د ایران هغه ساینس پوهه چې د اسرایل په وېنا د ایران د پوځي اېټمي پروګرام مشر و د جمعې په ورځ مسلح حمله کوونکو د چاودېدونکو موادو او مشین ګن په حمله کې ووژلو. د ایران حکومتی ټېلې وژن دغه خبر رپورټ کړو.
د اېسوسي ېټېډ پرېس خبري ادارې ترمخه د ایران خارجه وزیر وویل د محسن فخريزادی په وژلو کې د اسرایل لاس لیدل کېږي خو نور تفصیل یې وړاندې نه کړو.
اسرایل په سمدستي ډول په دې اړه د څه وېلو نه ډډه وکړه خو د اسرایل وزیراعظم بېنجمن نېټن یاهو یو ځل په یو خبري کانفرنس کې د فخریزادی نوم اخیستی و. د ای پي رپورټ وايي په اسریل شک دې چې قریباً یوه لسیزه وړاندې یې د ایران اېټمي ساینس پوهان د هدفي وژنو په لړۍ کې وژلي.
د ایران حکومتي خبري ادارې وویل "مسلح ترهګر عناصرو" په فخريزادی حمله وکړه. هغه بیا په هسپتال کې مړ شو.
د فارس خبري ادارې ترمخه چې د پاسداران انقلاب ځواکونو سره نژدې ګنل کېږي په فخریزادی حمله د سرښار تهران په مشرق کې په ابسرد ښار کې وشوه. د عیني شاهدینو ترمخه لومړی چاودونه واورېدل شوه او بیا د مشین ګن ډزې وشوې. د رپورټ ترمخه په حمله کې هغه موټر په هدف شوی و چې فخریزادی پکې سور و. د فخریزادی محافظ په حمله کې زخمي شوی دی.
حکومتي ټېلې وژن په خپله وېب پاڼه د امنیتي ځواکونو یو تصویر وښودلو چې یو سړک یې بند کړي وي. د پېښې په اړه وډیو او تصویرانو کې یو نسان موټر لیدل کېږي چې په ګولو ویشتل شوی او نژدې په سړک وېنې پرتې دي.
په فخریزادی د حملې ذمه واري چا نه ده منلې خو حکومتي مطبوعاتو په فخریزادی کې د نېټن یاهو د دلچسپۍ یادونه وکړه.
ای پي وايي د ایران خارجه وزیر محمد جواد ظریف په اسرایل د ککړتیا شک څرګند کړو او په ټوېټر پېغام کې یې وژنهریاستي ترهګري وبلله. هغه وویل په حمله کې د اسرایل کردار لیدل کېږي.
په فخريزادی حمله د یو بل اېټمي ساینس پوهه مجید شهریاري د وژل کېدو لس کاله پوره کېدو په وخت شوي ده. ایران د شهریاري په وژنه هم اسرایل تورن کړی و.
ابسرد د سیاحت مرکز او د ایران تر ټولو لوی غر دماوند سره نژدې ښار دی چې زیاتره شته مند خلک پکې کورونه لري. ای پي وايي په سیمه کې د جمعې په ورځ سړکونه د کرونا وایرس له امله د معمول نه زیات خالي وو او په فخریزادی حمله په داسې وخت کې وشوه چې د خلکو ګڼه زیاته نه وه.
فخریزادی د اماد نومې منصوبي مشر و چې د اسرایل او غربي ملکونو په وېنا د اېټم بم د جوړولو د امکاناتو مطالعه یې کوله خو تهران وايي د اېټمي پروګرام مقصد یې پرامنه دی.
د ملګرو ملتونو د اېټي توانايي ادارې ايي ای ايي ای ترمځه د ۲۰۰۵ او ۲۰۰۹ ترمنځ ایران په کمپیوټر د اېټم بم ماډلې هم کتلې وې خو دا نامکمله وې.
