په داسې مهال چې امریکا په ایران د هېواد د اېټمي پروگرام په سر اقتصادي پابندۍ بیا پرځای کوي، د ایران خارجه وزیر محمد جواد ظریف به د برطانيي، چین، روس، فرانس او جرمني خارجه وزیرانو سره په کال ٢٠١٥ م کې ترسره شوي اېټمي معاهدې په اړه خبرې کوي.
د ایران حکومتي مطبوعاتو د نهې، سه شنبې، په ورځ په خپلو رپورټونو کې وویل د غربي هېوادونو د خارجه وزیرانو سره د جواد ظریف غونډه به د جمعې په ورځ د اسټریا سرښار ویانه کې کېدونکي ده.
امریکا هم د ایران سره شوي معاهدې فریق و خو صدر ټرمپ د لوظنامې نه د وتلو اعلان کړی دی. روس، چین، برطانیه، فرانس او جرمني د ایران ایټمي معاهده پرځای ساتل غواړي.
اېټمي معاهده پرځای ساتلو دپاره د ایران صدر حسن روحاني هم سفارتي کوښښونه کوي او دا هفته به د سوېټزرلینډ او د اسټریا سفر کوي.
صدر روحاني ویلي امید کوي چې د ایران سره معاهده پرځای ساتلو دپاره به یورپي هېوادونه په راتلونکو ورځو کې گامونه اعلان کړي.
صدر ټرمپ د مۍ په میاشت کې د معاهدې د وتلو اعلان کړی دی. د ایران سره شوي معاهدې هدف د دا خبره یقیني کول وو چې ایران اېټمې وسله ترلاسه نکړی شي. په بدل کې مغربي هېوادونو په هېواد لگولې اقتصادي پابندۍ نرمې کړې.
که څه هم ایران وايي د اېټمې پروگرام هدف یې وسله جوړول نه دي خو صدر ټرمپ وايي لوظنامې د وسلې په تکل کې د ایران مخه نشي نیولی. هغه ویلي د ایران د مزایلو په پروگرام دې هم پابندۍ ولگول شي او د هېواد سره دې بهتره معاهده لاس لیک کړی شي.
د گل، دوشنبې، په ورځ امرېکې د ایران د بېنکونو او د توانايي په نظام سختې پابندۍ د بیا پرځای کولو تگلاره اعلان کړه او وې یې ویل چې ایران باید د یو عادي ملک په رنگ رویه اختیار کړي.
یو امریکايي چارواکي وویل په ایران تر دې حده فشار زیاتول غواړي چې د تېلو امدن یې صفر شي.
په ایران د پابندو ترڅنگ امریکې خبردار کړی دی چې د ایران سره لېن دېن کونکو هېوادونو بابندې به هم بندیزونه ولگوي.
