د پاکستان د بلوچستان صوبې په خضدار ښار کې په بمي چاودنه کې لږ تر لږه دوه کسان تنه وژل شوي او پينځه نور ژوبل شوي دي. د پاکستان د ځايي مطبوعاتو ترمخه، چاودنه د خضدار ښار په مرکزي چوک عمر فاروق چوک کې شوې ده.
پوليسو په چاودنه کې د دوو تنو د وژلو او پينځو ژوبلېده تاييد کړي او دعوه یې کړې ده چاودېدونکي مواد په موټر سايکل کې ځای په ځای شوي وو. د پېښې زمه واري په سمدستي ډول چا نه ده منلې.
د بلوچستان صوبې وزیراعلا سرفراز بګټي د خضدار په چاودنه کې د مرګ ژوبلو شمېره نه ده ويلې خو په اېکس (پخواني ټویټر) ویلي، "په بلوچستان کې که خبره د بې ګناه خلکو او شربت خرڅوونکو لارويانو د وژلو پورې راورسېده، نو بېلتون خوښي ترهګر دې د بلوچیت نوم اخستل پرېږدي".
هغه زیاته کړې، "د ترهګرۍ هره پېښه ثابتوي چې د بلوڅ قوم او د هغوی د مستقبل دښمن هغه دی څوک چې په بلوچستان کې د اور او وینې لوبه کوي".
په شپږم اپرېل د پاکستان پوځ دعوه کړې وه، د پينځم او شپږم اپرېل په مینځنۍ شپه کې یې د بلوچستان صوبې په پنجګور ضلع کې د استخباراتو په اساس عمليات کړي او دوه ترهګر یې وژلي وو.
په 31م مارچ د بلوچستان صوبې په د ګوادر ښار څخه خواوشا 25 کلوميټره لرې د سيجې په غرونو کې د سړک په غاړه اېښودل شوي بم چاودنه کې دوه عسکر وژل شوي او دوه نور ژوبل شوي وو.
له دغې يوه ورځ وړاندې د (مارچ په 30مه) د بلوچستان په پښتون مېشته سیمه هرنايي او دوکۍ ضلعو په سرحدي سیمه وړیخه کې د ماړي پټروليم ګېس کمپنۍ پر کارمندانو بم چاودلی چې په نتيجه کې يې يو تن وژل شوی او 14 ټپي شوي وو. د دې بريد زمه واري بلوڅ بېلتون غوښتونکې ناقانونه ګرځول شوې ډلې بي ايل اې منلې وه.
د مارچ په 26مه د بلوچستان تربت کې د پاکستان د هوايي ځواک "نيول فورس" پر هوايي ډګر ډليز وسلوال بريد شوی وو. په دغه برید کې د ايف سي ځواک دوه عسکر وژل شوي او د عسکرو په ځوابي ډزو کې څلور وسلوال وژل شوي وو. بلوڅ بېلتون غوښتونکې وسلوالې ډلې بلوچ لیبریشن ارمي مجيد بريګېډ د برید زمه واري منلې وه.
د مارچ په 20مه د مکران ډویژن په ګوادر ضلع کې د ګوادر پورټ اتهارټۍد استوګنې په کمپلیکس حمله شوې،دوه عسکر پکې وژل شوي او ځينې ټپيان شوي وو.
هغه وخت چارواکو ويلي وو، په ځوابي ډزو کې يې اته وسلوال بريدګر وژل شوي وو. د دغې برید زمه واري هم د بي ايل اې تنظيم مجيد بريګېډ نومې ډلې منلې وه.
Forum