په پاکستان کې په جبري توګه د لادرکه کسانو د مقدمو د هواري کمېشن سپريم کورټ کې جمع کړي خپل مياشتني رپورټ کې ويلي چې د مارچ میاشت کې د کمېشن سره د جبري لا درکيو 18 نوې مقدمې درج شوي دي.
رپورټ وايي په دغه مياشت کې 18 لا درکه کسان هم خپلو کورونو ته ستانه شوي دي.
د لا درکه کسانو د موندنې د سرکاري کمېشن لخوا سپريم کورټ ته ورکړی شوي رپورټ کې ویل شوي چې کمېشن د مارچ میاشت کې د 27 لا درکه تنانو درک لګولی دی او تېره مياشت 33 یې داسې مقدمې راغونډې کړي چې د جبري لا درکيو نه وې.
رپورټ کې زياته کړې شوې ده چې په تېره میاشت کې 18 بې درکه کسان خپلو کورونو ته ستانه شوي دي او 8 لا درکه تنان په بېلابېلو جېلونو کې دي او يو تن د پوځ د څار لاندې حراستي مرکز کې پروت دی.
په پاکستان کې په جبري توګه د لا درکه تنانو د حقونو لپاره د کار کوونکي غېر دولتي تنظيم ډیفنس آف هيومن راېټس مشره امنه مسعود جنجوعه سپريم کورټ کې د جمع کړی شوي رپورټ په اړه وايي:
"د ډیفنس اف هېومن رايټس لخوا زه سپريم کورټ ته خواست کوم چې د هغو کسانو نومونه دې مونږ ته هم راکړی شي چې د کمېشن په وېنا خپلو کورونو ته ستانه شوي دي، مونږ به وګورو چې واقعي دغه کسان کورونو ته ورغلي او اېا رښتيا داسې دي او که نه".
د لا درکه کسانو د مقدمو د هواري لپاره جوړ کمېشن په خپل رپورټ کې وېلي چي د مارچ میاشت کې ورته د جبري لا درکيو 18 نوې مقدمې ترلاسه شوي دي او اوس مهال د جبري لا درکيو 2،302 مقدمې د هېواد په مختلفو عدالتونو کې د ځنډ لاندې دي.
رپورټ کې راغلي چې کمېش ته د اپریل تر اولنۍ نېټې پورې په مجموعي توګه 10،185 مقدمې رسیدلي دي چې په هغې کې کمېشن تر دغې مودې پورې 7868 مقدمې مکمل کړې دي.
امنه مسعود جنجوعه د کمېشن سره د جبري لا درکيو د ځنډ ښکار مقدمې ډېرې بولي اؤ وایي، دا شمېرې زما په خيال ډېرې کمې دي د ځنډ ښکار مقدمو شمېره د دوو زرو نه سېوا ده.
له دې وړاندې د لا درکه تنانو حکومتي کمېش د پاکستان سپريم کورټ کې جمع کړب شوي رپورټ کې ويلي وو چې يوازې د کال 2024 په فرورۍ مياشت کې 42 نورې د لا درکه تنانو مقدمې ورسره درج شوې وې.
په پاکستان کې د لا درکه بلوچانو، پښتنو او د بشري حقونو فعالين د خلکو د جبري لا درکيو تور د پاکستان د پوځ په استخباراتي ادارو پورې کوي خو پوځ او حکومت دا تورونه ردوي او وايي کېدای شي چې لا درکه کسان د بلوچ بېلتون پالو ډلو په ليکو کې شامل شوي وي،قانون نافذ پځای کوونکو ادارو سره نښتو کې وژل شوي او یا هم افغانستان ته تښتېدلي وي.
Forum