د هند چارواکو ويلي، په لويديځ رياست ګجرات کې په سيند دپاسه جوړ د ماچهو په نوم پُل چې په وروستيو کې بيا مرمت کړی شوی وو، غورځېدلی دی او لږ تر لږه 132 کسان پکې مړه شوي دي.
چارواکو ويلي، د پېښې ښکار کسان روغتونونو ته منتقل کړی شوي او په پېښه کې د مړينو سېوا کېدو اندېښنه څرګندنه کړی شوې او د ژوبلو کره شمېره نه ده ښودل شوې.
ځايي ميډيا ویلي، دغه پُل چې نزدې 150 کاله وړاندې جوړ شوی، پينځه ورځې وړاندې د مرمت کولو وروسته د پېدل تلونکو دپاره پرانستل شوی وو.
د راپورونو ترمخه یو شخصي شرکت يا کمپنۍ د دې پُل په مرمت نزدې اووه مياشتې کار کړی، خو د ځايي حکومت لخوا دغه پُل ته د پېدل تلونکو دپاره د محفوظه يا خونديتوب سند نه وو ورکړی شوی.
چاوراکو ويلي په دې پُل د هندوانو د ديوالي تهوار يا مېلې نمانځلو په مهال په لسګونو خلک راجمع شوي وو.
ویل شوي امدادي کار کوونکي او پوځي عسکر د پُل غورځېدو په مهال د خلکو ژغورولو دپاره په ځای کړی شوي دي.
د اې اېف پي خبري ادارې د خبر ترمخه چارواکي هڅې کوي چې پُل ته د نزدې ډېم څخه راتلونکې اوبه ودروي او د پمپونو د لارې د سيند نه اوبه اوباسي چې د ژغورنې عمليات چټک شي.
د هند وزیراعظم نريندرا مودي چې د پېښې په مهال په ګجرات رياست کې وو، په پېښه يې د خفګان څرګندونه کړې او په پېښه کې د مړه شوو د کورنيو دپاره یې د تاوان ورکولو اعلان کړی دی.
