حجاب په سر د امریکې د باسکټ بال دوه لوبغاړې نورو مسلمانو مېرمنو د حوصلې ورکولو امید کوي

د امریکې د نارت کېرولاینا یونېورسټۍ جنا عیسا او د ارواین یونېورسټۍ دېیابا کوناتی په قومي کچه د یونېورسټو د باسکېټ بال اېن سي ای ای مقابلو کې د لوبېدو په وخت حجاب اغوستی وي او دا ډول دواړه د ملک په کچه د لوبو په مېدان کې د مسلمان مېرمنو شرکت څرګندوي او امید کوي چې نورې مسلمان مېرمنې به د دوی نه حوصله ومومي.

د اېن سي ای ای مقابلې په امریکا کې په رېکارډ شمېره کې خلک ګوري او د عیسا او کوناتی په دې مقابلو کې شرکت ځان ته توجه را اړولې ده.

کوناتی وايي د باسکېټ بال په مېدان چې د حجاب په سر مسلمانې مېرمنې په لوبه ویني نو خوشحالېږي ورته.
هغه وايي یو وخت و چې هغې به د نورو خلکو نه حوصله اخیستله خو اوس نور خلک هغې ته ګوري. "زه په دې خوشحالېږم."

کوناتی د بلقیس عبدالقادر ستاینه کوي.

د اېن سي ای ای په تاریخ کې عبدالقادر وړمبۍ مېرمن وه چې لس کاله مخکې يې د کالج د فټ بال په دې ټورنامنټ کې حجاب اغوستی و. عبدالقادر د انټرنېشنل باسکېټ بال فېډرېشن په دې فېصله کې هم اهم کردار ادا کړی چې په کال ۲۰۱۷ کې يې په باسکېټ بال کې په لوبغاړو د حجاب پابندي يې لرې کړه.

د کنېټيکټ یونېورسټۍ پخوانۍ لوبغاړې بتولي کمارا چې اولنۍ مېرمن ده چې د سپېن په اېل اېف ا مقابلو کې يې حجاب اغوستی و، وايي خوشحالېږي چې عیسا او کوناتی د هغې د مذهب نمایندګي کوي.

"دا په حقیقت کې ډېره حوصله ورکوونکي خبره ده چې ګورم دوه مسلمانې لوبغاړې د ټولو نه په اوچته سطح مقابلې کوي،" کمارا وویل.

هغې وویل دا په ټوله دنیا کې جینکو ته دا قوي پېغام ورکوي چې که دوی په اقتصادي توګه د هرې طبقې څخه وي، که نسل او ثقافت یې څه هم وي، دوی هم د لوبو مېدان ته راوتلی شي.

کوناتی په پلرني ملک فرانس کې د لوبېدو خواهش هم لري خو په موجوده وخت کې د فرانس باسکېټ بال فېډرېشن په داسې شیانو پابندي لګولې چې مذهبي او یا سیاسي معنې لري.

هغه وايي دا د افسوس خبره ده چې فرانس به د اولېمپېک مقابلو کوربتوب کوي خو هغه به په کې په حجاب د بندیز له امله شرکت نه شي کولی.

عیسا او کوناتی د یو بل سره نه دي لیدلي.
عیسا وویل کله چې خبر شوه چې یوې بلې ښځې هم حجاب اغوستی دی نو خوشحاله شوه.

د اېن سي ای ای د مقابلو نه مخکې د عیسا لوبې کتلو دپاره د مسلمانو جینکو یوه ډله ورغلې وه، وايي هغه د نورو جینکو دپاره د رول ماډل یا رهنما حېثیت لرلو."ما ته نه وه معلومه چې یو تن دومره اثر لرلی شي." عیسا د مصر نه د امریکې د نارت کېرولاینا ریاست یونېورسټۍ ته راغلې ده.

د عیسا پلار د نارت کېرولاینا سټېټ یونېورسټۍ نه د پي اېچ ډي یا د ډاکټرۍ ډګري اخیستې او د هغې دوو خوېندو هم په دې یونېورسټۍ کې سبق وېلی دی.