د پاکستان حکومت ویلي هندوستان سره یې د سفارتي تعلقاتو د کمولو او د دوه اړخیز تجارت د ځنډولو فیصله کړې ده. پاکستان دا هم وویل چې د اگست په ١٥ د هندوستان د ازادۍ ورځ به د تورې ورځ په توگه لمانځي.
پاکستان د اهند په اړه د دغو گامونو اعلان د شورو، چهارشنبې، په ورځ د یوې غونډې وروسته وکړو.
د نېشنل سکیورټي کمېټي یا د قامي سلامتیه د کمېټۍ د غونډې مشري وزیراعظم عمران خان کوله چې پکې اعلا حکومتي او پوځي مامورین ناست وو.
د غونډې وروسته، د عمران خان د دفتر څخه جاري شوي بیان کې وویل شو چې پاکستان به هندوستان سره د سفارتي تعلقاتو کچه ټیټه کړي، دوه اړخیزه تجارت به ورسره وځنډوي، د دواړو هېوادونو ترمنځ نورو انتظاماتو ته به بیا کتنه کوي، معاملات به ملگرو ملتونو او د ادارې امنیتي شورا یا سکیورټي کاونسل ته وړاندې کوي، د پاکستان د ازادۍ ورځ به د کشمیریانو سره د یوالې په توگه لمانځي او د هندوستان د ازادۍ ورځ به د تورې ورځ په توگه نمانځل کیږي.
د وزیراعظم د دفتر په بیان کې وویل شو چې په خارجي هیوادونو کې د پاکستان سفارتخانو ته وېل شوي دي چې د هندوستان "بې رحمه نسل پرست رژیم (حکومت) منصوبې او د انساني حقونو سرغړونې په ډاگه کړي."
بیان وویل وزیراعظم پوځ ته د بیدار وسیدو امر وکړو.
د هندوستان حکومت د خپل انتظام دلاندې کشمیر خصوصي آئیني حېثیت ختم کړی. د خصوصي حېثیت دلاندې د هندوستان د انتظام دلاندې کشمیر ته په یو شمیر معاملاتو کې خپلواکي ترلاسه وه.
د وزیراعظم نرندره مودي حکومت د فیصلې وروسته په هندي کشمیر کې گرځبندیز پرځای کړی شوی او د انټرنیټ، ټېلې فون او موبایل نظام تړل شوی دی. په سیمه کې په لویه شمیره کې امنیتي ځواکونه پرځای کړی شوي دي.
او په واشنگټن کې د امریکې خارجه وزارت، سټیټ ډپارټمنټ، وویل هندوستان د کشمیر خصوصي حېثیت په ختمولو کې خو نه واشنگټن خبر کړی و او نه یې د واشنگټن سره په دې اړه څه صلاح کړې وه.
د شورو، چهارشنبې، په ورځ سټېټ ډپارټمنټ د ټوېټر دلارې وویل چې دا مطبوعاتي رپورټونه صحیح نه دي چې گنې هند د کشمیر په اړه خپلې فیصلې نه امریکا خبر کړې وه او په دې لړ کې یې ورسره صلاح مشوره کړې وه.
