د هندوستان د عامو انتخاباتو وړمبی پړاو سر ته ورسېدو

په هند کې د عمومي انتخاباتو لمړی پړاو د اپریل په 19 مه نیټه د جمعې په ورځ سر ته رسیدلی او د هند د ټاکنو کمېشن ویلي په 21 ریاستونو کې په مجموعي توګه په 102 حلقو باندې ووټرانو د خپلې خوښې امیدوارانو ته ووټونه ورکړل.

روېټرز خبري اداره وايي په لمړي پړاو کې تر 60 فیصده پورې ووټرانو خپلې رای ورکړي دي.

په لوک سبها یا د پارلېمنټ په زېلي اېوان کې ټولې څومره چوکۍ دي ؟

الېکشن کمېشن وايي په هېواد کې د ټولو رجسټرډ شوو ووټونو شمیره څه د پاسه 970 میلینه ده او د لوک سبها لپاره به په ټولو 543 چوکیو په 7 پړاونو کې عمومي ټاکنې کېږي چې تر جون اولنۍ نیټې پورې به سر ته ورسي او الېکشن کمېشن به د جون په څلورمه نیټه د حتمي نتیجو اعلان وکړي.

د هند د ټاکنو د کمېشن د تفصیل ترمخه د لوک سبها د باقي شپږو پړاونو ټاکنو په لړ کې به د دویم پړاو ټاکنې د روانې میاشې به 26 مه نیټه، دریم پړاو په اوومه مۍ ، څلورم پړاو د مۍ به 13مه نیټه ، پنځم پړاو د مۍ په 20 مه ، شپږم پړاو د مۍ په ۲۵ او اخیری او اووم پړاو د جون په اولنۍ نیټه سر ته ورسي.

د هند د ټاکنو په اړه قانون وايي چې د هغه ګوند امیدوار به د هېواد نوی منتخب وزیر اعظم وټاکل شي چې په لوک سبها کې ورسره د 272 چوکو اکثریت وي .

په کومو ریاستونو کې ټاکنې وشوې ؟

روېټرز خبري اداره د هندي چارواکو له قوله وايی چې نن د جمعې په ورځ د اتر پردیش، تامل ناڈو، اتراکهنډ، مني پور، ميګهالیه، اسام، مهاراشټرا، راجسهتان، مغربي بنګال، ریاستو ترڅنګ په سرښار نوي دلي کې او د هند د انتظام لاندې د کشمیر په ځینو حلقو کې خلکو ووټونه ورکړل.

په ټاکنو کې دوه غټ اتحادونه او دعوې

د امیدوار په حیث نریندرا مودي په دریم ځل د هېواد د وزیر اعظم د چوکۍ امیدوار دی او د هند مطبوعات وايي چې دده ګوند بهارتیه جنتا پارټۍ او ملګرو اتحادیانو یې د نېشنل ډیموکرټیک الاینس د لارې په لوک سبها کې ځان ته تر 400 پورې د پارلیماني چوکو ګټلو هدف اېښودې دی.

بل پلو ددوی مخالف اتحاد انډین نېشنل ډویلپمنټل الاینس دعوه کوی دوي به هېواد کې یو کامیاب انتخابي هم د لارې ولس ته خپله مترًقي ایجنډا ور وړاندې کړې ده او هیله یې څرګنده کړې ده چې دا ځل به د بي جی پي له واکه بهر ساتلو کې کامیابه شي.

د کال 2019 په ټاکنو کې د نریندرا مودي ګوند بهارتیه جنتا پارټۍ په پارلیمان کې ټولې 303 چوکۍ تر لاسه کړې وې او د هېواد بل لویې ګوند کانګرس یواځې 52 چاوکیو باندې بریا تر لاسه کړې وه. راهول ګاندي د کانګرس د یو اهمه لیډر په حیث پېژندل کېږي دده مور او د ګاندهي خاندان اوسنۍ مشره سونیا ګاندهي دا ځل په ټاکنو کې برخه نه اخلي.

د ووټونو په مهال د امنیت حال

چارواکي وايی چې په زیاتره سیمو کې د لمړي پړاو ټاکنې په مجموعي توګه په پرامنه ماحول کې تر سره شوي خو زیاتوي د هېواد په غربي بنګال او مني پور سیمو کې د ووټونو په وخت د تشدد ځینې پېشې رپورت‌ شوي دي. چارواکي وايي پېشې د سیاسي ګوندونو د کارکونکو ترمنځه شوي خو امنیتي ادارو پې زر قابو موندلی و.