اسرایل او حزب الله په یو بل د ډزې بندۍ د خلاف ورزۍ الزامات لګولي

اسرایل او حزب الله د زیارت، پنجشنبې، په ورځ په یو بل د ډز بندۍ د خلاف ورزۍ الزامات ولګول. د امریکې په ثالثۍ شوي ډزبندي یوه ورځ مخکې عملي کړي شوې وه.

اسرایلي پوځ وویل هوايي ځواک يې د لبنان په جنوب کې د حزب الله د راکټونو په ګودام حمله وکړه او په هغه مشکوکو موټرو يې ډزې وکړې چې د لبنان په جنوبي برخه کې يې مختلفو ځایونو ته تللي وو. اسرایل د موټرو حرکت د ډزبندۍ خلاف ورزي وبلله.

د حزب الله ډلې قانون ساز حسن فضل الله په اسرایل د اور بند د خلاف ورزۍ الزام ولګولو. هغه خبریالانو ته وویل اسرایل په هغه خلکو حملې کوي چې په سرحدي سیمو کې خپلو کلو ته ستنېږي. هغه زیاته کړه چې دا د اسرایل سرغړونې دي.

د لبنان پوځ هم په اسرایل د ډز بندۍ د خلاف ورزۍ الزام ولګولو او ویې وېل اسرایل یو شمېر ځله د معاهدې خلاف ورزي وکړه او د لبنان په بېلا بېلو ځایونو کې په مختلفو وسلو حملې وکړې.

د امن معاهده د شورو، چهارشنبې، په ورځ سحر وختي عملي شوي وه او د خلاف ورزۍ الزامات يې حساسیت څرګندوي.

د ډزبندۍ د معاهدې ترمخه اسرایل به د لبنان نه ځواکونه وباسي او حزب الله به د اسرایل د سرحد نه خپل وسله وال په شا کوي. په معاهده کې اسرایل ته لبنان نه د ځواکونو وېستلو دپاره ۶۰ ورځې ورکړی شوي دي. په دې وخت کې به یو فریق هم جنګي اپرېشنې نه کوي.

دا معاهده د امریکې او د فرانس په منځګړيتوب د ۶۰ ورځو دپاره شوې په دې امید چې دواړه فریقین به بالاخېر په مستقل ډول دښمني ختمه کړي.

د اسرایل او د حزب الله د ډزبندۍ د اعلان په وخت د امریکې صدر جوبایډن ویلي وو چې اوس به په غزه کې د حماس او د اسرایل ترمنځ د ډز بندۍ دپاره کار کوي.

په غزه کې د اور بند په اړه د بایډن د خواهش باوجود په سیمه کې جګړه دوام لرلو.

اسرایلي ځواکونو د زیارت، پنجشنبې، په ورځ د غزه په مختلفو برخو کې بمباري وکړه او د طبي امداد کارکوونکي وویل په بمبارۍ کې لږ تر لږه ۱۷ کسان ووژل شوو او اسرایلي عسکرو د غزه په مرکزي، شمالي او جنوبي علاقو کې بمباري زیاته کړه او ټېنکونو يې پېش قدمي وکړه.

د غزه په بېت لاهیا سیمه کې شپږ کسان په یو کور کې د اسرایل په هوايي بمبارۍ کې ووژل شوو او څلور کسان په خان یونس کې په اسرایلي حمله کې یو موټرسایکل د لګېدو په نتیجه کې ووژل شوو.

په النصیرت کې چې په غزه کې د کډوالو د اتوو څخه یو کېمپ دی، اسرایلي هوايي جهازونو ګڼ شمېر حملې وکړې چې یو ګڼ شمېر منزله عمارت يې تباه کړو او د جوماتونو نه بهر سړکونه یې وويشتل. د صحت د چارواکو په وېنا په دغه حملو کې لږ تر لږه اووه کسان ووژل شوو.

د طبي امداد کارکوونکو وویل یوه ښځه او یو ماشوم د النصیرت په مغربي برخه کې د ټېنک په ګوله بارۍ کې ووژل شوو او پينځه کسان په یو نږدې کور کې په فضايي حمله کې ووژل شوو.

د مصر په پوله د غزه په رفح ښار کې مقامي اوسېدونکو وویل اسرایلي ټېنکونو د ښار په شمال مغربي برخه کې پېش قدمي وکړه.

اسرایلي پوځ د تازه جګړې په اړه څه نه دي ویلي.

په غزه کې د اسرایل د ۱۳ میاشتو د جنګ هدف د حماس وسله وال ختمول دي. د غزه د صحت چارواکي وايي په سیمه کې د جنګ دلاسه قریباً ۴۴۲۰۰ فلسطینیان وژل شوي دي او په دې مهال د غزه ټوله ابادي لږ تر لږه یو ځل د یو ځای نه بل ځای ته حرکت کړی دی. د غزه پراخه کچه علاقو کې ودانۍ وېجاړې کړی شوي دي.

اسرایل د حماس خلاف جنګ د تېر کال د اکتوبر په اوومه نېټه په اسرایل د حماس د حملې په جواب کې شروع کړو. د حماس په حمله کې تر ۱۲۰۰ پورې کسان وژل شوي او د تر ۲۵۰ پورې نور کسان حماس یرغمال ونیول چې ځینې اوس هم د حماس په ولکه کې دي.

په غزه کې د جنګ بندۍ دپاره په تېرو څو میاشتو کې شوي کوښښونه ناکامه شوي دي. د امن په کوښښونو کې امریکا، مصر او قطر شامل و خو قطر د منځګړتوب کوښښ وځنډول او ویې وېل پکار ده چې دواړ فريقېن، اسرایل او حماس، یو بل ته رعایتونه ورکولو ته تیار شي.