په بلوچستان کې له درو کلونو وروسته نن د جمعې په ورځ د روان کال دویم مثبت کېس په سرحدي سيمه چمن کې رپوټ شوی. تر دې يوه ورځ وړاندې د صوبې په بلوڅ مېشته ډېره بګټي سيمه کې يو ماشوم په فلج کوونکې ناروغۍ پوليو اخته شوی وو.
د چمن روغتيايي چارواکي وايي، چې په يو څلورکلن ماشوم کې د پوليو وايرس موندل شوی دی.
په بلوچستان کې له 2021م کال راهيسې د پوليومثبت کېس نه وو رپوټ شوی، خو وروستی کېس هم چمن ته څېرمه په کلاعبدالله سيمه کې رپوټ شوی وو.
د بلوچستان روغتيايي چارواکي وايي، د ډېره بګټي پوليو شوی ماشوم د سويي سيمې اوسېدونکی دی او ورته اووه ځله د پوليوضد څاڅکي ورکول شوي دي.
دا په ډېره بګټي کې له ديارلس کلونو وروسته د پوليو مثبت کېس دی چې رپوټ شوی دی.
په پلازمېنه اسلام اباد کې د پاکستان مرکزي ليبارټرۍ اين ای ايچ په رپوټونو کې ويل شوي، چې په دوه نيم کلن او څلورکلن ماشومانو کې د وايلډ پوليو ون وايرس موندل شوی دی.
د اغېزمن ماشوم نمونې يا سيمپل تېره مياشت اين ای ايچ ته لېږل شوې وې، چې پکې د پوليو وايرس موندل شوی دی.
د پاکستان د روغتيا مرکزي سيکرټري افتخارعلي شلواني وايي، پوليو وايرس د يو بل پاکستاني ماشوم اندامونه له کاره اچولي، په خبره يې تر څو چې د پوليو وايرس په بشپړه توګه له منځه نه وي وړل شوی، ماشومان به همداسې له خطر سره مخامخ وي.
په بلوچستان کې د رواني مارچ مياشتې پر دريمه نېټه د پوليو ضد کمپېن ترسره شوی، چې پکې شاوخوا 2.65 میلینه ماشومانو ته د پولیو ضد څاڅکي ورکړل شول.
خو د پوليو اوسنيو مثبت کېسونو ته په پام سره حکومت پرېکړه کړې، چې د کېس ريسپانس په نامه به په اغېزمنوسيموکې ځانګړی کيمپېن روانه مارچ مياشت ترسره شي، ترڅو د وايرس نورو سيمو ته د لېږد مخه ونيول شي.
Forum