د امریکې د خارجه وزیر په حېث مرکزي اېشیا ته د خپل لومړي سفر په مهال اېنټني بلېنکن د نهې، سه شنبې، په ورځ د قزاقستان مشرانو سره ولیدل او د هېواد ازادۍ، خودمختارۍ او علاقايې سلامتیا د ملاتړ ژمنه يې وکړه.
د قزاقستان سرښار استانه کې د قزاقستان خارجه وزیر مختار تېلوبوردي سره د ملاقات په موقع بلېنکن وویل قزاقستان د ملاتړ په اړه د هغه ژمنه په موجوده وخت کې ډیر اهمیت لري.
مرکزي اېشیا ته د سفر نه وړاندې بلېنکن ویلي وو چې د صدر جوبایډن حکومت د سيمې پېنځو ملکونو، قزاقستان، کرغزستان، ترکمنستان، ازبکستان او د تاجکستان د ازادۍ او د خودمختارۍ ملاتړ کوي.
د پخواني شوري اتحاد دغه ملکونه روس سره کلک سیاسي، اقتصادي، سماجي او ثقافتي تعلقات لري.
بلېنکن به د نهې، سه شنبې، په ورځ د سي فایو پلس ون په عنوان خبرو کې شرکت کوي. د مرکزي اېشیا او د امریکې په شمول د مکالمې هدف په سیمه کې همکارۍ ته ترقي ورکول دي. د خبرو د دغه بهیر بنیاد په ۲۰۱۵ کې کښېودل شوی دی.
د قزاقستان صدر قسیم جومرات ټوکاییف سره ملاقات د شروع کولو په وخت بلېنکن وویل غواړي چې د مرکزي اېشیا د ملکونو سره سیمه نوره نژدې کولو په لړ کې په عملي اقداماتو خبرې وکړي.
امریکايي مامورین وايي مرکزي اېشیا ته د بلېنکن د دورې مقصد د سیمې ملکونو سره د امریکې تړون نور زیاتول او په اوکراین د روس د یرغل وروسته روس یوازې کول دي.
د وي او ای رپورټ وايي د جمهوریت پلویان غواړي چې امریکې دې په سیمه کې د اصلاحاتو، د احتساب، د قانون د عملدارۍ او د ازادۍ په پرمختک کې کردار ادا کړي چې سيمې د ترقۍ او ثبات دپاره ضروري ګامونه دي.
یادونه: د دې خبر معلومات د وي او ای خبریالې نوبهار اماموه د رپورټ ترڅنګ د ای اېف پي خبري ادارې نه هم اخیستل شوي دي
