د پاکستان د پخواني وزيراعظم عمران پرنسپل سيکرټري او د خېبرپښتونخوا پخوانی چيف سيکرټري اعظم خان د زیارت، چهارشنبې، په ماښام د اسلام اباد څخه بې درکه شوی دی. د اسلام اباد پوليسو ويلي، د اعظم خان د بې درکۍ مقدمه د اغوا يا تښتونې د مادې 365 ت پ لاندې په کوهسار تاڼه کې درج شوې ده.
پخواني وزیراعظم عمران خان پرون ماښام په ټويټر ويلي،
"اعظم خان زما پرنسپل سيکرټري پاتې شوی د پرون ماښام څخه بې درکه دی. هر هغه تن د چا باره کې دا تاثر دی چې ماته نزدې وو هدف جوړول کيږي".
د اعظم خان خوريي محمد سعيد خان اسلام اباد پوليس ته د بې درکۍ رپورټ او مقدمې خواست کړی دی.
عمران خان د خواست کاپي ټويټ کړې ده.
په خواست کې ویل شوي، "22 ګرېډه افسر او د پخواني وزیراعظم پرنسپل سيکرټري د 15 جون په ماښام د اسلام اباد په اېف-6 علاقه کې د خپل کور څخه وتلی او بيا بيرته نه دی ستون شوی".
په خواست کې زیاته کړی شوې، "د اعظم خان خپل موبايل بند او د هغه د معلوماتو دپاره په ممکنه نورو نمبرو رابطې شوي خو څه درک یې نه دی شوی ځکه د هغه د بې درکۍ يا تښتولو مقدمه دې درج شي".
پرون ماښام د اسلام اباد پولیسو ویل وو، "د اعظم خان د بې درکۍ په حواله به قانوني کارروايي په عمل کې راوستلی شي او وروسته یې بيا په نهه نیمې بجې د اسلام اباد پوليسو ویلي مقدمه درج شوې ده".
اعظم خان د پخواني وزیراعظم عمران خان د پرنسپل سيکرټري جوړېدو نه وړاندې د خېبرپښتونخوا چيف سيکرټري او قبايلي سيمو مرستيال چيف سيکرټري، او په نورو مهمو څوکو پاتې شوی وو.
نوموړی د کال 2018م راهسې د عمران خان د حکومت ختمېدو پورې د هغه پرنسپل سيکرټري وو.
عمران خان چې د بې باورۍ د تحریک د لارې د وزيراعظمۍ څخه لرې کړی شوی او هغه تور لګولی وو د سايفر د سازش لاندې لرې کړی شوی، بيا په دغه حواله ځينې مبينه اډيوز په پاکستاني مطبوعاتو مخې ته راغلې وې د اعظم خان نوم هم په هغو خبرو کې اخستل شوی وو.
