د جون په میاشت کې په امریکا کې د تېلو او خوراک قيمتونه او د کورونو کرای په تېرو څلوېښتو کلونو تر ټولو اوچتې کچې ته رسېدلې وې چې له امله يې فېډرل رېزرو یا مرکزي بېنک په افراط زر د قابو موندلو دپاره د بېنکونو په قرضو د سود شرح نوره هم زیاتولی شي.
د اېسوسي اېټېډ پرېس خبري ادارې ترمخه، حکومت د شورو، چهارشنبې، په ورځ جاري کړی شویو شمار شمېرو کې وویل د تېر کال په مقابل کې صارفینو دپاره په قيمتونو کې د نهه اشاریه یو فيصد اضافه وشوه چې د ۱۹۸۱ راهسې په دولسو میاشتو کې د قيمتونو تر ټولو زیاته اضافه ده.
د میاشتې په حساب، د می نه تر جون پورې په قیمتونو کې یو اشاریه درې فیصد اضافه شوي وه.
ای پي وايي ګرانۍ هغه امریکایان متاثر کړي دي چې د بنیادي ضرورت د شیانو په قيمتونو کې د اضافي سره مخامخ شوي دي خو په امدن کې یې زیاتوالی نه دی شوی.
رپورټ وايي ګرانۍ د کم امدن لاطيني او تور پوستې امریکایان تر ټولو زیات متاثر کړي دي چې د امدن زیاتره برخه يې د کور، تګ راتګ او د خوراک په شان د بنیادي ضرورت په شیانو مصرف شي.
ځينې اقتصاد پوهان وايي ګراني عروج ته رسېدلې او د وخت سره به کمه شي لکه د نهې، سه شنبې، تر ورځې پورې د تېلو قیمتونه د جنون په میاشت کې د پېنځو ډالرو نه په اوسط کچه څلور ډالره او شپږ شپېته سېنټو ته کم شوي دي. او اټکل کېږي چې د تېلو بېعې به په اګست او سېپټمبر کې نورې هم کمې شي.
د ای پي د رپورټ ترمخه په موجوده ګرانۍ کې د کورونو قیمتونه د بل هر څه نه زیات ختلي دي چې د ګڼ شمېر خلکو دپاره یې د کور اخیستلو په لړ کې مشکلات راولاړ کړي دي.
رپورټ وايي په داسې حال کې چې کور اخیستل په اقتصادي توګه د ډیرو خلکو د وس نه بهر شوي دي، د کرای د کورونو طلب زیات او کرایې زیاتې شوي دي.
د تېر کال په مقابل کې د سږ کال د می په میاشت کې په امریکا کې د یو کور اوسط قیمت د څوارلس اشاریه اته فیصد په شرح ۴۰۷۶۰۰ ته رسېدلی دی. د نېشنل اېسوسي اېشن اف ريېلټرز د شمېرو ترمخه د کال ۱۹۹۹ راهسې دا د کورونو په قیمت کې تر ټولو زیاته اضافه ده.
یادونه: د دې خبر معلومات د ای پي خبري ادارې نه اخیستل شوي دي
