د پاکستان مسلم ليګ ن ګوند مشر نواز شریف د جمعيت علمااسلام ف ګوند د مشر مولانا فضل الرحمان سره ليدلي او ويل شوي دواړو د ملک په سياسي چارو خبرې کړي دي.
د مسلم ليګ ن رانا ثناالله چې د نواز شریف سره په پلاوي کې مل وو او د مولانا فضل الرحمان سره په اسلام اباد کې دغه ليدنه شوې، مطبوعاتو سره په خبرو کې یې ويلي، اول په ګډه ليدنه شوې او بیا دواړو مشرانو يو په يو ليدلي دي.
خو نوموړي د دغه يو په پو ليدنې په اړه څه نه دي ویلي.
دا ليدنه په داسې وخت کې شوې چې مسلم ليګ ن ګوند شهباز شريف د وزيراعظم د څوکۍ دپاره نومولی، پاکستان پيپلز ګوند او اېم کيو اېم یې ملاتړ کړی دی.
د پاکستان د نوي وزیراعظم ټاکنه سبا د اتوار/يکشنبې په ورځ ټاکل شوې ده.
مسلم ليګ او ملاتړي سياسي ګوندونه یې دعوه کوي د وزيراعظم د انتخاب دپاره ورسره رای پوره دي.
د تحریک انصاف ګوند عمرايوب خان به د سني اتحاد کونسل لخوا د وزيراعظم امېدوار وي.
د پاکستان د وزيراعظم جوړېدو دپاره د قامي اسمبلۍ لږ تر لږه 169 ووټونه ترلاسه کول پکار دي.
خو جمعيت علمااسلام ف ګوند پرون د قامي اسمبلۍ د سپيکر او مرستيال سپيکر په انتخاباتو کې برخه نه ده اخستې. او له دغې وړاندې مولانا فضل الرحمان چې د قامي اسمبلۍ سوګند کړی، په خپله یې ويلي وو په حکومت جوړونه کې به برخه نه اخلي او نه به د حکومت جوړونې په عمل کې ووټ ورکوي.
مولانا فضل الرحمان په خپله پلارنۍ حلقه ډېره اسماعيل خان انتخابات بايللي، خو د بلوچستان صوبې د پښين د قامي اسمبلۍ د حلقې نه کامیاب شوی دی، د هغه د ګوند يو بل غړی نور عالم د پېښور، يو بل د وزيرستان او پاتې درې نور هم د بلوچستان صوبې څخه د قامي اسمبلۍ امېدواران منتخب شوي دي.
مولانا فضل الرحمان د تېر حکومتي اتحاد (پي ډي اېم) مشر وو، او په تېر حکومت کې یې وزارتونه هم لرل.
د پرونۍ ليدنې وروسته د جمعيت علمااسلام ف ګوند يو مشر عبدالغفور حېدري ويلي، د حکومت په جوړونه کې د برخې نه اخستو په خپل دريځ ولاړ دي.
او رانا ثناالله بيا د جيو نيوز سره په خبرو کې ويلي، هيله لري چې مولانا فضل الرحمان به د پاکستان تحریک انصاف سره په سړکونو احتجاج ونه کړي.
پاکستان تحریک انصاف ګوند نن د خالي/ شنبې په ورځ په انتخاباتو کې د درغليو د تورونو په سر احتجاج اعلان کړی دی.
پاکستان کې په اتمه فرورۍ عام انتخابات ترسره شوي، د مولانا فضل الرحمان په ګډون پښتانه ملت پال، بلوڅ او پاکستان تحریک انصاف ګوند په دغو انتخاباتو کې د درغليو تورونه لګوي، چې نتيجې یې بدل کړل شوي دي.
خو د پاکستان نګران حکومت او الېکشن کمېشن په انتخاباتو کې د درغليو تورونه رد کړي دي.
Forum