لاس رسیدونکی لینک

Breaking News

د هند د سپریم کورټ ججانو ویلي مسلمانانو ته د "قتل عام" د ګواښونو تحقیقات به کوي


نرېندره مودي

د هندوستان د سپریم کورټ دریو ججانو (قاضیانو) ویلي په اتراکنډ ریاست کې د مسلمانانو د مبینه "قتل عام" په اړه د سخت دریځه هندوانو د ګواښونو تحقیقات به کوي.

د وي او ای د رپورټ ترمخه، د هندوستان د سپریم کورټ ججانو دغه اعلان د عدالت د یو پخواني جج په خواست کړی چې پکې د هندو مذهب د یو شمېر مشرانو د محاکمه کېدو غوښتنه شوي ده.

د رپورټ ترمخه په خواست کې وېل شوي هندو مذهبي مشرانو په مبینه توګه د "مسلمانانو د قتل عام" غوښتنه کړې.

د رپورټ ترمخه د مسلمانانو په اړه دغه مبینه خبرې تېره میاشت د هندوانو په یوه مذهبي غونډه کې شوي دي.

د وي او ای رپورټ وايي په سوشل میډیا شریک شوی یو وډیو ښيي په غونډه کې یوه ښځه وايي که سل کسان عسکر جوړ شي او د دوی دوه مېلین کسان ووژني "مونږ به بریالي شوو" او هم په دې تکلاره "تاسو د سناتن دهرم د تحفظ جوګه کېدلی شئ." د رپورت ترمخه سناتن دهرم د هندو مذهب انتهايي شکل دی.

د هندوستان د عدالتي خبرونو وېب پاڼې "بار اېنډ بېنچ" ترمخه د سپریم کورټ پخوانۍ ججې انجانا پرکاش سپریم کورټ ته خپل خواست کې لیکلي چې دغه ډول ګواښونه نه یوازې د هندوستان یوالي ته خطر راولاړوي بلکې د هېواد د مېلینونو په شمېره کې د مسلمان شهریانو ژوندونه هم د خطر سره مخامخ کوي.

د وي او ای رپورټ وايي د 2014 راهسې په اتراکنډ ریاست د وزیراعظم نرندره مودي د بهارتیا جنتا پارټي حکومت کوي او په نرندره مودي دا تنقید کېږي چې د مسلمانانو د نسل وژنې د غږ په ضد یې څه نه دي ویلي.

د وي او ای رپورټ وايي د پاکستان وزیراعظم عمران خان په ټوېټر ویلي د نرندره مودي خاموشۍ دا پوښتنه راپورته کړې چې ایا بي جی پي (بهارتیا جنتا پارټي) د مسلمانو په اړه د دغې غوښتنې ملاتړ کوي؟

په هندوستان کې 190 مېلین مسلمانان دي چې د ملک د مجموعي یو اشاریه څلور بېلین ابادۍ څوارلس فیصد برخه ده.

د وي او ای رپورټ‌ وايي که څه هم د وزیراعظم نرېندره مودي بي جی پي پارټۍ په انتخاباتو کې واضحه اکثریت ترلاسه کړی دی خو بیا هم پې د اقلیتونو او په خصوصي توګه د مسلمانانو په ضد د مذهبي کرکې راپارولو تور پورې کېږي.

بي جی پي دا تورونه ردوي. په هندوستان کې د مذهب د ازادۍ په اړه د امریکې خارجه وزارت د کال 2020 په خپل رپورټ کې ویلي په ورستي کلونو کې د هندوستان په بېلا بېلو برخو کې په شل هاو کسان چې زیاتره پکې مسلمانان دي د مذهبي اختلافاتو په بنیاد وژل شوي‌ دي. د هندوستان د قانون دلاندې د مذهب په بنیاد دښمني خپرول جرم دی او ککړ تن ته پې پېنځه کاله د قید سزا کېدلی شي.

یادونه: د دې رپورت دپاره د اېسوسي اېټېډ پرېس خبري ادارې نه هم څه معلومات اخیستل شوي دي.

XS
SM
MD
LG