د اسرايل پوځ ويلي په غربي پټۍ کې يې هغه درې فلسطينيان وژلي چې د اسرايليانو خلاف په مرګوني بريدونو کې ککړ وو او اسرايل ته مطلوب وو. رپورټ وايي په سیمه کې د موجوده تشدد دا وروستۍ پېښه ده.
اسرایلي پوځ ويلي وژل شوي فلسطينيان په غربي پټۍ کې د يهوديانو د نوابادکارۍ په ساحه کې د درېو يهوديانو ښځو په وژلو کې ککړ وو چې يوه پکې برتانوي يهوده مور او دوه د هغې لوڼه وې.
اسرايلي ځواک ويلي دوی د مقبوضه غربي پټۍ نابلس ښار ته د زيارت په سحر وختي ورننوتلي وو او د يوې سختې مقابلې وروستو يې دغه درې تنه وژلي چې دوه پکې د حماس ډلې وسله وال وو. د وژل شوو تنانو نومونه حسن کتناني، معاذ مسري او ابراهيم حرا ښودل شوي.
د فلسطين د صحت وزارت ويلي درې تنه وژل شوي خو د هغو د پېژندګلو په اړه يې په اجله توګه څه نه دي ويلي.
په نابلس کې تازه تشدد په يو حساس وخت کې شوی او دا د اسرايل په جيل کې د هغه معلوم فلسطيني قيدي د مرګ نه څو ورځې وروستو وشول چې د ډېرو ورځو نه يې د نه خوړلو احتجاج پيل کړی و.
د هغه د مرګ نه وروستو د توغندو يوه لړۍ وسله والو په غزا سيمه چلولې وه او په سمندري سيمه جهازونو بمباري کړې وه چې يو تن پکې وژل شوی و.
اسرايل د تېر کال نه د غربي پټۍ په کلو او ښارونو کې د ابادو خلکو تلاشيانې اخلي چې د نيولو تنانو شمار پکې 90 ته رسېدلی. فلسطينيانو يې په غبرګون کې په اسرايليانو حملې پيل کړې وې.
اسرايل وايي دا تلاشيانې د وسله والو د نټ ورک د ختمولو په غرض کوي.
فلسطينيان وايي د اسرايل حملې او تلاشيانې د دغه ملک د 56 کلن قبضې تسلسل دی او هغه سيمې او زمکې قبضه کوي چې فلسطين يې په راتلونکي کې د خپل ازاد رياست برخه جوړول غواړي.
د دواړو خواو په يو بل د حملو په نتيجه کې تر اوسه 250 فلسطينيان چې اسرايل وايي ډېر پکې وسله وال وو وژل شوي خو په دې کې کاڼي ويشونکي او د جنګ برخه نه جوړېدل خلک هم وژل شوي. نزدې پنځوست تنه اسرايليان د فلسطينيانو په حملو کې وژل شوي.
یادونه: د دې خبر معلومات د ای پي خبري ادارې نه اخیستل شوي دي
