مصر په نړیواله ټولنه غږ کړی چې غزه ته دې په سمدستي ډول امداد ورسوي

د مصر صدر عبدالفتح السیسي په نړیواله ټولنه غږ کړی چې غزه ته بشري امداد زیات کړي، د چین صدر شي جېن پېنګ د فلسطیني ریاست د قیام غوښتنه او په غزه کې فلسطینیانو سره د نورې مرستې لوظ کړی او اسرایل ویلي په وېسټ بېنک کې یې دوه عسکر د موټر د ټکر په حمله کې وژل شوي او د مصر سره د غزه د ټولې پولې واک اختیار یې لاس ته کړی دی.

اسرایل د شورو، چهارشنبې،‌ په ورځ مصر او د غزه د رفح ښار سره د سرحد د نیولو اعلان وکړو او وايي په سیمه کې په ګڼه شمېره کې څمڅې یا سرنګان موجود دي چې فلسطیني مسلح ډله حماس یې د سمګلېنګ دپاره استعمالوي.

د مصر او اسرایل ترمنځ دغه سرحدي علاقه د فېلاډېلفي کارېډور یا د فېلاډېلفي راهدارۍ په نامه هم یادېږي او مصر وايي په دغه سیمه کې د ځواکونو اضافه به د اسرایل او د مصر کال ۱۹۷۹ د امن معاهدې خلاف ورزي وي. مصر په رفح سرحدي لار د اسرایل د قبضې هم مخالفت کړی دی.

یو اسرایلي پوځي چارواکي ویلي د رفح سرحد د نیولو په اړ مصر ته اطلاع ورکړی شوې وه. اسرایلي چارواکي وویل اسرایلي ځواکونو تر ۲۰ پورې سرنګان او سرنګانو ته د تګ ۸۲ لارې یې معلومې کړې دي. ای پي خبري اداره وايي دا نه ده معلومه چې ایا دا سرنګان اوس هم په استعمال کې وو او که نا؟

السیسي غزه ته د انساني امداد غوښتنه د چین او د عرب ملکونو د سر مشرانو د غونډې په موقع وکړه. هغه وویل نړیوالې ټولنې ته پکار ده چې د اسرایل محاصره ماته کړي او د خلکو په زور د بې کوره کولو د اسرایل کوښښونه ناکامه کړي.

د زیارت، پنچشنبې، په ورځ د عرب هېوادونو مشرانو سره سر مشریزه غونډه د پرانیستلو په موقع، شي وویل په اکتوبر کې د اسرایل او فلسطینیانو ترمنځ شخړه د شروع کېدو راهسې تاوتریخوالی زیات شوی او خلک یې مشکلاتو ته غورځولي دي.

د چاینا عرب سټېټس کواپرېشن فورم یا د چین او د عرب ملکونو د مرستې غونډې ته تقریر کې شي وویل پکار نه ده چې جنګ په مستقل ډول دوام ولري.

شي غوښتنه وکړه چې د اسرایل او حماس جنګ د ختمولو دپاره دې د امن نړیواله غونډه راوبلل شي او په غزه کې د انساني امداد دپاره یې د ۶۹ مېلین ډالرو امداد اعلان وکړو. چینايي صدر د ملګرو ملتونو هغه ادارې سره د درې میلین ډالرو امداد اعلان هم وکړو چې د فلسطیني کډوالو سره مرسته کوي.

بیجېنګ او عرب ملکونه د فلسطینیانو حمایت کوي او اسرایل په نړیواله کچه د خپلې هغه حملې په سر د فشار غندنې ښکار شوی چې په رفح کې يې لږ تر لږه ۴۵ کسان وژل شوي دي. د غزه د صحت وزارت وايي په سیمه کې په جنګ کې د وژل شویو کسانو شمېره د ۳۶۰۰۰ نه زیاته شوې ده.

بیجېنګ د ډېر وخت راهسې د فلسطینیانو حمایت او د فلسطینیانو علاقې په نیولو د اسرایل غندنه کوي او د حماس غندنه یې نه ده کړې چې په اووم اکتوبر په اسرایل حمله کې یې تر ۱۲۰۰ پورې کسان وژل شوي دي. امریکې او نورو ملکونو د حماس حمله ترهګري بللې او حماس یې ترهګر تنظیم ټاکلی دی. اسرایل سره د چین تجارتي تعلقات په زیاتېدو دي.

السیسي د چین ستاینه وکړه چې په غزه کې په سمدستي ډول د ډز بندۍ او د خود مختار فلسطیني ریاست د قیام غوښتنه کوي. چاینا عرب کواپرېشن فورم په ۲۰۰۴ کې د چین او عرب ملکونو ترمنځ د رسمي روابطو دپاره جوړ کړی شوی دی.

اسرایلي پوځ د زیارت، پنجشنبې، په ورځ وویل په وېسټ بېنک کې یې دوه عسکر د موټر د ټکر په حمله کې وژل شوي دي. ای پي خبري اداره وايي په غزه کې د اسرایل او حماس جنګ د شروع کېدو راهسې په وېسټ بېنک کې په تشدد کې په داسې حال کې اضافه شوې چې اسرایلي ځواکونه د وسله والو د لټون دپاره په سیمه کې په فلسطیني کلیو کې چاپي وهي چې له امله یې د ۵۰۰ نه زیات فلسطینیان وژل شوي دي.

په غزه کې فلسطینیانو د شورو، چهارشنبې، په ورځ د سختې جګړې رپورټونه ورکړل او د اسرایل پوځ وویل مصر سره د غزه د ټول سرحد واک اختیار یې ترلاسه کړی دی.

اسرایلي پوځ د زیارت، پنجشنبې، په ورځ وویل تېره ورځ یې د ۵۰ نه زیاتو هدفونو په ضد هوايي حملې کړي دي.

اسرایلي ځواکونو د غزه په جنوب کې په رفح، په شمال کې په جبلیه او د غزه په مرکزي برخو کې د ځمکنیو عملیاتو ذکر هم وکړو.

د امریکې خارجه وزیر اېنټني بلېنکن د شورو، چهارشنبې، په ورځ وویل پکار ده چې اسرایل زر تر زره د جنګ نه پس د حالاتو دپاره منصوبه ولري. بلېنکن وویل که داسې نه وي نو حالات به د انتشار په لوري لاړ شي.

په منځني ختیځ کې د سولې دپاره د ملګرو ملتونو مسول چارواکي هم وویل جنګ د ختمولو دپاره پکار ده چې سیاسي تګلاره هم په ځای وي.

بلخوا، الجزایر د متحده قومونو سېکیورټي کاونسل یا امنیتي شورا ته د یو قرارداد مسوده وړاندې کړې چې په کې غوښتنه شوې چې په رفح کې دې د اسرایل پوځي عملیات په سمدستي ډول ودرول شي. دا غوښتنه د می په ۲۴ نېټه د انصاف د نړیوال عدالت د عبوري حکم سره هم سمون خوري.

د اسرایل وزیراعظم بېنجمن نېټن یاهو دا خبره تکراروي چې حماس د ختمولو دپاره په رفح کې عملیات ضروري دي او دا چې د حماس ځینې ډلې اوس هم په رفح کې وجود دي.