په مهال د پوځ د خفيه ادارو ايم ايي او ايي ایس ایي د سېکټر کمانډرانو ته د شورو په ورځ عدالت ته وړاندې کيدو امر کړې و.

مشر قاضي ویلي وؤ چې د جبري لادرکيو په معامله پرېکړه موجوده ده او د هغې په رڼا کې به د جبري لادرکيو مسولين دقانون منګولو ته راوستل کېږي. خو په عېن حال کې نن د شورو په ورځ د اسلام اباد هایکورټ د مشر قاضي د خبرداري وروسته د اسلام اباد څخه لادرکه شوی تن حسيب حمزه په 24 ساعتو کې دننه موندل شوی او خپل کور ته ستون شوی دی.

د اوریدنې په مهال د لادرکه تن پلار عدالت خبر کړې چې د هغه ورک زوي کور ته بېرته راغلی او هغه مطمين دی.

د ورځپاڼې ډان د رپورټ ترمخه د اسلام اباد هایکورټ مشر قاضي اطهر من الله د حسيب حمزه څخه پوښتلي چې هغه چرته تللی و نو دنوموړي وېنا وه ماته علم نشته ولې چې په سترګو یې راله پټۍ تړلې وې.

په اسلام اباد کې د لا درکه تنانو د قضيو پېروي کوونکې وکيله او د لادرکه تنانو د حقونو فعاله ايمان زېنب مزاري ډيوه ته وايي دا د ټولو لا درکه تنانو لپاره د اميد څرک دی اؤ هيله لري چې عدالت په نورو قضيو کې هم دا لاره خپله کړي.

هغه وايي ما هم د خپلو لادرکه موکېلانو مدثر نارو او نورو قضيو کې د تېرو شپږو میاشتو راهیسې د عدالت په وړاندې دا دليل اېښودلی دی چې عدالت دې د لادرکه تنانو په قضيو کې د پوځي خفيه ادارو ايم ايي او ايي ایس ايي سېکټر کمانډران راوغواړي او هیله لرم چې عدالت به په نورو ورته قضيو کې هم دا لاره خپله کړي.

د پاکستان وزيراعظم شهباز شريف هم د تېرې جمعې په ورځ د هېواد دننه په زوره د تري تم شويو کسانو په مقدمه کې اسلام اباد هایکورټ ته وړاندې شوی و او عدالت ته يې باور ورکړی و چې په جبر د خلکو د لا درکۍ ستونزه به هواروي.

عدالت په جبري توګه د لا درکه تنانو په مقدمه کې د پرمختګ لپاره مرکزي حکومت ته دوؤ مياشتو وخت ورکړی او د نومبر په 14 نېټه یې رپورټ غوښتی دی.

په پاکستان کې د خلکو په جبري توګه د لادرکۍ ستونزه نزدې 20 کاله زړه ده او د لادرکه تنانو خپل خپلوان ددې لا درکيو تورونه د هېواد د پوځ په طاقتور و خفيه ادارو پورې کوي خو پوځ دا تورونه ردوي او وايي کېدای شي چې ورک تنان د بېلتون پاله بلوڅ وسله والو ډلو په ليکو کې شامل شوي وي، امنتیي ځواکونو سره نښتو کې وژل شوي وي او یا بل هېواد ته تښتېدلي وي.

پاکستان کې د لا درکه تنانو د حقونو دغېر دولتي تنظيم ډېفنس آف هيومن راېټس مشره امنه مسعود جنجوعه ډيوه ته وايي دا خبره له پخوا ښکاره ده چې نه خلک د مرکزى حکومت په وینا پورته کېږي او نه لا درکه کسان د وزير اعظم په ولکه کې وي.

هغه وايي ددې مطلب دا دی چې د خلکو په لادرکيو کې د اېجنسيانو لاس دی او د عدالت د وارننګ یا خبرداري وروسته د اسلام اباد څخه ورک شوی تن په يوه ورځ کې پېدا شو او کور ته ستون شو.

د اسلام اباد هایکورټ مشر قاضي اطهر من الله د مقدمې د اوریدنې په مهال دا هم ویلي چي د حسيب حمزه لادرکي سنجيده پوښتنې راولاړوي او ددې پلټڼې پکار دي چې دا شهري چا اغوا کړی ؤ.

په پاکستان کې د لا درکه تنانو د مقدمو د هواري حکومتي کمېشن خپرو کړو خپلو وروستيو شمېرو کې ویلي چي د تېر اګست په میاشت کې د 95 نورو تنانو د لادرکه کېدو مقدمې درج شوي چې ورسره د سږني کال په لومړیو اتوؤ میاشتو کې د ورکو تنانو شمیر تر 488 رسېدلی دی.

د کمېشن د شمېرو ترمخه د کمېشن د جوړښت نه تر اوسه د8699 کسانو د لا درکې مقدمې ثبت شوي چې په کې په 6513 قضيو کار بشپړ شوی خو د 2 زرو څخه په زياتو مقدمو کار لا هم د ځنډ ښکار دی ولې د لا درکه بلوڅانو ،پښتنو او بشري حقونو تنظيمونه دا شمېرې له دې هم خورا ډېرې ښايي او دعوه کوي چې نزدې 40 زره کسان ورک دي.

هېلو وي او اې په ټي وي

هېلو وي او اې په ټي وي
please wait

No media source currently available

0:00 0:59:56 0:00

بي بي شیرینه

بي بي شیرینه: په ټیلې ویژن
please wait

No media source currently available

0:00 1:59:59 0:00

Recommended

XS
SM
MD
LG