د غزه د صحت وزارت د ګل، دوشنبې، په ورځ وویل په سیمه کې د حماس خلاف د اسرایل په جنګ کې د وژل شویو کسانو شمېره د ۴۵۰۰۰ نه زیاته شوې ده.
وزارت وویل په جنګکې ۱۰۷۰۰۰ فلسطینیان زخمیان شوي هم دي.
د غزه د صحت وزارت وايي وژل شوي زیاتره ښځې او ماشومان دي خو په دې اړه معلومات نه واضحه کوي چې د وژل شویو کسانو څخه څومره وسله وال دي.
اسرایلي چارواکي وايي په غزه کې يې د زرګونو په شمېره کې وسله وال وژلي دي.
د غزه د صحت وزارت د مرګ ژوبلې په اړه د روزانه په معلوماتو کې وویل تېره ورځ ۵۲ کسان وژل شوي وو.
د شهري دفاع او د هسپتال د چارواکو په وېنا د اتوار، یکشنبې، په ورځ اسرایل په شمال کې په غزه ښار، په جنوب کې په خان یونس او د غزه په مرکزي سیمه کې په النصیرت کېمپ حملې وکړې.
د اسرایل پوځ وویل د اتوار، يکشنبې، د ورځ په عملیاتو کې په النصیرت کېمپ کې د حماس په کمانډ او کنټرول مرکز حمله هم شامله وه.
اسرایل وايي حماس د ملکي ابادۍ نه عملیات کوي خو فلسطینیان او د انساني حقونو تنظیمونه وايي اسرایلي پوځ ملکي خلک زیان ته د محفوظ ساتلو دپاره مناسب ګامونه نه پورته کوي.
د اسرایل او د حماس جنګ د تېر کال د اکتوبر په اوومه نېټه په اسرایل د حماس د حملې نه شروع شوی دی. په حمله کې په اسرایل کې تر ۱۲۰۰ پورې کسان وژل شوي دي او حماس تر ۲۵۰ پورې نور کسان یرغمال نیولي وو.
د حملې په جواب کې اسرایل په غزه کې د حماس خلاف جنګ شروع کړی دی.
امریکې، برطانيي، يورپين یونین او ځینو نورو ملکونو حماس ترهګر تنظیم ټاکلی دی.
Forum