د بنګله دېش د پلازمینې ډهاکې په ګډون په یو شمېر سیمو کې په زرګونو مظاهره چیان د جمعې په ورځ یو وار بیا سړکونو ته راوتلي اؤ د وزیراعظمې شیخ حسینه واجد نه یې د استعفا غوښتنه کړې ده.
دغو مظاهره چیانو تېره میاشت د احتجاجونو په مهال د ۲۰۰ څخه د زیاتو کسانو په وژنه د انصاف د ورکړې غوښتنه هم کوله.
راپورونه وایي چې په ډهاکه کې د جمعې په ورځ د شوي احتجاج په مهال پولیس اؤ مظاهره چیان یو بل ته مخامخ شوي اؤ د مظاهره چیانو د خورولو لپاره پولیسو په هغوي اوښلن ګېس اؤ د ربړ ګولۍ ورولي خو په ځینو ځایونو کې بیا مظاهره چیانو هم پولیس په کاڼو ویشتي دي.
رایټرز خبري شبکې ویلي په دغه اخ و ډب کې تر ۲۰ زیات کسان ژوبل شوي اؤ د بنګله دېش ځایي ورځپاڼې "دي ډيلي سټار" خبر ورکړی چې د کهلنا ښار په څنډه کې د مظاهره چیانو په حملو کې یو پولیس عسکر هم وژل شوی چې ددغه وژنې په تور کې د ۱۲۰۰ کسانو په ضد مقدمه درج کړل شوې ده.
رپورټ وایي چې هابیګنج ضلعه کې د تشدد نه ډکو احتجاجونو کې یو تن وژل شوی اؤ ۵۰ نور ژوبل شوي دي.
ډيلي سټار ورځپاڼه وایي د خالي اؤ اتوار په ورځ هم د احتجاجي مظاهرو تابیا نیول شوې ده.
په بنګله دېش کې د شیخ حسینه واجد د ۱۵کلني اقتدار په په موده کې د امن و امان دا تر ټولو خراب وضعیت دی ، هغه سږکال د جنورۍ په میاشت کې پرله پسې په څلورم ځل د بنګله دېش وزیراعظمه ټاکل شوې ده.
اوسنۍ مظاهرې څنګه پېل شوې؟
بنګله دېش کې په سرکاري ملازمتو کې د کوټې د نظام خلاف په ۱۵مه جولایي طالبعلمانو احتجاجي مظاهرې پیل کړې وې خو کله چې سپریم کورټ سرکاري ملازمتونو کې د کوټه سسټم خلاف د هایکورټ فیصله معطل کړه نو دا مظاهرې یو څه ودرېدلې وي.
مظاهره چیانو د پاکستان څخه د ازادۍ اخستو په جګړه کې د شاملو کسانو د کورنیو غړو ته سرکاري ملازمتونو کې د ۳۰ فیصده کوټې ځانګړې کولو خلاف احتجاج کولو.
مظاهره چیانو تور لګولی ؤ چې ملازمتونو کې د کوټې ځانګړې کولو ګټه به د وزیراعظمې شیخ حسینه واجد ګوند عوامي لیګ ته ورسیږي.
عوامي لیګ هغه یواځينی ګوند ؤ چې مشر یې شیخ مجیب الرحمان په کال ۱۹۷۱ کې پاکستان نه د بیلیدو لپاره د بنګله دېش جوړولو د تحریک مشري کړې وه.
تیره میاشت په دې احتجاجي مظاهرو کې شدت هغه وخت پیدا شو چې د مظاهرو راجوړونکو دعوه وکړه چې پولیسو اؤ حکومت پلوه ډلو په دوي حملې کړې دي.
د پولیسو اؤ مظاهره چیانو تر منځ له سختو نښتو وروسته وزیراعظم حسینه واجد په ګرد هیواد کې کرفیو پځای کړې وه اؤ د انټرنیټ اؤ موبایل فون خدمات یې تړلي وؤ.
رپورټونه وایي چې دغو احتجاجونو اؤ نښتو کې تر ۲۰۰ زیات کسان وژل شوي وؤ.
د جنوبي ایشیا لپاره د ملګرو ملتونو د ماشومانو د فنډ سیمه ییز مشر سنجی وجسیکارا د جمعې په ورځ خپل بیان کې ویلي وؤ چې د مظاهرو په مهال وژل شوؤ کې ۳۲ ماشومان هم شامل وؤ.
هغه ویلي وؤ ورته معلومه شوې ده چې چارواکو ددې مظاهرو سره د تړاؤ په تور ماشومان هم نیولي دي.
ملګرو ملتونو اؤ امریکې بنګله دېش کې په مظاهره چیانو د شوي تشدد غندنه کړې وه.
( ددې رپورټ مواد د ایسوسي ایټډ پریس،رایټرز اؤ ای ایف پي نه اخستل شوي)
Forum