د مغربي ملکونو د پوځي اتحاد نارت اېټلانېټک ټريټي ارګنایزېشن، نېټو، د جوړېدو ۷۵ کاله د لمانځلو په لړ کې د تنظیم غونډه په واشنګټن کې کېدونکي ده او د روس خلاف جنګ کې يې د یوکرېن ملاتړ تکرار کړی دی.
د نېټو د سرمشرانو درې ورځنۍ غونډه د نهې، سه شنبې، په ورځ د امریکې په سرښار واشنګټن ډي سي کې شروع کېږي.
د نېټو سېکرېټري جنرل ینس سټالټنبرګ د اتوار، یکشبنې، په ورځ د سرمشريزي په اړه خبریالانو ته وویل د پوځي اتحاد غړي امن غواړي او امن د دې نه بغېر نه شي قایمېدلی چې د روس صدر ولادېمېر پوټن په دې خبره پوهه شي چې هغه د جنګ په مېدان ګټه نه شي ترلاسه کولی.
سټالټنبرګ د هغه ګامونو ذکر وکړو چې نېټو به يې د یوکرېن د ملاتړ دپاره اخلي. په دې کې په جرمني کې خصوصي کمانډ قایمولو، یوکرېن سره مالي او پوځي امداد زیاتول او د سېکیورټي یا د امنیت دوه اړخيزې معاهدې شاملې دي.
سټالټنبرګ په دې خبره ټینګار وکړو چې دا اقدامات به په نېټو کې د یوکرېن د ممکنه شمولیت په لاره کې پېچیدګیانې لرې او د روس د جارحيت خلاف به د نېټو متحد محاذ څرګند کړي.
سټالټنبرګ زیاته کړه چې د واشنګټن په سر مشریزه کې به یوکرېن ته د نېټو رکنیت نه ورکول کېږي خو غونډه به د یوکرېن د غړیتوب دپاره پله برابر کړي.
سټالټنبرګ د روس د جنګ په اړه د هنګري په تشویش او د هنګري په ممکنه توګه د نېټو فېصلې د ودرولو په اړه هم خبرې وکړې. هغه هنګري ته د خپلې وروستۍ دورې یادونه وکړه او ويې وېل د هنري وزیراعظم وېکټر اوربن دا خبره یقیني کړې چې یوکرېن سره د مرستې د مجوزه ګامونو مخالفت به نه کوي.
سټالټنبرګ وویل هنګري به یوکرېن سره د امنیت په برخه کې د نېتو په مرسته کې برخه نه اخلي خو د نېټو نورې ذمه وارۍ به پوره کوي.
د نېټور سېکرېټري جنرل امید څرګند کړو په امریکا کې د اینده صدارتي انتخاب باوجود به هېواد د نېټو ملاتړ جاري ساتي. هغه وویل په تېرو وختونو کې په نېټو د امریکې د پخواني صدر ډانلډ ټرمپ تنقید نېټو سره نه بلکې دفاعي اخراجاتو سره تړون لري.
Forum