د امریکې حکومت په خپل تازه اقدام کې 37 چینایي کمپنۍ د تجارتي بندیزونو په فهرست کې شاملې کړې دي، په دغو کې ځینې هغه کمپنۍ هم شاملې دي چې ورباندې تېر کال پر امریکا باندې د جاسوسي غبارو الوځولو د ملاتړ تورونه لګیږي.
که څه هم د تېرې میاشتې په پای کې چین ته د امریکې د بهرنیو چارو د وزیر اینټني بلینکن سفر د دواړو هېوادونو تر منځ پر ګڼو مسایلو برسېره د اړیکو د ښه کولو تمې پیدا کړې وې خو دا تازه بندیزونه د واشنګټن او بېنجګ تر منځ تازه د مخالفت زیاتېدو اشاره ده.
د امریکې د تجارت وزارت وایي، د الیکټرانیک ټیکنالوجۍ د ډلې پر یو شمېر هغو کمپنیو یې هم بندیزونه لګولي چې د چین د کوانټم ټیکنالوجۍ وړتیاوو ته د ودې ورکولو لپاره یې د امریکایي ټیکنالوجۍ د ترلاسه کولو هڅه کړې ده.
د تجارت وزارت په خپل یو بیان کې ویلي، "دا فعالیتونه د پام وړ پوځي اړخونه لري او د امریکې ملي امنیت ته سنجیده خطر پېښوي."
د امریکې په تور فهرست کې شامل شوې کمپنۍ نه شي کولای چې د حکومت له اجازې پرته له امریکې څخه توکي او ټیکنالوجي تر لاسه کړي.
د رسنیو د رپوټونو له مخې د چین سرکاري د الیکټرانیک ټیکنالوجۍ ډله په دې ملک کې بهر ته د پوځي وسیلو د لېږدولو یا سپلای کولو تر ټولو لویه کمپنۍ ده.
دې کمپنۍ تر اوسه د بندیزونو پرېکړه ته څه غبرګون نه دی ښودلی، خو په واشنګټن کې د چین سفارت د امریکې دا اقدام "د ټیکنالوجۍ په برخه کې ښکاره اقتصادي جبر او ځورونه" بللې او وایي چین به په کلکه د چینايي کمپنیو او ادارو د قانوني حقونو ساتنه کوي.
دا اقدام ښکاره کوي چې د بایډن انتظامیه د جاسوسۍ غبارې پر سر بېجینګ ته پرله پسې سزا ورکوي چې په واشنګټن کې یې سیاسي غصه را پارولې وه او چین ته د بهرنیو چارو د وزیر اینټني بلینکن د سفر د منسوخولو سبب شوې وه.
امریکې د تېر کال په فرورۍ کې هم د چین پینځه کمپنۍ او یو څېړنیز انسټیټیوټ د چین د فضایي پروګرام په بنیاد د پوځ د عصري کولو د هڅو او د هوایي بېړیو او غبارو د ملاتړ په تور د بندیزونو په فهرست کې شاملې کړې وې.
تېر کال د امریکې له الاسکا ایالته تر جنوبي کېرولاینا پورې د چین یوه مشکوکه جاسوسي غباره څو ورځې په فضا کې الوتله او د ډېرو امریکایانو پام یې ور اړولی وو. د امریکې پوځ اخر دا غباره د هېواد په ختیځ ساحل کې را وغورځوله.
د امریکې د تجارت وزارت د پنجشنبې- زیارت په ورځ وویل، دا ځل چې کومې کمپنۍ د بندیزونو په فهرست کې شاملې کړای شوې په هغوی کې ځینې د چین له ایټومي پروګرامونو سره تړاو لري او یا په پر اوکراین د روس له یرغل وروسته "ماسکو ته د ممنوعه توکو په لېږلو کې لاس لري."
د صنعت او امنیت لپاره د امریکې د تجارت وزارت مرستیال الان ایسټیوز وویل د بندیزونو په فهرست کې د نورو کمپنیو د نومونو اضافه کول د چین لخوا راپورته شويو چېلنجونو ته د ځواب ویلو یو مهم ګام دی:
"موږ باید متوجه اوسو او د امریکې ټیکنالوجۍ ته د داسې ادارو د لاسرسي مخه ونیسو چې کېدی شي زموږ ملي امنیت ته زیان ورسوي."
د چين د بهرنيو چارو وزارت وياند لين جين يوې خبري غونډې ته ویلي، چين او روس له یو بل سره د عادي اقتصادي او تجارتي همکاریو حق لري او باید له لاسوهنې او محدوديتونو سره مخامخ نه شي.
Forum