په لندن او وېلز کې روان د کرکټ نړیوال جام په یوه لوبه کې نن کوربه انګلېنډ بنګله دېش ته په ۱۰۶ منډو ماتې ورکړه.
بنګله دېش ټاس یا پچه وګټله او انګلېنډ ته یې د لومړي بېټنګ بلنه ورکړه. د انګلېنډ لوبډله چې په روان نړیوال جام کې تر ټولو غوره لوبه بلل کیږي، نن يې یو وارۍ بیا ښه لوبه وکړه. د انګلېنډ اوپنرانو د ۱۲۸ پارټنرشپ وکړو چې پکې جاني بېرسټو ۵۱ او جېسن رايې ۱۵۳ منډې جوړې کړې.
د ښه اوپننګ پارټنرشپ وروسته د نیوزي لېنډ پاتو لوبغاړو هم غوره بېټنګ وکړو او بټلر ۶۴، کېپتان اېین مورګن ۳۵، جی روټ ۲۱ او پلېنکټ ۲۷ منډې جوړې کړې او بنګله دېش ته يې د ګټې لپاره ۳۸۷ منډو حدف ورکړو.
دا د نړیوال جام په یوه لوبه کې تر ټولو زیاتې منډې وې. د دې نه وړاندې پاکستان ۳۴۸ منډې جوړې کړې وې.
د بنګله دېش لخوا محمد سېف الدین او مهدي حسن مرزا ۲،۲ او مستفیض الرحمان او مشرفي مرتضا ۱،۱ وکټ اخستي.
د دغې په ځواب کې د بنګله دېش د لوبې پېل ښه نه وو او لومړي لوبغاړي يې زر وسوځیدل. د بنګله دېش لخوا شکیب الحسن ښه بېټنګ وکړو او ۱۲۱ منډې يې جوړې کړې. خو د بنګله دېش پاتې لوبغاړو هغه شان لوبه وه نه کړه کومې چې د لوبې ګټې لپاره پکار وه.
د بنګله دېش بېټسمینانو کې مشفیق الرحمان ۴۴، محمدالله ۲۸، مصدق حسین ۲۶ او تمیم اقبال ۱۹ منډې جوړې کړې. د انګلېنډ لخوا ارچر او بېن سټوک ۳،۳ مارک ووډ ۲ او پلنکټ او عادل رشید ۱،۱ وکټ ترلاسه کړو.
