د هندوستان په کرناټکا ریاست کې یو عدالت په سکولونو او کالجونو کې په حجاب پابندي په ځای وساتله او په خپله فېصله کې یې وویل چې حجاب اغوستل د اسلام بنیادي برخه نه ده.
د وي او ای د رپورټ ترمخه د کرناټکا عدالت د نهې، سه شنبې، په ورځ د مسلمانو مېرمنو د یوې ډلې په خواست واوروله. په دغه خواست کې د کرناټکا په سکولونو کې په حجاب د بندېز مخالفت شوی و.
د رپورټ ترمخه په ریاست د وزیراعظم نرندره مودي بهارتیه جنتا پارټۍ حکومت دی.
په کرناټکا ریاست کې د حجاب په سر لانجه په داسې حال کې شروع شوه چې یو کالج په خپلو شپږو مسلمانو زدکونکو جینکو په کلاسونو کې د حجاب په اغوستلو پابندي ولګوله. مسلمان طالب علمانو د دې په ضد احتجاجونه شروع کړل او په حجاب بندیز یې د خپلو بنیادي حقونو خلاف ورزي وبلله.
د مسلمانانو د احتجاج په ضد کې هندو هلکانو هم مظاهرې شروع کړې او د زغفران د رنګ رومالونه یې راپورته کړل. زغفراني رنګ د هندو مذهب سره په علامتي ډول تړل کېږي.
د وي او ای د رپورټ ترمخه په داسې حال کې چې په کرناټکا ریاست کې مذهبي تاو تریخوالی په زیاتېدو و حکومت په نورو سرکاري تعلیمي ادارو کې هم په حجاب بندیز ولګولو او ویې وېل تعلیمي ادارې دا حق لري چې د زدکونکو دپاره د لباس په اړه قوانین جوړ کړي.
د نهې، سه شنبې، په ورځ د کرناټکا عدالت په خپله فېصله کې وویل ریاستي مامورینو چې د زدکونکو د یونیفارم (د سکول جامو) په اړه کوم هدایات جاري کړي دي د رای د ازادۍ په حقونو مناسب قدغن دی.
د کرناټاکا ریاست د های کورټ مشر (ې) ریتوراچ اسوتي په فېصله کې وویل عدالت په دې نظر دی چې مسلمان مېرمنو دپاره حجاب اغوستل د مذهب د بنیادي عمل برخه نه ده.
د هندوستان د پارلیماني چارو وفاقي وزیر پرهالد جوشي وویل چې د عدالت فېصله دې ومنل شي. هغه وویل زدکونکو دې توجه خپل تعلیم ته وکړي.
د فېصلې وروسته د کرناټکا اعلا وزیر باوسراج بومای په مسلمانانو زدکونکو غږ وکړو چې کلاسون ته دې ستانه شي.
د وي او ای د رپورټ ترمخه په حجاب د بندیز په سر احتجاج کې مسلمانانو زدکونکو د کلاسونو نه بایکاټ کړی دی.
د وي او ای د رپورټ ترمخه ګڼ مسلمان سیاسي مشرانو د عدالت به فېصله مایوسي څرګنده کړې ده.
د هندوستان د انتظام دلاندې کشمیر پخواني اعلا وزیر عمر عبدالله وویل د جامو انتخاب د یوې مېرمن خپله خوښه ده چې هغه څّه ډول جامې اغوستل غواړي هغه وویل عدالت دغه بنیادي حق و نه ساتلو.
د وي او ای د رپورټ ترمخه د عدالت د فېصلې نه وړاندې د کرناټکا حکومت د احتجاجونو د مخنیوي دپاره په ځینو ځایونو کې تعلیمي ادارې بندي کړې وې او په لویو غونډو یې بندیز لګولی و.
امکان دی چې د کرناټکا د عدالت د فېصلې په ضد سپریم کورټ ته خواست وکړی شي.
د انساني حقونو یو شمېر فعالان په حجاب د بندیز په مخالفت کې ودرېدلي دي او دا پوښتنه یې راپورته کړې چې په سکولونو کې په حجاب د دې نه وړاندې پابندې ولې نه ده لګول شوې؟
د مسلمانانو د حقونو ځینې فعالان وايي دې خبرې سره اتفاق کوي چې حجاب اغوستل د اسلام د بنیادي عمل برخه نه ده خو بندیز پرې د امتیازي سلوک په بنیاد لګول شوی دی.
زکیه سونم د بهارتیه مسلم ملیها اندولن نومې د مسلمانانو د یو تنظیم باني ده وايي په هندوستان کې د ګڼ شمېر مذهبونو منونکي اوسېږي او د پارلېمنټ ځینې غړي هم د زعفران د رنګ لباس اغوندي نو ځکه که څوک د حجاب په اغوستلو عقیده لري نو پکار ده چې اجازت یې ولري.
هغې وویل د عدالت د فېصلې په نتیجه کې ځینې زاړه پاله والدېن خپلې لوڼه د سکولونو نه وېستلی شي.
زکیه سونم زیاته کړه چې د حجاب په مسله به د هندوستان د اکثریتي هندو مذهب منونکو او مسلمانانو ترمنځ اختلافات نور هم زیات شي. مسلمانان د هندوستان د ابادۍ 14 فیصده برخه دي.
د وي او ای د رپورټ ترمخه د حجاب په سر د لانجې نه څو میاشتې وړاندې د کرناټکا حکومت په ریاست کې د غوا په خرڅېدو او حلالولو پابندي لګولې وه او د قانون یوه مسوده یې هم وړاندې کړې وه . په مجوزه قانون کې په غیرقانوني توګه د مذهب د بدلولو دپاره د لس کاله قید سزا تجویز شوي، د مختلفو مذهبونو ترمنځ ودونه او اسلام او یا عیسایت قبولول نور ګران کړی شوي وو.
