د امریکا د دفاع وزیر اېش کارټر ويلی دي امريکا به افغانستان سره خپلې مرستې دوامداره ساتي. اېش کارټر اود افغانستان جمهور رئیس محمد اشرف غني نن غرمه په ارګ کې د خبرو وروسته خبري کانفرنس ته گډه وینا کړېده -
اېش کارټر وویل چې په روان کال کې امریکا د افغانستان په هکله درې پریکړې کړي دي-هغه وویل په دغو پریکړو کې د امریکا د جمهوررئیس له خوا دده په سپارښتنه په افغانستان کې دامریکایي ځواکونو پاتې کیدل، د ستراتیژیکي اغیزو لرونکو عملیاتو کې برخه اخیستل او افغان امنیتي ځواکونو سره د امریکا د مالي او د ښونې روزنې په برخو کې د مرستو دوام وښود.
ښاغلي کارټر وویل "سږکال مونږ ګورو چې افغان امنیتي ځواکونه چې ستاسو د هیواد د امنیت مشري په غاړه لري او په یو ازمایښت سره مخ وو، د سترو قربانیو په ورکولو سره هغوی د جګړې په ډګر کې کمال کړی دی او د نفوسو څخه په ډکو سیمو کې یې د طالبانو د اهدافومخه نیولې ده، هغه وویل دا یو ستر پرمختګ څرګندوي چې افغان ځواکونو د امریکا او ناټو ځواکونو په مرسته ترلاسه کړی دی.
جمهوررئیس محمد اشرف غني په خپل وار وویل چې په افغانستان کې د امریکایي عسکرو د پاتې کیدو په اړه د امریکا جمهور رئیس پریکړه به پنځوس او یا سل کاله وروسته د یوې تاریخي پریکړه په توګه وپیژندل شي. ښاغلي غني د افغانستان سره د امریکا د مرستو په ځانګړي ډول په روان کال کې د دغه هیواد د پوځي مرستو څخه د خپل حکومت او افغانانو په استازیتوب مننه وکړه او ویې ویل چې په دې کې د امریکا د دفاع د وزیر لوی لاس وو،
اېش کارټر په سيمه کې د وسله وال گوند القاعده په اړه وویل چې د القاعدې ډلې پر وړاندې به امریکايي ځواکونه خپلو بریدونو ته دوام ورکړي ښاغلي کارتر وویل " په حقیقت کې د افغان ځواکونو په ملتیا مو په دې وروستیو کې د اسلامي دولت چې دلته ورته داعش وایي دوه ستر عملیات ترسره کړل په دې هیواد کې د هغوی مشران مو ووژل او په دې هیواد کې مو د هغوی جګړیزو قابیلیتونو ته زیان ورسوه،همداشان مونږ په افغانستان کې د القاعده ډلې پاتې شونو پروړاندې بریدونو ته دوام ورکوو."
اېش کارټر چې د امریکا ددفاع وزیر په توګه یې دا افغانستان ته دا څلورم سفر وو، په دې سفر کې د هغه میرمن هم ورسره ملګرتیا کوله. امریکا په افغانستان کې نهه زره او اته سوه عسکر لري .
د امریکا دفاع وزیر په داسې حال کې افغانستان ته سفر کړی چې ټاکل شوې بله عیسوي میاشت د امریکا جمهوررئیس باراک اوباما د امریکا منتخب جمهوررئیس ډونالډ ټرامپ ته واک وسپاري.
تراوسه لا معلومه نه ده چې د امریکا نوی جمهوررئیس به په افغانستان کې په څومره شمیر خپل عسکر وساتي، خو تیره اونۍ د امریکا منتخب جمهوررئیس ډونالډ ټرمپ جمهوررئیس محمد اشرف غني سره په ټیلیفوني خبر کې وویلي وو، چې د افغانستان د امنیتي وضعیت د ارزولو وروسته که اړتیا وي افغانستان سره به خپله امنیتي همکاري زیاته کړي
