د پنجاب حکومت د څو ورځو انتظار وروسته د پاکستان سُپرليګ دويم سيزن د فائنل مېچ په لاهور کې د کولو پرېکړه کړې ده خو د پاکستان پخواني کپتان او پي ټي آئي ډلې مشر عمران خان په لاهور کې فاینل کولو ته لیونتوب ويلي دي.
د پنجاب صوبې د قانون وزیر راناثناالله ويلي چې د لاهور په قذافي سټيډيم کې د پي اېس اېل د فاینل کولو پرېکړه د وزيراعلي شهباز شريف په مشرۍ کې تر سره شوې د لوړې کچې غونډه کې شوې ده.
د پي اېس اېل سيزن دويم فائنل به په ۵م مارچ کیږي.
د پاکستان کرکټ ټيم پخواني کپتان او د پاکستان تحریک انصاف ګوند مشر عمران خان چې د مسلم ليګ ن ډلې د مرکزي او پنجاب صوبايي حکومت سخت ناقد دی ويلي یې دي په داسې حالاتو کې لاهور کې کرکټ کول نه دي پکار.
عمران خان ويلي که چرته د لاهور ټول ښار د امنيت دپاره ګنډلی او د پوځ په څار کې پي اېس اېل کيږي نه چې نړيوال کرکټ، نو خلک به څه وايي چې لاهور کې امن راغلو؟
پاکستان کې د ترهګرۍ د تازه پیښو او په خصوصي توګه لاهور نزدې دوه اوونۍ وړاندې د يو ځانمرګي برید وروستو د پي اېس اېل فائنل لاهور کې کېدو باندې سوالونه راپورته شوي وو.
د پي اېس اېل چيئرمین نجم سيټهي ويلي د مارچ د درېمې نیټې پورې به معلومه شي چې بهرني لوبغاړي لاهور کې د پي اېس اېل فاینل ته راځي ياو که نه راځي.
هغه ويلي د بهرنو لوبغاړو نه راتلو په صورت کې به دهغوي په ځای نور لوبغاړي لوبولی شي.
په کال ۲۰۰۹ کې د سري لنکا په ټيم لاهور کې د برید وروستو پاکستان ته د کرکټ نړيوال ټيمونه راتګ بند شوی يواځې په کال ۲۰۱۵م کې د زمبابوی ټیم راغلی ؤ.
پاکستان کې د امنيت او نړيوالو لوبغاړو نه راتګ له کبله د پي اېس اېل لوبې د متحده عرب اماراتو په میدانونو کې شوي دي.
د پنجاب صوبايي حکومت ويلي د فاینل میچ دپاره به د امنيت کلک انتظامات کوي، او د فاینل میچ پورې لاهور کې په هر ډول غونډه يا ګڼه جوړولو باندې بندېز لګول شوی دی.
د پي اېس اېل دويم سیزن کې د پاکستان پينځه ټیمونه برخه اخلي او يو شمېر نړیوال لوبغاړي هم په دغو ټیمونو کې شامل دي.
ټورنامنټ د ناک اؤټ مرحلې ته رسېدلی، نن به د پېښور زلمي او کوئټه ګلېډي اېټرز ټيمونه يو بل ته مخامخ کيږي او ګټونکی ټیم به فائنل ته رسي.
د اسلام اباد يونائټډ او کراچۍ کنګز ترمنځ ناک اؤټ مېچ به سبا د شورو په ورځ کيږي. د لاهور قلندر ټيم د ټورنامنټ نه بهر شوی دی.