د وېسټ اندیز بارباډوس ښار په برېج ټاون کرکټ میدان کې نن د کوربه وېسټ انډیز او انګلستان کرکټ لوبډلو تر منځه لومړۍ یوه ورځنۍ لوبه کې که څه هم وېسټ انډیز د انګلینډ پرضد د زیاتو چهکو یا شپږیزو وهلو ریکارډ جوړ کړو خو دغه خوندوره لوبه د انګلینډ په ګټه تمامه شوه.
په یوه ورځنۍ لوبه (ون ډی) کې وړاندې د دې نه تر ټولو زیاتو شپږیزو ریکارډ د نیوزي لینډ لوبډلې سره وو، چا چې په کال ۲۰۱۴م کې هم د وېسټ انډیز پرضد یوه لوبه کې ۲۲ شپږیزې وهلې وې.
د ننۍ لوبې یوه بله خوندوره خبره د نن سباني کرکټ تر ټولو غوره لوبغاړي (بېټسمین) کرېس ګېل د وېسټ انډیزقامي ټیم ته بیرته راتګ او بیا د ۱۲ چهکو په مرسته ۱۳۵ منډې یا رنز جوړول وو.
د پېنځه یوه ورځني لوبو دغه سیریز په لومړۍ لوبه کې وېسټ انډیز ټاس یا پچه وګټله او د لومړي بېټنګ فیصله يې وکړه. کرېس ګېل او جی ډي کېمبل د لوبې پېل هغه شان وه نه کړه څنګه چې ناستو تماشبینو او د کرکټ مینه والو تمه لرله. دواړو ډیره په مزه منډې جوړولی او کېمبل په ۳۰ منډو جوړولو وسوځید. د هغه وروسته هوپ د کرېس ګېل سره ملګری شو او دواړه لوبه تیزه کړه.
دلوبې په منځنۍ برخه کې کرېس ګېل هغه لوبه شورو کړه چې د کومې لپاره په ګرده نړۍ کې پیژندل کیږي. نوموړي په ۱۲۹ بالونو ۱۳۵ منډې وهلې، په دغو کې ۱۲ شپږیزې او ۳ څلوریزې شاملې وی.
کرېس ګېل نن یو وارې بیا اوږدې اوږدې شپږیزې وهلي او ۶ ځلې يې بال د ګراونډ نه بهر ويشتلی یا ورک کړی. هر ځل د بال ورکیدو وروسته بیا لوبې له بل بال راوړل شوی.
د کرېس ګېل نه علاوه د وېسټ انډیز لخوا هوپ ۶۴، هېټمېر ۲۰، براوو ۴۰، کېپتان هولډر ۱۶ او نرس ۲۵ منډې جوړې کړې او انګلینډ ته يې د ګټې لپاره ۳۶۱ منډو هدف ورکړو.
د انګلینډ لخوا بېن سټوک او عادل رشید تر ټولو غوره بالنګ وکړو دواړو د وېسټ انډیز درې درې لوبغاړي وسوځول. د انګلینډ لخوا معین علي تر ټولو زیات رنزونه ورکړل او په مقرره ۱۰ ورونو کې يې ۸۵ منډې ورکړي. په معین علي ۹ شپږیزې هم لګیدلي.
د ۳۶۱ منډو په حدف کې بیا د انګلینډ شورو هم ډیره خوندوره وه او اوپنرانو جېسن راېی او جاني بېرسټو په ۱۰ اورونو کې د ۹۱ منډو پارټنرشپ جوړ کړو. په ۱۰ماوور کې د جاني بېرسټو د اوټ کیدو وروسته جی رووټ د جېسن رايي سره ملګری شو او دواړه ډیره غوره لوبه وکړه.
د انګلینډ اوپنر جېسن راېی په ۸۵ بالونو ۱۲۳ منډې جوړې کړې چې پکې ۳ شپږیزې او ۱۵ څلوریزې وې. په ۲۶م اوور کې چې د انګلینډ سکور ۲۰۵ وو نو جېسن راېی وسوځید او د انګلینډ کېپتان اېین مورګن او رووټ په پارټنر شپ کې لوبه د وېسټ انډیز د لاسو ووتله. مورګن په ۵۱ بالونو ۶۵ منډې جوړې کړې او وروسته بیا جی رووټ هم په ۱۰۲ منډو جوړولو وسوځید خو د هغه وخته پورې لوبه د انګلینډ ګټې ته نژدې وه.
د وېسټ انډیز لخوا هولډر غوره بالنګ وکړو او ۲ وکټې يې ترلاسه کړې. بشو او تهامس د انګلینډ یو یو لوبغاړی وسوځوو. د انګلینډ لوبډلې د ۳۶۱ منډو هدف په ۴۸.۴ اوورنو کې د ۴ لوبغاړو په سوځیدو پوره کړو.
په ننۍ لوبه کې کرېس ګېل ۶ ځلې بال د ګراونډ نه بهر ويشتلی او هر ځل د لوبې د پاره بل بال راوړل شوی خو د انګلینډ جېسن راېی د لوبې غوره لوبغاړی یا مېن اف دي مېچ ټاکل شوی. د دواړه لوبډلو تر منځه به دویمه لوبه هم په برېج ټاون کې د جمعې په ورځ کیږي.
د جون په میاشت کې د نړیوال جام یا ورلډ کپ وړاندې اکثره لوبډلې خپلې روانې لوبې د نړیوال جام د تیارۍ ګڼي او غواړي په دې لوبو کې غوره لوبغاړي وټاکي.
