په واشنګټن کې د نېټو مشرانو په ایران، چین او شمالي کوریا تنقید وکړو چې د روس مرسته کوي

په واشنګټن کې د غونډې وروسته د نېټو د غړو ملکونو مشران د جمعې په ورځ کورونو ته بېرته روانه شول او په درې ورځنۍ ناسته کې يې د تنظیم د جوړېدو ۷۵ ولمانځل، یوکرېن سره يې د اوږد مهاله پوځې امداد او دا لوظ وکړو چې روس سره په جنګ کې د ښکېل ملک مستقبل په نېټو کې دی. د نېټو مشرانو په چین، ایران او شمالي کوریا تنقید وکړو چې یوکرېن خلاف جنګ کې د روس مرسته کوي.

د غونډې په اخېره کې جاري شوي بیان کې د نېټو مشرانو وویل دوه کاله مخکې شروع شوي په یوکرېن د روس یرغل په یورو اېټلانټېک سیمه کې امن او امان تباه کړی او نړیوال امنیت یې کمزوری کړی دی.

د نېټو مشرانو د اتحادي ملکونو تحفظ ته روس مستقیم خطر وبللو او ګامونه يې واخیستل چې یوکرېن د روس خلاف جنګ کې کامیاب شي.

یوکرېن سره د اوږدې مودې پوځي امداد په لړ کې د نېټو مشرانو د نېټو سېکیورټي اسسټنس اېڼد ټرېنېنګ یوکرېن په عنوان مرکزي کمانډ قایم کړو چې یوکرېن سره د مختلفو ملکونو پوځي امداد رایوځای کړي او د یوکرېن ځواکونو تربیه یقیني کړي.

د نېټو سېکرېټري جنرل ینس سټالټبرګ د زیارت، پنجشنبې، یو خبري کانفرنس ته وویل په جرمني کې د کمانډ سېنټر یا مرکز دلارې به یوکرېن ته د مختلفو ملکونو ورکړی پوځي سازاوسامان او تربیه رایوځای کولی شي.

سټالټبرګ وویل د نټېو اتحادیان په دې خبره متفق شول یوکرېن سره به هرکال لږ تر لږه د ۴۳ بېلین ډالرو امداد کوي. د سرمشریزې غونډې په مهال سټالټنبرګ یوکرېن سره د پوځي او د فضاي دفاع په برخه کې د نور امداد اعلانونه وکړل.

د نېټو په خبرو اترو کې د جنوبي کوریا د صرد یو سوک یول د شرکت په اړه سټالټنبرګ وویل دا څرګندوي چې څنګه د یورپ امنیت د اېنډوپېسېفېک سیمې د امنیت سره تړلی دی.

سټالټنبرګ زیاته کړه چې د یوکرېن خلاف د روس د "غېرقانوني جنګ" مرسته چین او ایران کوي او شمالي کوریا هم په کې څه کمه برخه نه اخلي.

د غونډې په اخېره کې جاري شوي بیان کې د نېټو مشرانو وویل شمالي کوریا او ایران نېغ په نېغه په جنګ کې د روس ملاتړ کوي او د روس پوځ ته ګوله بارود او ډرنز ورکوي. د نېټو مشرانو چین هم د روس د جنګ د کوښښونو د حمایت کوونکي په څېر یاد کړو او ویې وېل چين په لویه پېمانه د روس د دفاعي صنعت امداد کوي.

نېټو وویل که څه هم چین روس ته په مستقیم ډول وسله نه ورکوي خو د غبرګ استعمال شیان لکه د وسلو پرزې، خام مال او نور مواد ورکوي چې د روس په دفاعي صنعت کې استعمالېږي.

د نېټو مشرانو په بيجېنګ غږ وکړو چې د ماسکو مرسته ختمه کړي او ويې وېل داسې نه شي کېدلی چې یو خوا به چین په جدید تاریخ کې د یورپ د ټولو نه لوی جنګ مرسته کوي او بلخوا به يې مفاداتو او نوم ته نقصان نه رسي.