د پاکستان سپريم کورټ درې کسيزه بېنچ د جسټس منصور علي شاه په مشرۍ د ګل- دوشنبې په ورځ نورو ګوندونو ته د سني اتحاد کونسل د ځانګړو څوکیو د ورکولو په اړه د پېښور هایکورټ او الېکشن کمېشن فېصله معطل کړې ده.‏

څېړونکي وايي د پېښور هايکورټ له فېصلې وروسته د صوبايي اسمبلۍ اجلاس نه دی رابلل شوې چې د بجټ، بارانونو نه اوښتي زيان او نورو مهمو مسئلو باندې منتخب نمایندګانو بحثونه نه دي کړي.

په 14م مارچ د پېښور هایکورټ د سني اتحاد کونسل ته په پارليمان کې د ښځو او اقلیتونو د ځانګړو څوکيو ورکولو خواست خارج کړی وو کوم چې بيا دغه ګوند په سپريم کورټ کې چېلنج کړی وو.

قانون پوهان وايي صوبايي حکومت د اسمبلۍ اجلاس ځکه نه رابللو چې په هغې کې به په مخصوصه څوکيو باندې ټاکل شوو غړو نه سوګند اخستل کېدو، خو د سپريم کورټ فېصلې راتلو وروسته اوس د اجلاس رابللو لار هواره شوې ده.

په پېښور هايکورټ کې وکيل بابر خان يوسفزی وایي، "اوس په موجوده حالاتو کې که د صوبايي اسمبلۍ اجلاس راوغوښتل شي او اجلاس وشي، نو اوس به هغوی دې ته پابند نه وي چې مخصوص نشتونو والا نه به سوګند اخلي او هغوی به د اسمبلۍ غړي جوړوي".

د خېبر پښتونخوا اسمبلۍ د سوګند پورته کولو وروسته دوه اجلاسونه رابللي چې د سپيکر او وزيراعلا اتنخاب پکې شوی دی.

څېړونکي وايي د مخصوصه څوکيو په سر د شخړې له وجې بيا کوم اجلاس نه وو رابلل شوی او نه هم په صوبه کې د بارانونو نه د شوي زيان، د ترهګرۍ د پېښو او د بجټ تيارۍ په شان مهمو مسلو باندې بحثونه شوي دي.

په پښتونخوا کې د شخصي ټیلیویژن مشر علي اکبر وایي، اوس بجټ په سر باندې دی او په پښتونخوا کې ډېرې زياتې مسلې دي، وایي د صوبې معاشي حالت ډېر زيات خراب شوی دی:

"د زر اربه نه زياته قرضه اوښتې ده، نو که اجلاس وای خلکو به په هغې باندې خبرې کولې، خزانې مشير به تجويزونه اخیستل، مختلف قسمه تجويزونه او سکيمونه به راتلل نو د بجټ په تيارۍ کې په اسمبليو دا قسمه اوازونه اوچتېدل ډېر ضروري وي".

وي او اې ډیوه د خېبر پښتونخوا د حکومت نظر معلومولو د پاره د وزيراعلی د اطلاعاتو سلاکار بېرسټر محمد علي سېف او د خزانې وزير مزمل اسلم سره د وټسپ او ټیلیفون له لارې د رابطې هڅه وکړه خو بريالۍ نه شوه چې نظر يې معلوم کړي.

خو حکومتي سرچينې وايي په نیزدې څو ورځو کې د اسمبلۍ اجلاس رابللو پلان لري.

څېړونکي وايي د پښتونخوا حکومت د مخصوصو څوکيو ترلاسه کولو په سر صوبه په سېنټ کې د نمائندګۍ نه محرومه کړې ده۔

په پېښور هايکورټ کې وکيل طارق افغان وایي، "دې د وجې نه زمونږ نمايندګي په سېنټ کې هم نشته، د مخصوصه څوکيو باندې د حلف نه اخیستلو د وجې نه، نو دا يو سياسي او ایيني بحران په صوبه کې جوړ دی او که دا زر هوار نه شو نو زمونږ د صوبې مالي او سياسي حالات به نور هم کړکېچن شي".

د تحریک انصاف ګوند کاندیدانو په اتمه فرورۍ شوو انتخاباتو کې په ازاد حیثیت برخه اخیستې وه او له کامیابېدو وروسته د ځانګړو څوکیو ترلاسه کولو په ‏خاطر یو بل ګوند سني اتحاد کونسل کې شامل شوي وو، خو بیا هم الیکشن کمېشن دغه ګوند ته د شلو ځانګړو او درو اقلیتي څوکیو ورکولو نه انکار ‏کړی وو.‏

د پاکستان الیکشن کمېشن په پینځم مارچ د سني اتحاد کونسل د برخې ځانګړې څوکۍ په نورو سیاسي ګوندونو وېشلې وې او سني اتحاد کونسل د دغې ‏فېصلې پرضد پېښور هایکورټ ته خواست کړی وو.‏

د پاکستان په استخباراتي ادارو باندې په عدالتي چارو کې د مداخلت د تورونو په اړه د سپريم کورټ شپږ کسيزه بېنچ کې شامل جج اطهر من الله ویلي ټول مني چې په عدالتي چارو کې مداخلت کېږي او دا مسله د فېض اباد پرلت په اړه د سپريم کورټ د فېصلې سره هم هواره نه شوه.

د پاکستان د سپريم کورټ چیف جسټس قاضي فایز عيسى په مشرۍ د قاضیانو شپږ کسيزه ډلې ته نن د سپريم کورټ بار اېسوسي اېشن ستر عدالت کې جمع کړي خپلو وړانديزونو کې ویلي په عدليه کې د مداخلت کوونکو خلاف پلټنې پکار دي.

د اورونې په مهال د سپريم کورټ جج جسټس اطهر من الله وویل چې د اسلام اباد هایکورټ د شپږو ججانو خط يو حقيقت دی، باید چې مرکزى حکومت خپل دريځ واضح کړي.

جسټس اطهر من الله په دې موقع خپل اضافي نوټ هم ولوستو او ویې ویل چې د هایکورټ ججانو په ګوته کړې چې اوس هم د مداخلت لړۍ روانه ده.

قانون پوهان وايي باید چې عدالت د هېواد د استخباراتي ادارو د کار طريقه کار معلوم کړي چې هغوى د کوم قانون لاندې کار کوي.

قانون پوه انعام الرحيم وایي، دا د يو تن د سپکاوي مسله نه ده بلکې دا د مداخلت د لارې عدالتي عمل ګډوډ کول کېږي:

"په دې باندې د غدارې 6مه دفعه لګېدی شي، د ايين 6 ماده وايي چې هره اداره به په خپله دستوري داېره کې دننه کار کوي ځکه چې هر يو سوګند پورته کړی دی، پرويز مشرف ايين نه وو شلولی بلکې هغه د ايين څخه بالا اقدمات پورته کړي وو".

د مقدمې د اورونې په مهال د پاکستان بار کونسل وکيل په خپل دلایلو کې وویل چې د اسلام اباد هایکورټ د شپږو ججانو په معامله پاکستان بار کونسل عدالتي پلټنې کول غواړي.

وکیل غوښتنه وکړه چې د يو څخه په زياتو ججانو ګډ جوډېنشل کمېشن دی جوړ کړې شي چې داسې قصوروار کسانو ته سزا ورکړی شي.

سرکاري وکيل یا اټارنى جنرل عدالت ته خواست وکړو د تېرې اورونې حکمنامه دې ورکړی شي چې وزير اعظم او د دفاعي چارو وزارت ترېنه اګاه کړي.

د عدالتي چارو خبريال وحيد مراد وایي‌، "جسټس اطهر من الله وايي په دې کې تپوس د حکومت نه کول پکار دي، ولې چې استخباراتي ایجنسيانې- چې په چا عدالتي چارو کې د لاسوهنې تور دی- د حکومت لاندې کار کوي او دا د حکومت ذمه واري ده چې هغه د خپلو خفيه اېجنسيانو نه تپوس وکړي او عدالت ته ځواب ورکړي".

د مقدمې د اورونې په وخت جسټس منصور علي شاه په خپلو څرګندونو کې وویل په بازار کې داسې کومه ګولۍ نه شته چې په خوړلو یې يو جج مضبوط کېدای شي، هغه ووېل د معامله کونکو قاضیانو پر ضد ګامونه اخستل پکار دي.

د پاکستان تحریک انصاف ګوند یو مشر سردار لطيف کهوسه وایي، "دا خو د ايين خلاف بغاوت دی، دا چې په عدالتي چارو کې کوم ډول مداخلت کېږي، دې عدالتي نظام په زنځيرونو کې تړلی دی".

د لاهور هایکورټ بار ستر عدالت کې جمع کړي خپلو وړانديزونو کې ویلي په عدالتي چارو کې د خفيه ادارو لاسوهنه يو ښکاره راز دی، وایي سپريم کورټ ته د يو نظام جوړولو ضرورت دی.

د سپريم کورټ وکيل شېر امان خان اېډوکېټ وایي، په عدالتي چارو کې د استخباراتي ادارو د لاسوهنې د مخنیوي لپاره باید په پارليمان کې بحث وشي:

"که عدالتي چارې غوره ګڼي نو بيا دې حکومت قانون سازي هم وکړي، او زما په خيال اوسني صورتحال کې هم دغه يوازينۍ حل دی، سپريم کورټ سره هم بله لاره نه شته".

د اسلام اباد هایکورټ شپږو ججانو د مارچ په 26مه سپريم کورټ ته خط یو لیکلی وو او تور یې پورې کړی وو چې استخباراتي ادارې د دوی په عدالتي چارو کې مداخلت کوي. د پاکستان استخباراتي ادارو دغو تورونو ته تر اوسه رسمي جواب نه دی ویلی.

د پاکستان د پوځ وياند يو ځل بيا تکرار کړه، "د تحریک طالبان پاکستان (ټي ټي پي) ترهګر د افغانستان د خاورې نه پاکستان کې ترهګري کوي، د ‏ترهګرۍ وروستۍ پېښې د افغانستان نه شوي، پاکستان د افغانستان د عبوري حکومت سره په هره کچه مرسته کړې خو افغان عبوري حکومت تراوسه ‏خپلې ژمنې نه دي پوره کړي".‏

د پاکستان د پوځ وياند مېجر جنرل احمد شريف چودري په خبري غونډه کې وويل، "کلک شواهد موجود دي چې د ټي ټي پي ترهګر د افغانستان خاوره ‏کاروي".‏

د پاکستان د پوځ وياند دعوې ته په افغانستان کې د واکمنو طالبانو لخوا سمدستي ځواب مخې ته نه دی راغلی، خو طالبان له دې وړاندې د پاکستان دغه ‏ډول تورونه تل رد کړي او وايي، پاکستان دې د خپلې ناکامۍ تور په افغانستان نه لګوي.‏

پښتونخوا او بلوچستان کې ترهګري

احمد شريف چودري وويل، د تیرو څو میاشتو راهسې ترهګر او سهولت کار یې په خېبرپښتونخوا او بلوچستان کې د امنیت خرابولو هڅې کوي، خو ‏امنیتي ادارې یې د مخنيوي هڅه کوي.‏

نوموړي د جنورۍ په مياشت کې د مچ په اېف سي کېمپ د بي اېل اې د بريد، په ‏‎16‎مارچ کې په شمالي وزيرستان کې په پوسته د بريد يادګېرنه وکړه او وې ‏یې ویل، پاکستان بيا په افغانستان کې عمليات وکړل او اته ترهګر یې ووژل. ‏

پوځي ویاند په ګوادر کې د ‏‎20‎م مارچ د حملې ناکامه کولو وویل، او په ‏‎26‎م مارچ د خېبرپښتونخوا په بشام کې په چينايي انجينيرانو د حملې په اړه یې ‏وويل، "په دغه بريد کې پينځه چينايي او يو پاکستانی وژل شوي او د دغه بريد منصوبه بندي هم په افغانستان کې شوې، خودکش بمبار هم افغان وګړی ‏وو، پاکستان د دغو پېښو په کلکه غندنه کوي".‏

نوموړي په په تربت، شمالي وزيرستان او پشين کې د عملياتو او بريد کوونکو د وژلو يادګېرنه هم وکړه.‏

هغه تور ولګوو، "پاکستان کې د ترهګرۍ د تازه څپې غټ علت ټي ټي پي ته د افغانستان څخه ترلاسه کېدونکې سهولت کاري، او نوې وسله ورکول هم ‏دي، د پوځ مشر څو ځله ويلي چې پاکستان کې د ترهګرو دپاره هيڅ ځای نشته".‏

د پوځ وياند وویل، پوځ روان کال د ايران په سرحدي علاقه کې عمليات کړي او څو ترهګر یې وژلي وو. ‏

ترهګري

احمد شریف وویل، "پاکستان د اوږدې مودې نه د افغان کډوالو کوربه توب کوي، خو د پاکستان د هڅو باوجود، او بيا بيا په رياستي کچه افغان عبوري ‏حکومت ته په ګوته کولو، د ټي ټي پي ترهګر د افغانستان خاوره کاروي او پاکستان کې ترهګري کوي".‏

هغه زياته کړه، "پاکستان په دغې اړه کلک شواهد ورکړي خو په هغې تراوسه پورې کوم مثبت پرمختګ نه دی شوی، د تازه ترهګرۍ د پېښو کړۍ او ‏شواهد په افغانستان کې د موجودو ترهګرو پناه ځايونو ته رسي".‏

هغه وویل، "پاکستان د طالبانو د حکومت په نړيواله کچه هر ډول مرسته کړې خو طالبانو چې په دوحه کې کومې وعدې کړې په هغې یې تراوسه پورې عمل ‏نه دی کړی، په دغه معاهده کې ښکاره ليکل شوي چې د افغانستان خاوره به د کوم ملک خلاف نه کاريږي خو کلک شواهد موجود دي چې د ټي ټي پي ‏ترهګر د افغانستان خاوره کاروي په دغه لړ کې د پاکستان د بهرنيو چارو وزارت احتجاج هم کړی او د پوځ مشر پرې تحفظات هم څرګند کړي دي".‏

د طالبانو حکومت بيا بیا وايي، د افغانستان خاوره د کوم بل هيواد پرضد کارېدو ته نه پرېږدي.‏

افغان کډوال

د پوځ وياند وويل، د غېر قانونه بهر ملکيانو ویستلو پرېکړه د ملک د ګټو په خاطر شوې وه، "تراوسه پورې ‏‎5,63,639‎‏ غېر قانونه افغانان خپل ملک ته ‏ستانه شوي، خو اوس هم په لکونو افغان کډوال په پاکستان کې مېشت دي".‏

پاکستان تېر کال د اکتوبر په میاشت کې د غېر قانونه غېر ملکيانو ویستلو پرېکړه کړې، په افغانستان کې واکمنو طالبانو ، پاکستان کې سياسي او ‏مذهبي ګوندونو او د بشري حقونو فعالو د پاکستان نه د دغه پرېکړې بيرته اخستو غوښتنه کړې وه.‏

د احمد شريف په خبره، د غېر قانونه افغانانو ويستلو پرېکړه د پاکستان حکومت ځکه کړې وه چې يو لور ته د پاکستان په اقتصاد بوج سېوا کېدو او بل ‏اړخ ته د امنيت حالات هم خرابېدل.‏

پوځي عمليات ‏

د پوځ وياند وویل، روان کال امنیتي ځواکونو ټول ‏‎13,135‎‏ غټ واړه عمليات کړي، ‏‎239‎‏ ترهګر یې وژلي او ‏‎396‎‏ يې نيولي دي، او هره ورځ د ‏‎100‎‏ پورې ‏عمليات کيږي، په دغو عملياتو کې ‏‎19‎‏ مهم ترهګر وژل شوي او نيول شوي هم دي.‏

هغه زياته کړه، روان کال په دغو عملياتو کې دوه افسران او ‏‎60‎‏ پوځي اهلکار وژل شوي دي. وسله وال ځواکونه به د ملک څخه ترهګري ختموي او دا ‏کاميابه جګړه به د وروستي ترهګر د خاتمې پورې روانه وي.‏

هغه وويل، د افغانستان سره په پوله د بارډر منېجمنټ يا پولې د انتظام کار ‏‎98‎‏ فيصده بشپړ کړل شوی او ايران سره په پوله ‏‎91‎‏ فيصده کار شوی او ‏افغانستان سره په پوله د ترهګرو د مخنيوي دپاره ‏‎753‎‏ قلعې جوړې شوي او ایران سره په پوله ‏‎89‎‏ قلعې جوړې شوي دي.‏

پاکستان کې چينايي وګړي

د پوځ ویاند وویل، پاکستان کې خواوشا ‏‎29,000‎‏ چينايي وګړي موجود دي، په دوی کې خواوشا ‏‎25,00‎‏ په سي پيک پروژو کار کوي، او ‏‎5000‎‏ خواوشا په ‏نورو پرمختيايي پروژو کار کوي پوځ او نورې امنیتي ادارې ته تحفظ ورکوي.‏

د بشام د پېښې په اړه یې وويل، د دغه پېښې هدف د پاکستان چين دوستۍ ته تاوان اړول وو او پاکستان اقتصادي پرمختيا او سي پيک ته تاوان اړول او ‏ځينې ګاونډي هيوادونو هم په دې کې لاس لري.‏

بې درکه کسان

احمد شریف چودري وويل، د بې درکه کسانو مسله يوه پېچلې او مهمه مسله ده، په وروستيو کې ځينې ترهګر ووژل شو د هغو نومونه د بې درکه کسانو په ‏نوملړ کې وو.‏

هغه زیاته کړه د ‏‎2011‎م نه وروسته حکومتي کمېشن په دې کار کوي په مطبوعاتو کې دغه مسلې ته هوارول کيږي خو د کمېشن د جوړولو راهسې کمېشن ‏ته خواوشا ‏‎10,000‎‏ پېښې راوړل شوي او په دې کې ‏‎80‎‏ قضيې هوارول شوي دي.‏

د نوموړي په خبره، پاکستان کې دغې مسلې ته هوا ورکول کيږي او پروپېګنډا کيږي. "ايا په افغانستان کې د ټي ټي پي ترهګر موجود نه دي؟ او ایا د بي ‏اېل اې ترهګر په ګاونډي هيواد کې موجود نه دي؟". ‏

هغه وویل، حکومت دغه مسلې ته جدي ګوري او ټولې ادارې په دې کار کوي.‏

نهمه مې

د پوځ وياند وویل، "نهمه مې د پاکستان د پوځ مقدمه نه ده د ټول پاکستان د ولس مقدمه ده"، "که د پاکستان په نظام انصاف او جزا او سزا باندې يقين ‏کول وي نو د نهمې مې ملزمانو ته به د ايين او قانون ترمخه سزا ورکول وي".‏

تېر کال په نهمه مې د غبن په قضیه کې د عمران خان له نيولو وروسته په دغه ورځ او لسمه مې د تحریک انصاف غړو د ملک په لويو ښارونو کې قهرجنې ‏مظاهرې کړې وې.‏

دغه ډول په راولپنډۍ کې په پوځي مرکز جي اېچ کيو، او لاهور کې د کور کمانډر په کور حملې شوې وې ، اورونه لګول شوي وو، ګاډي یې مات کړي او د ‏ملک په نورو برخو کې هم سرکاري ودانيو ته د تاوانونو اړولو تورونه پرې لګول شوي وو.‏

د پاکستان په بېلابيلو ښارونو کې د نهمې مې د پېښو مقدمې د تحریک انصاف ګوند د مشرانو او غړو پرضد درج شوې وې.‏

احمد شریف چودري وویل، اوس د نهمې مې د پېښو د پلټنو دپاره د عدالتي کمېشن جوړولو ویل کيږي، نو دغه پېښې خو ښکاره دي، "خو که عدالتي ‏کمېشن جوړيږي مونږ تيار يو خو که عدالتي کمېشن جوړول کيږي نو هغه دې د ‏‎2014‎م د دهرنې، پارلیمان باندې د حملې، پي ټي وي باندې د حملې، آی ‏اېم اېف ته د خطونو او نهمې مې د پېښو پورې ټولې پلټنې وکړي".‏

پاکستان تحريک انصاف ګوند د نهمې مې د پېښو د پلټنو دپاره د عدالتي کمېشن جوړولو غوښتنه کوي.‏

پوځي وياند وویل، "مونږ له د خپل، سزا او جزا په نظام د يقين کولو دپاره ضروري ده چې د نهمې مې ملزمانو ته د ايين او قانون لاندې زر تر زره سزا ورکړل ‏شي".‏

د پوځ وياند د تحریک انصاف ګوند او د دغه ګوند د مشر د نوم اخستو بغېر وويل، " د انتشاري ټولې سره خبرې نه شي کېدی، خبرې اترې سياسي ‏ګوندونه کوي د انتشاري ټولې سره يواځينۍ لاره دا ده چې د زړه نه معافي وغواړي او تعميري سياست وکړي".‏

امنیتي سرچینې وایي د بلوچستان ایالت په ږوب سیمه کې امنیتي ځواکونو د وسله والو په ضد عملیات کړي چې په کې د پینځو وسله والو د وژلو دعوه شوې ده.

د سیمې څخه امنیتي سرچینو وي او اې ډیوه ته ویلي دا عملیات د دوشنبې یا ګل په ورځ د استخباراتي معلوماتو په اساس هغه وخت ترسره شوي چې ترهګرو غوښتل د ږوب له لارې خېبر پښتونخوا ته واوړي.

سرچینې وایي په دغه مهال د وسله والو اؤ امنیتي ځواکونو تر منځ سخته نښته شوې چې لږ تر لږه پینځه وسله وال په کې وژل شوي دي.

سرچینې زیاتوي چې په وژل شوؤ کې د درېوؤ وسله والو پېژندګلو شوې چې تعلق یې د خېبر پښتونخوا د قبایلي ضلعې وزیرستان سره دی خو دغه سرچینې نه ده ښکاره کړې چې وژل شوي وسله وال د کومې تندروه ډلې سره تړاؤ لري؟

پوځ لا د دې عملیاتو په اړه په رسمي ډول څه نه دي ویلي خو تر دې وړاندې هم په بیلا بیلو وختونو کې پوځ په ږوب سیمه کې د ترهګرو د وژلو دعوې کړې دي.

په دې وروستیو کې د پاکستان په خېبرپښتونخوا اؤ بلوچستان صوبو کې په امنیتي ځواکونو د بریدونو لړۍ چټک شوې اؤ دوه ورځې وړاندې هم پوځ اؤ د ترهګرۍ ضد محکمې پولیسو دعوه کړې وه چې په قبایلي ضلعه شمالي وزیرستان، کوټه اؤ پېنډۍ کې یې په دریوؤ بیلابیلو پېښو کې دیارلس (۱۳) ترهګر وژلي دي.

پاکستان تورونه لګوي چې ترهګر افغانستان کې خوندي ځالې لري اؤ د هلته نه په پاکستان کې د ورانکارۍ منصوبې جوړوي.

خو په افغانستان د واکمنو طالبانو حکومت بیا د پاکستان دا تورونه ردوي اؤ وایي په افغانستان کې هیڅ ترهګرې ډلې وجود نه لري اؤ پاکستان باید دخپل امنیت معاملې پخپله هوارې کړي.

د بلوچستان وتلي سیاستمدار ښاغلي شیخ جعفر خان مندوخیل د بلوچستان د ۲۴م ګورنر په توګه د خپل منصب لوړه کړې ده.

هغه ته تېره ورځ د بلوچستان هایکورټ چیف جسټس محمد هاشم خان د یوې دستورې په ترڅ کې سوګند ورکړی چې په دغه دستوره کې د بلوچستان وزیراعلا سرفراز بګټي، دهغه د کابېنې وزیران، سیاسي اؤ قبیلوي مشران شریک وؤ.

له سوګند کولو وروسته رسنیو سره په خبرو کې ښاغلي مندوخیل ویلي چې هغه به د وفاق اؤ صوبې تر منځ د یو پل په توګه کردار ترسره کوي اؤ بلوچستان ته د پېښو ستونزو په اړه به د مرکزي حکومت سره خبره کوي.

جعفر مندوخیل څوک دی؟

اته شپېته (۶۸) کلن مندوخیل د بلوچستان په پښتنه سیمه ږوب کې زیږیدلی اؤ هم دغلته لوی شوی دی.

د هغه پلار حاجي سعدالله خان مندوخیل هم په سیاست کې برخه درلوده اؤ د پاکستان مسلم لیګ قیوم ډلې یو فعال غړی ؤ.

شیخ جعفر مندوخیل له ډیر وخت راهسې د بلوچستان په سیاست کې یو فعال رول ادا کوي اؤ هغه په ۲۰۰۲، ۲۰۰۸ او ۲۰۱۳م کلونو کې په عامو ټاکنو کې کامیابۍ ترلاسه کړې وې اؤ د بلوچستان اسمبلۍ غړی ټاکل شوی ؤ.

په کال ۲۰۱۳م کې هغه د ږوب نه د پاکستان مسلم لیګ(ق) په ټکټ د صوبایي اسمبلۍ غړی منتخب شوی ؤ اؤ بیا وروسته په کال ۲۰۲۳م کې د مسلم لیګ (ن) ګوند د بلوچستان صدر ټاکل شوی ؤ چې تر دې دمه په دغه ګوند کې فعالیت کوي.