په غزه کې او د لبنان په سرحد د اسرایلي ځواکونو او د عرب وسله والو جګړې د جمعې په ورځ ودرېدلې وې خو رپورټونه وايي تاوتریخوالی موجود و او داسې ښکاري چې یو فریق هم په ورستیو ورځو کې راپارېدلي تشدد ته دوام نه ورکول غواړي.
د جمعې په ورځ وختي په اسرایل د راکټونو د حملو په جواب کې اسرایلي ځواکونو په غزه او لبنان کې هوايي بمباري وکړه.
اسرایل په فلسطیني وسله والې ډلې حماس د راکټونو د حملې الزام ولګولو.
د وي او ای رپورټ وايي که څه هم په جګړه کې خاموشي وه خو دا ویره هم وه چې د اسرایل او فلسطینیانو جګړه په پراخه کچه زیاتېدلی شي.
په وېسټ بېنک کې دوه اسرایلي خوېندې په ډزو و وژل شوې او مور یې زخمي شوه. د وسله وال لټون دوام لري.
حماس د حملې ستاینه وکړه خو ذمه واري یې نه ده منلې. په الاقصا جومات کې د جمعې د لمونځ په موقع د تشدد څه پېښه و نه شوه. دوه ورځې وړاندې په الاقصا کې د اسرایلي پولیس او فلسطینیانو په جګړه کې ګڼ شمېر کسان زخمیان شوي او ګرفتار کړی شوي وو.
د اسرایلي پوځ یو ترجمان وویل هېڅ څوک هم دا وخت نه غواړي چې تاوتریخوالی زیات شي. هغه وویل د اسرایلي پوځ به د خاموشۍ جواب په خاموشۍ ورکوي. د یوې فلسطیني وسله والې ډلې چارواکې رویټرز خبري ادارې ته وویل چې تنظیم یې امن برقرار ساتلو ته تیار دی.
د دې نه وړاندې د جمعې په ورځ اسرایلي پوځ وویل په غزه کې یې د حماس د وسلې د تیارولو او زمین دوز مرکزونه په هوايي بمبارۍ وويشتل.
اسرایلي پوځ وویل په جنوبي لبنان کې یې هم د جمعې په ورځ د حماس په تنصیباتو هوايي بمباري وکړه. د لبنان یو ټېلې وژن وویل چې د ساحلي ښار صور په جنبوبي برخه کې د چاودنو غږونه واورېدل شوو.
اسرایلي پوځ وویل د لبنان او غزه سره په پولو د هر ممکنه صورتحال دپاره اضافي عسکر ګمارلي دي.
اسرایل د متحده قومونو نه وغوښتل چې د حملو په سر دې د حماس او د لبنان غندنه وکړي.
د اسرایل وزیراعظم بېنجمن نېټن یاهو د جمعې په ورځ وویل چې په اسرایل حمله کونکي په دروند قیمت ادا کوي.
که څه هم امریکا، برطانیه او متحده قومونو د اسرایل د خپلې دفاع د حق احترام کوي خو په اسرایل یې غږ کړی چې د زغم نه دې کار اخلي.
یادونه: د دې خبر معلومات د وي او ای د هغه رپورټ نه اخیستل شوي چې په کې د رویټرز، ای پي او ای اېف پي خبرنګاري شامله ده